മുല്ലപ്പെരിയാര്‍ അണക്കെട്ടിലെ ജലനിരപ്പ് ഉയരുന്നു. 139.5 അടിയാണ് നിലവിലെ ജലനിരപ്പ്. രണ്ടു ദിവസമായി തുടരുന്ന മഴ മൂലംഅണക്കെട്ടിലേക്കുള്ള നീരൊഴുക്ക് വര്‍ധിച്ചതാണ് ജലനിരപ്പ് ഉയരാന്‍ കാരണം.

അണക്കെട്ടിന്റെ വൃഷ്ടിപ്രദേശത്ത് 502 മില്ലിമീറ്ററും തേക്കടിയില്‍ 4.8 മില്ലിമീറ്ററും മഴ ലഭിച്ചിട്ടുണ്ട്. സെക്കന്‍ഡില്‍ 1,326 ഘനയടി വെള്ളമാണ് അണക്കെട്ടിലേക്ക് ഒഴുകിയെത്തുന്നത്. എന്നാല്‍ അണക്കെട്ടിലെ ജലനിരപ്പ് ഉയരുമ്പോഴും തമിഴ്‌നാട് കൊണ്ടുപോകുന്ന വെള്ളത്തിന്റെ അളവ് 456 ഘനയടി മാത്രമാണ്.
അതേസമയം, മുല്ലപ്പെരിയാര്‍ അണക്കെട്ടിലെ ജലനിരപ്പ് 139 അടി പിന്നിട്ടിട്ടും അണക്കെട്ടു സന്ദര്‍ശിക്കാന്‍ ഉപസമിതി തയാറാകാത്തതിലുള്ള കേരളത്തിന്റെ ആശങ്ക ഉപസമിതിയിലെ കേരളത്തിന്റെ പ്രതിനിധി ജോര്‍ജ് ദാനിയല്‍ മേല്‍നോട്ട സമിതി ചെയര്‍മാനെയും തമിഴ്‌നാടിന്റെ പ്രതിനിധികളെയും അറിയിച്ചിട്ടുണ്ട്. ഇന്നലെ രേഖാമൂലമാണ് അദ്ദേഹം സമിതിയംഗങ്ങള്‍ക്ക് കത്തു കൈമാറിയത്.
ആഴ്ചയില്‍ ഒരിക്കല്‍ ഉപസമിതി അണക്കെട്ടു സന്ദര്‍ശിച്ചു സ്ഥിതിഗതികള്‍ വിലയിരുത്തണമെന്നാണു മേല്‍നോട്ടസമിതി യോഗത്തില്‍ തീരുമാനിച്ചിരുന്നത്. ജലനിരപ്പ് 136 അടി പിന്നിടുമ്പോള്‍ ദിവസവും സ്ഥിതിഗതികള്‍ വിലയിരുത്തണമെന്നുള്ള സുപ്രീം കോടതി നിര്‍ദേശംപോലും മേല്‍നോട്ടസമിതി കണക്കിലെടുക്കുന്നില്ല. ജലനിരപ്പ് 140 അടിയിലേയ്ക്ക് എത്തുമ്പോള്‍ മേല്‍നോട്ടസമിതി അണക്കെട്ടു സന്ദര്‍ശിക്കുമെന്നാണു കഴിഞ്ഞ സന്ദര്‍ശനവേളയില്‍ ചെയര്‍മാന്‍ എല്‍.എ.വി. നാഥന്‍ പറഞ്ഞത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha