ശബരിമല യുവതീപ്രവേശനം സ്റ്റേ ചെയ്യില്ലെന്ന് സുപ്രീംകോടതി രണ്ട് തവണ വ്യക്തമാക്കിയ സാഹചര്യത്തിലും മണ്ഡലകാലത്തിന് മുന്നോടിയായും സര്‍ക്കാര്‍ വിളിച്ച സര്‍വകക്ഷിയോഗം അടിച്ച്പിരിഞ്ഞു. ഇതോടെ മണ്ഡലകാലം സംഘര്‍ഷഭരിതമാകുമെന്ന് ഉറപ്പായി. യോഗം പ്രഹസനമാണെന്നും സര്‍ക്കാര്‍ വിട്ട് വീഴ്ചയ്ക്ക് തയ്യാറല്ലെന്നും പ്രതിപക്ഷനേതാവ് വ്യക്തമാക്കി. ആമുഖപ്രസംഗത്തിലും ഞങ്ങളുടെ അഭിപ്രായം കേട്ട ശേഷവും മുഖ്യമന്ത്രി നിലപാടില്‍ ഉറച്ച് നിന്നു. വാക്ക് ഔട്ട് അല്ലാതെ മറ്റ് മാര്‍ഗമില്ല. സാധാരണ ഓള്‍പാര്‍ട്ടി മീറ്റിംഗില്‍ അങ്ങനെ ഉണ്ടാകില്ല. രണ്ട് നിര്‍ദേശം വെച്ചു, റിവ്യൂഹര്‍ജി പരിഗണിക്കാന്‍ തീരുമാനിച്ചതിനാല്‍ സാവകാശം വേണം, 22 വരെ വിധി നടപ്പാക്കുന്നത് നിര്‍ത്തിവയ്ക്കണം. രണ്ടും സമ്മതിച്ചില്ല. യോഗം കൊണ്ട് യാതൊരു പ്രയോജനവുമില്ല. കേരളത്തിലെ ഭക്തജനങ്ങളോടുള്ള വെല്ലുവിളിയാണ്. പ്രശ്‌നംപരിഹരിക്കാനുള്ള അവസരം ഗവണ്‍മെന്റ് ഇല്ലാതാക്കി. വാഹനപാസ്, തീര്‍ത്ഥാടകള്‍ക്കുള്ള നിയന്ത്രണം എടുത്ത് കളയണമെന്ന് കെ.പി.സി.സി പ്രസിഡന്റ് പറഞ്ഞു കേട്ടില്ല.

ആര്‍.എസ്.എസിന്റെയും ബി.ജെ.പിയുടെയും കയ്യാങ്കളിക്ക് സര്‍ക്കാര്‍ കൂട്ട് നില്‍ക്കുകയാണെന്നും ചെന്നിത്തല ആരോപിച്ചു. കോടതിവിധി നടപ്പാക്കാതെ സര്‍ക്കാരിന് മുന്നില്‍ മറ്റ് മാര്‍ഗമില്ലെന്ന് മുഖ്യമന്ത്രിയും വിധിനടപ്പാക്കാന്‍ സാവകാശം തേടണമെന്ന് യു.ഡി.എഫും ആചാരലംഘനം അനുവദിക്കില്ലെന്ന് ബി.ജെ.പിയും നിലപാട് എടുത്തതോടെയാണ് പ്രശ്‌നപരിഹാരം വീണ്ടും കീറാമുട്ടിയായി തുടരുന്നത്. ഉച്ചതിരിഞ്ഞ് പന്തളം കൊട്ടാരം പ്രതിനിധികളുമായും തന്ത്രികുടുംബവുമായും മുഖ്യമന്ത്രി ചര്‍ച്ച നടത്തും. ആചാരലംഘനം അനുവദിക്കില്ലെന്ന നിലപാടില്‍ നിന്ന് തങ്ങള്‍ പിന്നോട്ടില്ലെന്ന് പന്തളം കൊട്ടാരം നിര്‍വാഹകസമിതി അംഗം ശശികുമാര വര്‍മ രാവിലെ വ്യക്തമാക്കിയിരുന്നു.

ശബരിമലയുവതീ പ്രവേശനം സംബന്ധിച്ച് തല്‍സ്ഥിതി തുടരണമെന്ന് അഭിപ്രായംപറഞ്ഞ നിയമമന്ത്രി എ.കെ ബാലനെ യോഗത്തില്‍ പങ്കെടുപ്പിച്ചില്ല. വിശ്വാസികളുടെ പ്രതിനിധികളെയും ചര്‍ച്ചയ്ക്ക് വിളിച്ചിരുന്നില്ല. ഇതിനെതിരെ പ്രതിഷേധം ഉയര്‍ന്നിട്ടുണ്ട്. മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് രമേശ് ചെന്നിത്തല, സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍, സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍, ബി.ജെ.പി, ആര്‍.എസ്.എസ് നേതാക്കള്‍, വിവിധ രാഷ്ട്രീ കക്ഷികള്‍ എന്നിവര്‍ ചര്‍ച്ചയില്‍ പങ്കെടുത്തു.