മണിയാറിലെ പോലീസ് ക്യാമ്പിലേക്ക് വിശ്വാസികള് ഒഴുകുന്നു; യുവതീ പ്രവേശന വിഷയത്തില് നിന്നും വഴിതിരിഞ്ഞ് പോലീസ് അതിക്രമവും, ആരാധനാ സ്വാതന്ത്ര്യവും സമരായുധമാക്കുന്നു
മണിയാറിലെ പോലീസ് ക്യാമ്പിലേക്ക് വിശ്വാസികള് ഒഴുകുന്നു. ആരാധനാ സ്വാതന്ത്ര്യം പോലീസ് തടസ്സപ്പെടുത്തുന്നുവെന്നാണ് ഭക്തരുടെ പരാതി. ഭക്തി വേണ്ടിടത്ത് ഭയമാണ്. സന്നിധാനം പൂര്ണ്ണമായും പോലീസ് കസ്റ്റഡിയിലായിരുന്നിട്ടും വിശ്വാസികള് ശക്തമായ പ്രതിഷേധമുയര്ത്തിയത് പോലീസിനെ ഞെട്ടിച്ചു.
വിശ്വാസികളുയര്ത്തുന്ന ചോദ്യം ഇനി സര്ക്കാരിനെ വേട്ടയാടും. ഞങ്ങളുടെ ആരാധനാ സ്ഥലമാണ് സന്നിധാനവും, നടപ്പന്തലും. അവിടെ അയ്യപ്പനുമുന്നില് നാമജപയജ്ഞം നടത്തുന്നത് ആരാധനാ സ്വാതന്ത്ര്യമല്ലേ. ആചാരാനുഷ്ഠാനങ്ങള് പോലീസ് തടസ്സപ്പെടുത്തിയപ്പോഴാണ് ഞങ്ങള് പ്രതിഷേധിച്ചത്. നെയ്യഭിഷേകത്തിന് അവസരം നല്കിയശേഷമേ അറസ്റ്റ് ചെയ്ത് നീക്കാവൂ എന്നു ഭക്തര് പറഞ്ഞെങ്കിലും പോലീസ് വിസമ്മതിച്ചു. തുടര്ന്ന് ബലപ്രയോഗത്തിലൂടെ നടന്ന അറസ്റ്റ് കേരളത്തില് ചര്ച്ചയായിക്കഴിഞ്ഞു.
താഴെവീണ രാജേഷിനെ ബൂട്ടിട്ടു ചവിട്ടിയെന്ന ആരോപണവും കത്തിപ്പടരുകയാണ്. ശബരിമലവിഷയം അതിസങ്കീര്ണ്ണമാവുകയാണ്. വോട്ടുരാഷ്ട്രീയത്തില് നിന്നുമാറി ഒടുവില് ഭൂരിപക്ഷ വികാരമായി ആളിക്കത്തുകയാണ്. ഇനി സുപ്രീം കോടതിയുടെ തീരുമാനം സര്ക്കാരിനും, ദേവസ്വം ബോര്ഡിനും, പോലീസിനും, സമരം നയിക്കുന്ന ഹൈന്ദവ സംഘടനകള്ക്കും ഒരുപോലെ നിര്ണ്ണായകമാവുകയാണ്. എല്ലാ കണ്ണുകളും സാവകാശ ഹര്ജിയിലേക്ക്.
സന്നിധാനത്തെ പ്രതിഷേധത്തിന് കണ്ടാലറിയാവുന്ന നൂറ്റിഅന്പതു പേര്ക്കെതിരെ പോലീസ് കേസെടുത്തു. ഈ വിഷയം എന്.എസ്.എസ് ഏറ്റെടുക്കുമെന്ന് സുകുമാരന് നായര് പറഞ്ഞുകഴിഞ്ഞു. പോലീസ് ഭരണമാണ് ശബരിമലയില് നടക്കുന്നതെന്നും നിലവിലെ അവസ്ഥയില് ഭക്തര് ശബരിമലയിലേക്ക് എത്താന് തന്നെ മടിക്കുകയാണെന്നും എന്.എസ്.എസ്.
മുന്പൊരിക്കലും ഉണ്ടായിട്ടില്ലാത്ത നിയന്ത്രണങ്ങളാണ് സുരക്ഷയുടെ പേരില് ഏര്പ്പെടുത്തിയിരിക്കുന്നത്. വിശ്വാസികളുടെ വികാരം കണക്കിലെടുക്കാതെ യുദ്ധസമാനമായ രീതിയില് പോലീസിനെ വിന്യസിച്ചു. ആചാരങ്ങള് പാലിച്ചുവരുന്ന ഭക്തരെ അകാരണമായി തടയുകയും ലോക്കപ്പിലാക്കുകയും ചെയ്യുന്നുവെന്ന് എന്എസ്.എസ് പറയുന്നു.
എന്.എസ്.എസ് വീണ്ടും സമരരംഗത്ത് ശക്തമായി ഇടപെടുമെന്ന് സുകുമാരന് നായര് പറയുന്നു.
"
https://www.facebook.com/Malayalivartha