ശബരിമലയില്‍ അറസ്റ്റിലായ ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രന് പത്തനംതിട്ട കോടതി ജാമ്യം അനുവദിച്ചു. രണ്ടു മാസം റാന്നി താലൂക്കിൽ കടക്കരുതെന്ന ഉപാധിയോടെയാണ് ജാമ്യം. ശബരിമല സംഘര്‍ഷത്തില്‍ അറസ്റ്റിലായ 72 പേര്‍ക്കും ജാമ്യം ലഭിച്ചു.

ഔദ്യോഗിക കൃത്യനിര്‍വഹണം തടസപ്പെടുത്തിയെന്നും നിരോധനാജ്ഞ ലംഘിക്കാന്‍ ശ്രമിച്ചു തുടങ്ങിയ കുറ്റങ്ങളായിരുന്നു സുരേന്ദ്രനെതിരെ ചുമത്തിയിരുന്നത്. കഴിഞ്ഞ ശനിയാഴ്ചയാണ് സുരേന്ദ്രനെ പൊലീസ് അറസ്റ്റ് ചെയ്തത്. ശേഷം കോടതില്‍ ഹാജരാക്കിയ സുരേന്ദ്രനെ പൊലീസ് റിപ്പോര്‍ട്ട് അംഗീകരിച്ച്‌ കോടതി 14 ദിവസത്തേക്ക് റിമാന്‍ഡ് ചെയ്യുകയായിരുന്നു.

പോലീസിന്റെ ഔദ്യോഗിക കൃത്യനിർവഹകണം തടസപ്പെടുത്തിയിട്ടില്ലെന്നും , തങ്ങളുടെ കയ്യിൽ ഇരുമുടിക്കെട്ടല്ലാതെ മറ്റ് മാരകായുധങ്ങളൊന്നും ഇല്ലായിരുന്നു എന്ന കെ സുരേന്ദ്രന്റെയും മറ്റ് 72 പേരുടെയും വാദം കോടതി ശരി വച്ചു. ശരണം വിളി ഒരു കുറ്റകൃത്യമാണ് എന്ന പ്രതികളുടെ വാദവും കോടതി ശരി വച്ചു. ചിത്തിര ആട്ട വിശേഷത്തിനും ശബരിമലയിൽ നടന്ന ആക്രമണങ്ങളിൽ സുരേന്ദ്രനും മറ്റ്‍ പ്രതികൾക്കും പങ്കുണ്ടെന്ന് പോലീസ് വാദിച്ചെങ്കിലും പ്രകടനം നടത്തുക മാത്രമാണ് തങ്ങൾ ചെയ്തതെന്ന് പ്രതികളുടെ അഭിഭാഷാകൻ ചൂണ്ടി കാട്ടി. അത് കോടതി അംഗീകരിച്ചു. പ്രതികൾക്കെതിരെ സംസ്ഥാനത്തെ മാറ്റു പോലീസ് സ്റ്റേഷനുകളിലും കേസ് നിലനിൽക്കുന്നുണ്ടെന്നും അതിനാൽ ജാമ്യം അനുവധിക്കരുതെന്നും പോലീസ് വാദിച്ചെങ്കിലും കേസുകളുടെ വാദം കേൾക്കാൻ ആയില്ല.

കെ.സുരേന്ദ്രനും ആര്‍.രാജേഷ് ഉള്‍പ്പടെയുള്ള 69 പ്രതികള്‍ക്കും ജാമ്യം നല്‍കരുതെന്ന് പ്രോസിക്യൂഷന്‍ ആവശ്യപ്പെട്ടു. ഒബിസി മോര്‍ച്ച തൃശൂര്‍ ജില്ലാ അധ്യക്ഷന്‍ രാജന്‍ തറയില്‍, കര്‍ഷകമോര്‍ച്ച പത്തനംതിട്ട ജില്ലാ കമ്മിറ്റിയംഗം എം.എസ്. സന്തോഷ് എന്നിവരാണു സുരേന്ദ്രനൊപ്പം അറസ്റ്റിലായ മറ്റു രണ്ടു പേര്‍. ബിജെപി തൃശൂര്‍ ജില്ലാ അധ്യക്ഷന്‍ എ. നാഗേഷ്, കോട്ടയം ജില്ലാ സെക്രട്ടറി ലിജിന്‍ ലാല്‍, വി.സി. അജി എന്നിവരെയും കസ്റ്റഡിയില്‍ എടുത്തിരുന്നു എന്നാല്‍ ഇവരെ കേസില്‍ നിന്ന് ഒഴിവാക്കി.

അതേസമയം, സുരേന്ദ്രന് ജാമ്യം ലഭിച്ചാലും പുറത്തിറങ്ങാന്‍ സാധിക്കില്ലെന്ന തരത്തിലും റിപ്പോര്‍ട്ടുകള്‍ എത്തിയിട്ടുണ്ട്. ശബരിമല വിഷയത്തിനു പുറമെ കണ്ണൂരില്‍ പൊലീസിനെ ഭീഷണിപ്പെടുത്തിയ കേസില്‍ സുരേന്ദ്രന് കോടതി അറസ്റ്റ് വാറന്റയച്ചതിനെ തുടര്‍ന്നാണ് ഇത്തരത്തിലൊരു റിപ്പോര്‍ട്ട് പുറത്തു വന്നിരുന്നത്.