ശബരിമല പ്രതിഷേധത്തിന്റെ പേരില്‍ കസ്റ്റഡിയിലെടുത്ത ബി.ജെ.പി. സംസ്ഥാന ജനറല്‍ സെക്രട്ടറി കെ. സുരേന്ദ്രന്‍ വല്ലാത്ത നിരാശയിലാണ്. കേവലം സ്റ്റേഷന്‍ ജാമ്യത്തില്‍ പുറത്തിറങ്ങേണ്ട സുരേന്ദ്രനുമേല്‍ കേസുകളുടെ പെരുമഴയാണ്. ജയിലില്‍നിന്ന് ഉടനൊന്നും സുരേന്ദ്രനെ പുറത്തിറക്കരുതെന്ന് പോലീസിനു രഹസ്യ നിര്‍ദേശം. ഓരോ കേസിലും ജാമ്യം ലഭിക്കുന്ന മുറയ്ക്ക് അടുത്ത കേസ് കോടതിയിലെത്തിക്കാനാണു നീക്കം. ചുരുങ്ങിയപക്ഷം, മണ്ഡലകാലം തീരുന്നതുവരെയെങ്കിലും സുരേന്ദ്രനെ പുറത്തിറക്കാതിരിക്കുകയാണു ലക്ഷ്യം. അതേസമയം സുരേന്ദ്രന്റെ കുടുംബം വല്ലാത്ത സങ്കടത്തിലാണ്. ശബരിമലയിലേക്ക് പോയ ഭര്‍ത്താവിനെ കാത്തിരിക്കാന്‍ തുടങ്ങിയിട്ട് ആഴ്ച കഴിഞ്ഞു. ആരും ഈ കുടുംബത്തിന്റെ വേദന കാണുന്നില്ല. 

സുരേന്ദ്രന്‍ പങ്കെടുത്തതും നേതൃത്വം നല്‍കിയതുമായ മുഴുവന്‍ സമരങ്ങളുടെയും വിശദവിവരങ്ങള്‍ എല്ലാ പോലീസ് സ്‌റ്റേഷനില്‍നിന്നും ശേഖരിക്കുകയാണ്. പോലീസിലെ സി.പി.എം. അനുഭാവികളാണ് ഇതു സംബന്ധിച്ച കാര്യങ്ങള്‍ മുന്നോട്ടുനീക്കുന്നത്. ഈ സമരങ്ങള്‍ക്കിടെ പൊതുമുതല്‍ നശിപ്പിക്കപ്പെട്ടിട്ടുണ്ടെങ്കില്‍ സമരത്തിനു നേതൃത്വം നല്‍കിയ ആളെന്നു മുദ്രകുത്തി ജാമ്യമില്ലാ വകുപ്പ് ചുമത്താനാണു പോലീസിനു കിട്ടിയിരിക്കുന്ന നിര്‍ദേശം. ജയിലില്‍ കിടക്കുന്ന സുരേന്ദ്രന് അനുകൂലമായ വികാരമുണ്ടാകുന്നതു തടയാനായി സി.പി.എമ്മിന്റെ െസെബര്‍ പോരാളികളെയും സജീവമാക്കിയിട്ടുണ്ട്. ഇരുമുടിക്കെട്ടുമായി ശബരിമലയിലേക്കുള്ള യാത്രയ്ക്കിടെ, ക്രമസമാധാന പ്രശ്‌നമുണ്ടാക്കുമെന്ന പേരില്‍ നിലയ്ക്കലില്‍നിന്ന് അറസ്റ്റ് ചെയ്ത് ജുഡീഷ്യല്‍ കസ്റ്റഡിയിലായ കെ. സുരേന്ദ്രന്റെ റിമാന്‍ഡ് വിവിധ കേസുകള്‍ ഉയര്‍ത്തിക്കൊണ്ടുവന്നു നീട്ടുകയാണ്. 

സുരേന്ദ്രനു യാതൊരു ബന്ധവുമില്ലാത്ത കേസുകള്‍ പോലും കുറ്റപത്രമാക്കി കോടതിയിലെത്തിച്ചതു പോലീസിനെ വെട്ടിലാക്കിയിരുന്നു. കുറ്റപത്രം തിരുത്തേണ്ട സാഹചര്യവുമുണ്ടായി. അതിനിടെ, സുരേന്ദ്രന്‍ ജയിലിലായിട്ടും കേന്ദ്ര, സംസ്ഥാന നേതൃത്വം ഇടപെടാത്തതു ബി.ജെ.പിക്കുള്ളില്‍ അമര്‍ഷത്തിന് ഇടയാക്കിയിട്ടുണ്ട്. ഇതു മറനീക്കിയാല്‍ ശബരിമല പ്രക്ഷോഭത്തില്‍നിന്നു ബി.ജെ.പിയുടെ ശ്രദ്ധ മാറുമെന്ന പ്രതീക്ഷയും സര്‍ക്കാരിനും സി.പി.എമ്മിനുമുണ്ട്. കണ്ണൂരില്‍ എസ്.പി. ഓഫീസ് മാര്‍ച്ചിനിടെ പോലീസ് ഉദ്യോഗസ്ഥരെ ഭീഷണിപ്പെടുത്തിയെന്ന കേസില്‍ പ്രൊഡക്ഷന്‍ വാറന്റ് നിലനില്‍ക്കുന്നതിനാല്‍ ഇന്നലെ സുരേന്ദ്രനെ കണ്ണൂരിലേക്ക് കൊണ്ടുപോയിരുന്നു. ഇന്ന് രാവിലെ കോടതിയില്‍ ഹാജരാക്കും. ഉടന്‍ ജാമ്യം കിട്ടിയാലും പുതിയ കേസില്‍ കുടുക്കാനാണ് ശ്രമം.