സോഫ്റ്റ്വെയര് എന്ജിനീയറുടെ മൃതദേഹം ഫാം ഹൗസിലെ നീന്തല്ക്കുളത്തില്
സുഹൃത്തുക്കളോടൊപ്പം വാരാന്ത്യ പാര്ട്ടിയില് പങ്കെടുക്കാനെത്തിയ 27 കാരനായ സോഫ്റ്റ്വെയര് എന്ജിനീയറെ ദുരൂഹ സാഹചര്യത്തില് മരിച്ച നിലയില് കണ്ടെത്തി. തെലങ്കാനയിലെ യാദാദ്രി ഭുവനഗിരി ജില്ലയിലുള്ള ഫാംഹൗസിലാണ് മഞ്ചേരില് ജില്ല സ്വദേശിയായ ഗാന്ഡ്ല രാമു ആണ് മരിച്ചത്. സംഭവത്തില് ചൗട്ടുപ്പല് പൊലീസ് കൊലപാതകത്തിനു കേസെടുത്ത് അന്വേഷണം ആരംഭിച്ചു.
ഹൈദരാബാദിലെ രാമന്തപുരിലുള്ള ഒരു സോഫ്റ്റ്വെയര് കമ്പനിയിലെ ജീവനക്കാരനായിരുന്നു രാമു. ടീം ലീഡറും സഹപ്രവര്ത്തകരുമടങ്ങുന്ന 15 ഓളം പേരടങ്ങുന്ന സംഘത്തോടൊപ്പമാണ് രാമു വാരാന്ത്യം ആഘോഷിക്കാന് ഫാംഹൗസില് എത്തിയത്. ശനിയാഴ്ച വൈകിട്ടോടെ ആരംഭിച്ച പാര്ട്ടി രാത്രി വൈകിയും തുടര്ന്നിരുന്നു. എന്നാല് അര്ധരാത്രിക്ക് ശേഷം ഫാംഹൗസിലെ നീന്തല്ക്കുളത്തില് രാമുവിനെ അബോധാവസ്ഥയില് കണ്ടെത്തുകയായിരുന്നു. ഉടന് സഹപ്രവര്ത്തകര് ആശുപത്രിയില് എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.
വിവരമറിഞ്ഞ് സ്ഥലത്തെത്തിയ ചൗട്ടുപ്പല് പൊലീസ് മൃതദേഹം പോസ്റ്റ്മോര്ട്ടത്തിനായി മാറ്റി. പ്രാഥമിക പരിശോധനയില് രാമുവിന്റെ ശരീരത്തില് ചില പരുക്കുകള് കണ്ടെത്തിയതാണ് വിവരം. ഫാംഹൗസില് സിസിടിവി ക്യാമറകള് സ്ഥാപിക്കാതിരുന്നത് കൃത്യമായ വിവരങ്ങള് ശേഖരിക്കുന്നതിനു പൊലീസിനു തടസ്സമാകുന്നുണ്ട്. മകന്റേത് കൊലപാതകമാണെന്ന് ആരോപിച്ച് രാമുവിന്റെ പിതാവ് ജി. അഞ്ജയ്യ നല്കിയ പരാതിയുടെ അടിസ്ഥാനത്തിലാണ് പൊലീസ് കേസെടുത്തിരിക്കുന്നത്. പാര്ട്ടിയില് പങ്കെടുത്ത മുഴുവന് യുവാക്കളെയും പൊലീസ് ചോദ്യം ചെയ്തു വരികയാണ്. സംഭവത്തില് ഫൊറന്സിക്, പോസ്റ്റ്മോര്ട്ടം റിപ്പോര്ട്ടുകള്ക്കായി കാത്തിരിക്കുകയാണ് പൊലീസ്.
https://www.facebook.com/Malayalivartha
