സംസ്ഥാനത്ത് ഷിഗെല്ല രോഗബാധയെ തുടര്ന്ന് ഒരു മരണം കൂടി
സംസ്ഥാനത്ത് ഷിഗെല്ല രോഗബാധയെ തുടര്ന്ന് ഏഴുവയസ്സുകാരന് മരിച്ചു. മലപ്പുറം പൂക്കോട്ടൂര് സ്വദേശിയായ ഏഴു വയസ്സുകാരനാണ് കോഴിക്കോട് മെഡിക്കല് കോളജ് ആശുപത്രിയിലെ തീവ്രപരിചരണ വിഭാഗത്തില് ചികിത്സയിലിരിക്കെ മരിച്ചത്. മലപ്പുറം എയുപി സ്കൂളിലെ രണ്ടാം ക്ലാസ് വിദ്യാര്ഥി ആര്ജവ് ആണ് തിങ്കളാഴ്ച മരിച്ചത്. സംസ്ഥാനത്ത് ഈ വര്ഷം ഷിഗെല്ല രോഗബാധയെ തുടര്ന്ന് റിപ്പോര്ട്ട് ചെയ്യുന്ന നാലാമത്തെ മരണമാണിത്.
ഇക്കഴിഞ്ഞ വെള്ളിയാഴ്ചയാണ് ആര്ജവിനെ പനി, കടുത്ത വയറിളക്കം തുടങ്ങിയ ലക്ഷണങ്ങളോടെ കോഴിക്കോട് മെഡിക്കല് കോളജ് ആശുപത്രിയില് പ്രവേശിപ്പിച്ചത്. ചികിത്സയിലിരിക്കെ കുട്ടിയുടെ ആരോഗ്യനില പെട്ടെന്ന് വഷളാവുകയും രാവിലെ മരണം സംഭവിക്കുകയുമായിരുന്നു. കോഴിക്കോട് മെഡിക്കല് കോളജ് ആശുപത്രിയിലെ തീവ്രപരിചരണ വിഭാഗത്തില് ഷിഗെല്ല രോഗം ബാധിച്ച് ചികിത്സയിലുള്ള ഒരു വയസ്സുകാരന്റെ ആരോഗ്യനിലയും ഗുരുതരമായി തുടരുകയാണ്.
എഴു വയസ്സുകാരന് ഷിഗെല്ല രോഗം ബാധിച്ച് മരിച്ച പശ്ചാത്തലത്തില് വരും ദിവസങ്ങളില് മലപ്പുറം ജില്ലയിലുടനീളം കര്ശനമായ പരിശോധനകള് തുടരുമെന്ന് ഭക്ഷ്യസുരക്ഷാ വകുപ്പ് ഉദ്യോഗസ്ഥര് വ്യക്തമാക്കി. ഈ മാസം ഒന്പതിന് മലപ്പുറം പെരിന്തല്മണ്ണ കീഴാറ്റൂര് സ്വദേശി സരോജിനി(59), ജൂണ് ആറിന് കോഴിക്കോട് വള്ളില്കടവ് സ്വദേശി നിള(4), മാര്ച്ച് മാസത്തില് കോഴിക്കോട് പെരുവയല് കുറ്റിക്കാട്ടൂര് ആനക്കുഴിക്കരയിലെ മൂന്നു വയസ്സുകാരി എന്നിവരാണ് ഈ വര്ഷം ഇതുവരെ ഷിഗെല്ല രോഗം ബാധിച്ചു മരിച്ചത്.
ജനുവരി മുതല് ഇതുവരെ സംസ്ഥാനത്ത് 135 പേര്ക്കാണ് ഷിഗെല്ല രോഗം സ്ഥിരീകരിച്ചത്. ഇതില് 68 പേര്ക്കും രോഗം റിപ്പോര്ട്ട് ചെയ്തത് കോഴിക്കോട് ജില്ലയിലാണ്. ഷിഗെല്ല ബാക്ടീരിയയുടെ സാന്നിധ്യം കണ്ടെത്തിയതിനെ തുടര്ന്ന് മലപ്പുറം തിരൂരങ്ങാടിയിലെ ഒരു ഇളനീര് പാര്ലര് ഭക്ഷ്യസുരക്ഷാ വകുപ്പ് അധികൃതര് കഴിഞ്ഞ ദിവസം അടപ്പിച്ചിരുന്നു. രണ്ടാഴ്ച മുന്പ് ഭക്ഷ്യസുരക്ഷാ വകുപ്പിന്റെ സ്പെഷല് സ്ക്വാഡ് ഈ കടയില് നിന്ന് ശേഖരിച്ച വെള്ളത്തിന്റെ സാംപിള് പരിശോധിച്ചപ്പോള് അപകടകരമായ രീതിയില് ബാക്ടീരിയയുടെ സാന്നിധ്യം കണ്ടെത്തിയതോടെയാണ് ഇളനീര് പാര്ലര് അധികൃതര് അടപ്പിച്ചത്.
https://www.facebook.com/Malayalivartha
