തിരുവിതാംകൂര്‍ ദേവസ്വം ബോര്‍ഡിന്റെ അഹങ്കാരത്തിന് ഭക്തര്‍ കൂച്ചുവിലങ്ങിട്ടു. ശബരിമലയിലെ വരുമാനക്കുറവ് ദേവസ്വം ബോര്‍ഡിനെ വന്‍ പ്രതിസന്ധിയിലാക്കുകയാണ്. 201718ല്‍ ശബരിമലയില്‍ നിന്നുള്‍പ്പെടെ ബോര്‍ഡിന്റെ ആകെ വരുമാനം 682 കോടി രൂപയാണ്. പെന്‍ഷന്‍ സ്ഥിരനിക്ഷേപ വിഹിതം നീക്കിവെച്ചത് ഉള്‍പ്പെടെ ചെലവ് 677 കോടി. ശബരിമലയിലെ ഇപ്പോഴത്തെ വരുമാനക്കുറവ് ബോര്‍ഡിന്റെ സാമ്പത്തികസ്ഥിതി ഗുരുതരമാക്കും.

അതേസമയം ശബരിമലയില്‍ ദേവസ്വം ബോര്‍ഡും സര്‍ക്കാരും തുടരുന്ന നിയന്ത്രണങ്ങളില്‍ പ്രതിഷേധിക്കുന്നവര്‍ ക്ഷേത്രങ്ങളില്‍ കാണിക്കയിടാന്‍ പ്രത്യേകം നോട്ടുകള്‍ ഉപയോഗിക്കുന്നുവെന്നും റിപ്പോര്‍ട്ടുണ്ട്. യഥാര്‍ത്ഥ നോട്ടുകളുടെ അതേ മാതൃകയിലുള്ള കളിനോട്ടില്‍ സ്വാമിയേ ശരണമയ്യപ്പാ എന്നെഴുതുകയും അയ്യപ്പന്റെ രൂപം അച്ചടിച്ചിട്ടുമുണ്ട്. സന്നിധാനത്തും ദേവസ്വം ബോര്‍ഡിന്റെ വിവിധ ക്ഷേത്രങ്ങളിലും കാണിക്കയായി പ്രതിഷേധംക്കാരുടെ ഈ നോട്ടും വീഴുന്നുണ്ട്.

ശബരിമല നടതുറന്നശേഷം ഇതുവരെയുള്ള ആകെ വരുമാനത്തിന്റെ കൃത്യമായ കണക്ക് പുറത്തുവന്നിട്ടില്ല. ആദ്യ ആറു ദിവസത്തെ വരുമാനത്തില്‍ കഴിഞ്ഞ വര്‍ഷത്തേക്കാള്‍ 14.34 കോടി കുറവുണ്ട്.

ഓരോ മാസവും ചെലവിനുശേഷമുള്ള തുകയുടെ വിഹിതം ജീവനക്കാരുടെ പെന്‍ഷന്‍ സ്ഥിരനിക്ഷേപത്തിലേക്ക് മാറ്റാറുണ്ട്. നാലുമാസമായി തുക നിക്ഷേപിക്കുന്നില്ലെന്നാണ് വിവരം. ശബരിമല വിഷയങ്ങള്‍ക്കുമുമ്പേ ബോര്‍ഡ് സാമ്പത്തിക പ്രതിസന്ധിയിലേക്ക് നീങ്ങിയെന്നര്‍ഥം.

ഇപ്പോഴത്തെനിലയില്‍ ജീവനക്കാരുടെ ശമ്പളവിതരണം പ്രതിസന്ധിയിലാകും. പെന്‍ഷന്‍ ഫണ്ടില്‍ തുകയുള്ളതിനാല്‍ മൂന്നോ നാലോ വര്‍ഷത്തേക്ക് പെന്‍ഷനെ ബാധിക്കില്ല. എന്നാല്‍, നിക്ഷേപവിഹിതം മുടങ്ങിയത് ഭാവിയില്‍ പ്രതിസന്ധിയുണ്ടാക്കും.

തിരുവിതാംകൂര്‍ ദേവസ്വം ബോര്‍ഡിനുകീഴില്‍ 20 ഗ്രൂപ്പുകളിലായി 1253 ക്ഷേത്രങ്ങളുണ്ട്. സാമ്പത്തികമായി മെച്ചപ്പെട്ടത് 6064 എണ്ണം.

കഴിഞ്ഞകൊല്ലത്തെ വരുമാനത്തില്‍ ശബരിമലയിലെ വരവ് 330.43 കോടി. ഇതില്‍ 75 കോടി ശബരിമലയില്‍ത്തന്നെ ചെലവഴിച്ചു. ബാക്കി തുകയുടെ വിഹിതം വരുമാനമില്ലാത്ത ക്ഷേത്രങ്ങള്‍ക്കായി നീക്കിവെക്കണം. ശബരിമല തീര്‍ഥാടനകാലത്ത് വാട്ടര്‍ അതോറിറ്റി, കെ.എസ്.ഇ.ബി. സേവനങ്ങള്‍ക്ക് പണം നല്‍കണം. വാട്ടര്‍അതോറിറ്റിക്ക് നിലവില്‍ കോടികളുടെ കുടിശ്ശികയുണ്ട്. മറ്റ് സര്‍ക്കാര്‍ വകുപ്പ് ജീവനക്കാരുടെ താമസഭക്ഷണച്ചെലവും ബോര്‍ഡ് വഹിക്കണം. അരവണയുണ്ടാക്കാനും ഭാരിച്ച ചെലവാണ്.

താത്കാലികക്കാര്‍ ഉള്‍പ്പെടെ 5250ഓളം ജീവനക്കാര്‍ക്ക് ശമ്പളത്തിനുമാത്രം മാസം വേണ്ടത് ശരാശരി 30 കോടി. ബോണസുള്‍പ്പെടെ 65 കോടി.

ആകെ പെന്‍ഷന്‍കാര്‍ 4665. (ക്ഷേത്രജീവനക്കാര്‍ 3200, മറ്റ് ജീവനക്കാര്‍ 1465). പെന്‍ഷന് ഒരുവര്‍ഷം വേണ്ടത് 105 കോടി രൂപ.

ശബരിമലയിലേക്ക് തീര്‍ഥാടകവരവ് കുറഞ്ഞത് അവിടുത്തെ വരുമാനത്തെ മാത്രമല്ല, മറ്റ് ക്ഷേത്രങ്ങളേയും ബാധിക്കും. മാല, കാവികറുപ്പ് വസ്ത്രങ്ങള്‍ തുടങ്ങിവയുടെ കച്ചവടം, മറ്റു വ്യാപാര മേഖലകള്‍ എന്നിവയ്ക്കും പ്രതികൂലമായി. ട്രാവല്‍ ഏജന്‍സികളുടെ ബുക്കിങ്ങുകള്‍ റദ്ദായത് ഗതാഗത മേഖലയേയും ക്ഷീണിപ്പിച്ചു. കെ.എസ്.ആര്‍.ടി.സി.യുടെ വരുമാനവും ഇടിഞ്ഞു.

വരുമാനക്കുറവ് ജീവനക്കാരുടെ പെന്‍ഷനെ ഉടന്‍ ബാധിക്കില്ല. സ്ഥിരനിക്ഷേപത്തില്‍ തുകയുണ്ട്. കൂടുതല്‍ കരുതല്‍ ആവശ്യമാണ്. ഇപ്പോഴത്തെ പ്രതിസന്ധി പരിഹരിക്കാവുന്നതേയുള്ളു. ആശങ്ക വേണ്ടെന്നാണ് വിലയിരുത്തല്‍. പക്ഷെ ഇതെത്രനാളെന്ന് അറിയില്ല...