കണ്ണൂര്‍ അഴീക്കോട് എം.എല്‍.എയുടെ നിയമസഭാംഗത്വം ഇല്ലാതായിതായി നിയമസഭാ സെക്രട്ടറി അറിയിച്ചു. ഷാജിയെ ഹൈക്കോടതി അയോഗ്യനാക്കിയ വിധി സുപ്രീംകോടതി സ്‌റ്റേ ചെയ്യാത്തതിനെ തുടര്‍ന്ന് ഈമാസം 24 മുതല്‍ അംഗത്വം നിലനില്‍ക്കില്ലെന്നാണ് അറിയിപ്പ്. നാളെ നിയമസഭാ സമ്മേളനം തുടങ്ങാനിരിക്കെയാണ് ഇടിത്തീ പോലെ നടപടി വന്നത്. ഷാജിക്ക് നിയമസഭാ നടപടിക്രമങ്ങളില്‍ പങ്കെടുക്കാമെന്നും അലവന്‍സും മറ്റ് ആനുകൂല്യങ്ങളും ലഭിക്കില്ലെന്നും സുപ്രീംകോടതി വാക്കാല്‍ പരാമര്‍ശനം നടത്തിയെങ്കിലും അത് പോരാ എന്ന നിലപാടിലായിരുന്നു സ്പീക്കര്‍. കോടതി ഉത്തരവില്ലാതെ നിയമസഭയില്‍ പങ്കെടുക്കാനാവില്ലെന്നും സ്പീക്കര്‍ പി.ശ്രീരാമകൃഷ്ണന്‍ വ്യക്തമാക്കിയിരുന്നു. സുപ്രീംകോടതിയില്‍ കേസ് നാളെ ലിസ്റ്റ് ചെയ്യിക്കാന്‍ അഭിഭാഷകര്‍ ശ്രമം തുടങ്ങി.

കെ.എം.ഷാജിയെ ഹൈക്കോടതി സിംഗിള്‍ ബെഞ്ച് അയോഗ്യനാക്കിയ ഉത്തരവ് മണിക്കൂറുകള്‍ക്കകം ഡിവിഷന്‍ ബെഞ്ച് സ്‌റ്റേ ചെയ്തിരുന്നു. വിധിക്കെതിരെ സുപ്രീംകോടതിയെ സമീപിക്കുന്നതിനാണ് സ്‌റ്റേ ലഭിച്ചത്. എന്നാല്‍ സുപ്രീംകോടതിയെ സമീപിച്ചെങ്കിലും സ്റ്റേ അനുവദിച്ചില്ല. ഇത്തരം കേസുകളില്‍ കോടതികള്‍ പലപ്പോഴും പല നിലപാടുകളാണ് സ്വീകരിച്ചിട്ടുള്ളത്. അത് നിയമവിദഗ്ധരെ തന്നെ ആശയക്കുഴപ്പത്തിലാക്കിയിട്ടുണ്ട്. 

വര്‍ഗീയപ്രചരണം നടത്തി തെരഞ്ഞെടുപ്പില്‍ വിജയിച്ചെന്ന് കണ്ടെത്തിയതിനെ തുടര്‍ന്നാണ് കെ.എം ഷാജിയെ ഹൈക്കോടതി ഈമാസം ഒന്‍പതിന് അയോഗ്യനാക്കിയത്. എതിര്‍സ്ഥാനാര്‍ത്ഥിയായ എം.വി നികേഷ് കുമാര്‍ നല്‍കിയ പരാതിയിലായിരുന്നു തീരുമാനം. കെ.എം ഷാജിയെ ആറ് വര്‍ഷത്തേക്കാണ് അയോഗ്യനാക്കിയത്. മുസ്്‌ലിംമായ തനിക്ക് വോട്ട് ചെയ്യണമെന്നും അമുസ്്‌ലിമായ നികേഷിന് വോട്ട് ചെയ്യരുതെന്നും കാട്ടി മുസ്്‌ലിംവീടുകളില്‍ ലഘുലേഖകള്‍ വിതരണം ചെയ്തിരുന്നു. ഇതിന്റെ പകര്‍പ്പ് സഹിതമാണ് നികേഷ്‌കുമാര്‍ പരാതി നല്‍കിയത്. അതേസമയം പരാതിക്കാരനായ തന്നെ വിജയിയാക്കി പ്രഖ്യാപിക്കണമെന്ന നികേഷിന്റെ ആവശ്യം ഹൈക്കോടതി അംഗീകരിച്ചില്ല.