ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രനെ ശബരിമല അക്രമങ്ങളുടെ പശ്ചാത്തലത്തില്‍ അറസ്റ്റ് ചെയ്ത് ജയിലിടച്ചതും ജാമ്യം കിട്ടുമെന്ന് ഉറപ്പായപ്പോള്‍ പഴയതും പുതിയതുമായ കേസുകളില്‍ കുരുക്കിയതും വ്യക്തമായ രാഷ്ട്രീയലക്ഷ്യത്തോടെയെന്ന് രാഷ്ട്രീയ നിരീക്ഷകര്‍. സുരേന്ദ്രനെ തകര്‍ക്കാനാണ് മുഖ്യമന്ത്രിയുടെ ഓഫീസും സി.പി.എമ്മും ശ്രമിക്കുന്നതെന്ന് ബി.ജെ.പി ആരോപിക്കുമ്പോഴും അത് മാത്രമല്ല, അതിനപ്പുറമാണ് കളിയെന്നാണ് സൂചന. ശബരിമലയില്‍ സുരേന്ദ്രന്റെ നേതൃത്വത്തില്‍ അക്രമസംഭവങ്ങള്‍ ഉണ്ടാകാതിരിക്കാനാണെങ്കില്‍ കോടതി തന്നെ അതിന് തടയിട്ടിരിക്കുകയാണ്. കാരണം രണ്ട് മാസത്തേക്ക് റാന്നി താലൂക്കില്‍ കടക്കരുതെന്ന് കോടതി നല്‍കിയ നിര്‍ദ്ദേശം പാലിച്ച ശേഷമാണ് സുരേന്ദ്രന് ജാമ്യം അനുവദിച്ചത്.

അതിന് ശേഷമാണ് കണ്ണൂരില്‍ ഡിവൈഎസ്.പിയെ ഭീഷണിപ്പെടുത്തിയ കേസ് സര്‍ക്കാര്‍ പൊടിതട്ടിയെടുത്തത്. അതിലും കാര്യങ്ങള്‍ നില്‍ക്കില്ലെന്ന് മനസിലായപ്പോള്‍ ചിത്തിര ആട്ടവിശേഷത്തിന് ലളിത എന്ന സ്ത്രീയെ ആക്രമിച്ച സംവത്തിന്റെ ഗൂഢാലോചന കേസ് രണ്ടാഴ്ചയ്ക്ക് ശേഷം രജിസ്റ്റര്‍ ചെയ്തു. ആ കേസില്‍ ജാമ്യം ലഭിച്ചിട്ടില്ല. തുരുതുരെ കേസുകളില്‍ കുടുക്കിയത് സി.പി.എമ്മിന്റെ രാഷ്ട്രീയ തന്ത്രമാണെന്ന് വ്യക്തമാണ്. അത് മഞ്ചേശ്വരം ഉപതെരഞ്ഞെടുപ്പ് കൂടി ലക്ഷ്യംവെച്ചുള്ള കളിയാണ്. എം.എല്‍.എ ആയിരുന്ന പി.ബി അബ്ദുള്‍ റസാഖ് മരിച്ചതോടെ മഞ്ചേശ്വരത്ത് ഉപതെരഞ്ഞെടുപ്പിന് കളമൊരുങ്ങിയിരിക്കുകയാണ്. എന്നാല്‍ കഴിഞ്ഞ നിയമസഭാ തെരഞ്ഞെടുപ്പ് ക്രമക്കേട് സംബന്ധിച്ച് കെ.സുരേന്ദ്രന്‍ ഹൈക്കോടതിയില്‍ കേസ് നല്‍കിയിട്ടുണ്ട്. അബ്ദുള്‍ റസാഖ് മരിച്ചതോടെ കേസ് തുടരണോ എന്ന് കോടതി ചോദിച്ചെങ്കിലും പിന്‍വലിക്കാന്‍ ബി.ജെ.പി തയ്യാറായില്ല.

81 വോട്ടുകള്‍ക്കാണ് സുരേന്ദ്രന്‍ അന്ന് പരാജയപ്പെട്ടത്. സുരേന്ദ്രന്റെ അപരനെ കളത്തിലിറക്കിയാണ് തോല്‍പ്പിച്ചത്. മാത്രമല്ല വ്യാപകമായി കള്ളവോട്ടും നടന്നു. അതിന്റെ തെളിവുകള്‍ ശേഖരിച്ചാണ് സുരേന്ദ്രന്‍ ഹൈക്കോടതിയില്‍ കേസ് നല്‍കിയത്. പ്രവാസികളുടെ ഐഡന്റികാര്‍ഡും മറ്റും ഉയോഗിച്ചാണ് പലരും വോട്ട് ചെയ്തതെന്നാണ് സുരേന്ദ്രന്റെ പരാതി. കേസില്‍ സുരേന്ദ്രന് അനുകൂല വിധി ഉണ്ടായാല്‍ എം.എല്‍.എ ആകും. ഉപതെരഞ്ഞെടുപ്പ് നടന്നാലും സുരേന്ദ്രന്റെ വിജയം ഏതാണ്ട് ഉറപ്പാണ്. അതിന് തടയിടുകയാണ് സി.പി.എമ്മിന്റെ കളി.