കെ.സുരേന്ദ്രനെതിരായ എട്ട് കേസുകള് 2016ന് മുമ്പ് പോലീസ് ചാര്ജ് ചെയ്തതാണെന്ന് മുഖ്യമന്ത്രി നിയമസഭയെ അറിയിച്ചു, മൂന്ന് കേസുകള് അന്വേഷണ ഘട്ടത്തിലും മറ്റുള്ളവ കോടതികളില് വിചാരണയുടെ വിവിധ ഘട്ടങ്ങളിലുമാണെന്നും മുഖ്യമന്ത്രി വ്യക്തമാക്കി
കെ.സുരേന്ദ്രനെതിരെ സി.പി.എം കുടുക്കിയത് 15 കേസുകളില്. അന്യായമായി സംഘം ചേരുന്നതിന് നേതൃത്വം നല്കിയതിനും ഉള്പ്പെട്ടതിനും, ഇവയില് ചിലതില് അക്രമപ്രവര്ത്തനങ്ങളില് ഏര്പ്പെട്ടതിനും പൊതുമുതല് നശിപ്പിച്ചതിനും ഗതാഗത തടസ്സം സൃഷ്ടിച്ചതിനും നിരോധനാജ്ഞ ലംഘിച്ചതിനും ഉള്പ്പെടെ 15 കേസുകളാണ് സുരേന്ദ്രനെതിരെ നിലവിലുള്ളതെന്ന് മുഖ്യമന്ത്രി നിയമസഭയെ അറിയിച്ചു. അതില് എട്ട് കേസുകള് 2016ന് മുമ്പ് പോലീസ് ചാര്ജ് ചെയ്തവയാണ്. മൂന്ന് കേസുകള് അന്വേഷണ ഘട്ടത്തിലും മറ്റുള്ളവ കോടതികളില് വിചാരണയുടെ വിവിധ ഘട്ടങ്ങളിലുമാണ്.
ശബരിമലയിലെ ചിത്തിര ആട്ടവിശേഷത്തിന് നടതുറന്നപ്പോള് നിരോധനാജ്ഞ നിലനില്ക്കുന്നുണ്ടായിരുന്നു. പേരക്കുട്ടിക്ക് ചോറൂണ് നല്കാനും ശബരിമല ദര്ശനത്തിനുമായി 52 വയസ്സ് പ്രായമുള്ള ലളിത എത്തിയിരുന്നു. ഇവരെ സന്നിധാനം നടപ്പന്തലില് വച്ച് തടയുന്ന സ്ഥിതിയുണ്ടായി. സുരേന്ദ്രന്റെ നേതൃത്വത്തില് പ്രതിഷേധക്കാര് സംഘടിച്ച് അന്യായമായി ഇവരെ തടഞ്ഞ് ദേഹോപദ്രവമേല്പ്പിച്ചതിനും മാനഹാനി വരുത്തുന്ന രീതിയിലുള്ള അക്രമപ്രവര്ത്തനങ്ങള് നടത്തിയതിനും അവരുടെ ബന്ധുവിനെ മര്ദ്ദിച്ച് അവശനാക്കിയതിനും ബന്ധുവിന്റെ പരാതിയും ഉണ്ടായിരുന്നു. ഇതിന്റെ അടിസ്ഥാനത്തില് സന്നിധാനം പോലീസ് സ്റ്റേഷന്നില് 13ാം പ്രതിയായി കേസെടുത്തു.
പോലീസിന്റെ കൃത്യനിര്വ്വഹണം തടസ്സപ്പെടുത്തിയതിന് നിലയ്ക്കല് പോലീസ് സ്റ്റേഷന് ഒന്നാം പ്രതിയായും, ഹൈക്കോടതി ഉത്തരവ് നിലനില്ക്കേ കുറ്റകരമായി സംഘടിച്ച കാര്യത്തിനും മറ്റും നെടുമ്പാശ്ശേരി പോലീസ് സ്റ്റേഷന് രണ്ടാം പ്രതിയായും കേസുകള് രജിസ്റ്റര് ചെയ്ത് നിയമനടപടികള് സ്വീകരിച്ചുവരുന്നുണ്ട്. നിയമനടപടിക്ക് വിധേയനാവാതെയും സമയത്തിന് കോടതികളില് ഹാജരായി ജാമ്യം ലഭിക്കാത്തതുമായ വിവിധ കേസുകള് സംസ്ഥാനത്ത് ഉണ്ടായിരുന്നു.
ഇക്കാരണത്താല് നെയ്യാറ്റിന്കര മജിസ്ട്രേറ്റ് കോടതി, കണ്ണൂര് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി, കോഴിക്കോട് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി എന്നീ കോടതികള് വാറണ്ടുകള് പുറപ്പെടുവിച്ചിട്ടുണ്ടായിരുന്നു. വാറണ്ടുകളുടെ അടിസ്ഥാനത്തിലാണ് കോടതികളില് ഹാജരാക്കേണ്ടിവന്നത്. ഈ വാറണ്ടു കേസുകള്ക്ക് ജാമ്യം ലഭിച്ചെങ്കിലും, സന്നിധാനം പോലീസ് സ്റ്റേഷനില് രജിസ്റ്റര് ചെയ്ത കേസിന് ജാമ്യം ലഭിക്കാത്തതുകൊണ്ടാണ് സുരേന്ദ്രന് ഇപ്പോഴും റിമാന്റില് കഴിയുന്നത്. വസ്തുതകള് ഇതായിരിക്കെ കള്ളക്കേസ് ചുമത്തി പോലീസ് പീഡിപ്പിച്ചു എന്ന ആരോപണം വസ്തുതകള്ക്ക് നിരക്കാത്തതാണെന്ന് ഒ. രാജഗോപാലിന്റെ സബ്മിഷന് മറുപടിയായി മുഖ്യമന്ത്രി പറഞ്ഞു.
സുരേന്ദ്രന് അഴിക്കുള്ളിലായിട്ട് ആഴ്ചകള് കഴിഞ്ഞിട്ടും ഏക ബി.ജെ.പി എം.എല്.എയായ ഒ. രാജഗോപാല് ഇതുവരെ പ്രതികരിച്ചിരുന്നില്ല. പാര്ട്ടിയില് നിന്നും പ്രവര്ത്തകരില് നിന്നും അണികളില് നിന്നും പ്രതിഷേധം ശക്തമായതോടെയാണ് ഇന്നദ്ദേഹം നിയമസഭയില് വിഷയം സബ്മിഷനായി ഉന്നയിച്ചത്. ശബരിമല യുവതീപ്രവേശനത്തിന് രാജഗോപാല് അനുകൂലമാണ് താനും. ബി.ജെ.പി നേതൃത്വം നടത്തുന്ന അക്രമപ്രവര്ത്തനങ്ങളോട് അദ്ദേഹത്തിന് താല്പര്യമില്ലെന്നാണ് അറിയുന്നത്.
https://www.facebook.com/Malayalivartha
