മുഖ്യമന്ത്രിയായി തിരഞ്ഞെടുക്കപ്പെട്ട് സത്യപ്രതിജ്ഞയ്ക്കു ശേഷം പിണറായി വിജയന്‍ നടത്തിയ പ്രസംഗം കേരളത്തിനാകെ പുത്തന്‍ പ്രതീക്ഷകള്‍ പകരുന്നതായിരുന്നു. അതിലൊന്നായിരുന്നു സര്‍ക്കാര്‍ ജീവനക്കാരോട് അവര്‍ക്ക് മുന്‍പിലെത്തുന്ന ഓരോ ഫയലിലും ഓരോ ജീവനുണ്ടെന്നും അത് മറക്കരുതെന്നുമുള്ള വാക്കുകള്‍. എന്നാല്‍ മുഖ്യന്റെ വാക്കുകള്‍ക്ക് സര്‍ക്കാര്‍ ജീവനക്കാര്‍ എന്ത് വിലയാണ് കല്‍പ്പിച്ചതെന്ന് കഴിഞ്ഞ ദിവസം നിയമസഭയില്‍ നിന്നും ലഭിച്ച ഉത്തരത്തില്‍ നിന്നും മനസിലാകും.

സെട്ട്രേറിയറ്റിലെ വിവിധ വകുപ്പുകളിലായി കെട്ടിക്കിടക്കുന്നത് 1,54,781 ഫയലുകള്‍ ഒക്ടോബര്‍ 31 വരെയുള്ള കണക്കാണിത്. നിയമസഭയില്‍ കെ.എസ്. ശബരീനാഥന്റെ ചോദ്യത്തിന് മറുപടിയായി മുഖ്യമന്ത്രി പിണറായി വിജയന്‍ നല്‍കിയതാണ് ഈ കണക്ക്. ഏറ്റവുമധികം ഫയലുകള്‍ കെട്ടിക്കിടക്കുന്നതിന്റെ റെക്കാഡ് തദ്ദേശസ്വയംഭരണ വകുപ്പിലാണ്, 33705 ഫയലുകള്‍.

മറ്റു വകുപ്പുകളും ഫയലുകളും

റവന്യൂ 14,264
ആഭ്യന്തരം 12,620
പൊതുവിദ്യാഭ്യാസം 10,214
ആരോഗ്യ കുടുംബക്ഷേമം 7055
ജലവിഭവം 5212
നികുതി 5076
വ്യവസായം 4750
പൊതുഭരണം 4522
പൊതുമരാമത്ത് 4023
ധനകാര്യം 3691
സഹകരണം 3628
വനംവന്യജീവി 3562
ഉന്നത വിദ്യാഭ്യാസം 3436
സാംസ്‌കാരികം 1642
പിന്നാക്ക സമുദായവികസനം 944
തീരദേശ കപ്പല്‍ഗതാഗതം,
ഉള്‍നാടന്‍ ജലഗതാഗതം 147

തനിക്കു ലഭിച്ച മറുപടി പകര്‍പ്പിന്റെ ഫോട്ടോ സഹിതമാണ് ശബരീനാഥ് ഫെയ്‌സ്ബുക്കില്‍ പങ്കുവെച്ചത്. 'ഓരോ ഫയലിലും ഓരോ ജീവനുണ്ടെന്ന് ബഹു:മുഖ്യമന്ത്രി രണ്ടു വര്‍ഷങ്ങള്‍ക്കുമുമ്പ് പറഞ്ഞിരുന്നു.സെക്രെട്ടറിയേറ്റില്‍ കെട്ടിക്കിടക്കുന്ന ഫയലുകളില്‍ ഉടന്‍ തീര്‍പ്പുകല്പിക്കണമെന്ന് അദ്ദേഹം പറഞ്ഞത് സദുദ്ദേശപരമായിട്ടാണ് തോന്നിയത്. എന്നാല്‍ ഈ വിഷയം നിയമസഭയില്‍ ചോദിച്ചപ്പോള്‍ എനിക്ക് ലഭിച്ച മറുപടി ക്രൂരമാണ്. ഒക്ടോബര്‍ 31ലെ കണക്ക് പ്രകാരം 1,54,781 ഫയലുകള്‍ സെക്രട്ടറിയേറ്റിനുള്ളില്‍ നരകിക്കുകയാണ് എന്നാണ് രേഖകള്‍ പറയുന്നത്. 
ഈ ആത്മാക്കള്‍ക്ക് (ഫയലുകള്‍ക്ക്) നിത്യശാന്തി നേരുന്നു.' എന്ന് ശബരീനാഥ് ഫെയ്‌സ്ബുക്കില്‍ കുറിച്ചു.