കോടിയേരിക്ക് ചുട്ടമറുപടിയുമായി സുകുമാരന് നായര്, എന്.എസ്.എസ് നിരീശ്വരവാദത്തിനെതിരാണ്, രാഷ്ട്രീയത്തിന് അതീതമായി മതേതരനിലപാടാണ് എന്നും സംഘടന സ്വീകരിച്ചിട്ടുള്ളത്, സ്വന്തം വീഴ്ചകള് തിരുത്താനാണ് കോടിയേരി ശ്രമിക്കേണ്ടത്
എന്.എസ്.എസിനും സെക്രട്ടറിക്കുമെതിരെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് ഉന്നയിച്ച ആരോപണങ്ങള്ക്ക് ചുട്ടമറുപടിയുമായി ജി.സുകുമാരന് നായര് രംഗത്ത്. സമുദായം മറ്റാരുടെയും തൊഴുത്തില് ഒതുങ്ങുന്നവരല്ല. അതിന് ശ്രമിച്ചവര് നിരാശരായ ചരിത്രമാണ് ഉള്ളതെന്ന് ഓര്ക്കണമെന്നും. സുകുമാരന് നായര് വാര്ത്താക്കുറിപ്പില് അറിയിച്ചു. എന്.എസ്.എസ് നിരീശ്വരവാദത്തിനെതിരാണ്. രാഷ്ട്രീയത്തിന് അതീതമായി മതേതരനിലപാടാണ് എന്നും സംഘടന സ്വീകരിച്ചിട്ടുള്ളത്. സ്വന്തം വീഴ്ചകള് തിരുത്താനാണ് കോടിയേരി ശ്രമിക്കേണ്ടത്. വിശ്വാസികള്ക്കൊപ്പമാണെന്നും സുകുമാരന് നായര് വ്യക്തമാക്കി.
നായര് സര്വ്വീസ് സൊസൈറ്റി ആര്എസ്എസ് പാളയത്തില് എത്തുമെന്ന് കോടിയേരി പറയുന്നത് അജ്ഞത മൂലമാണെന്നും സുകുമാരന് നായര് പ്രസ്താവനയില് അറിയിച്ചു. ആര്എസ്എസിന്റെ തൊഴുത്തില് എന്.എസ്.എസിനെ കെട്ടാനാണു ചിലര് ശ്രമിക്കുന്നതെന്നാണ് കോടിയേരി കഴിഞ്ഞ ദിവസം ആരോപിച്ചിരുന്നു. യാഥാസ്ഥിതിക നിലപാടാണ് എന്.എസ്.എസ് നേതൃത്വം കൈക്കൊള്ളുന്നതെന്നും ഇത് നിരാശാജനകമാണെന്നും മന്നം ജീവിച്ചിരുന്നെങ്കില് അദ്ദേഹത്തിന്റെ കുടുംബത്തെ വനിതാ മതിലില് പങ്കെടുപ്പിച്ചേനെ എന്നും കോടിയേരി വ്യക്തമാക്കിയിരുന്നു.
സര്ക്കാര് സംഘടിപ്പിക്കുന്ന വനിതാ മതിലില് പങ്കെടുക്കില്ലെന്ന് പറഞ്ഞ എന്എസ്എസ്, ആര്എസ്എസ് സംഘടിപ്പിക്കുന്ന അയ്യപ്പജ്യോതിയില് പങ്കെടുക്കുമെന്ന് അറിയിച്ചത് ആത്മഹത്യാപരമായ നിലപാടാണെന്നും കോടിയേരി കുറ്റപ്പെടുത്തിയിരുന്നു. മന്നത്ത് പത്മനാഭന് മുന്നോട്ടുവെച്ച ആശയമാണു വനിതാ മതിലില് കൂടി കേരളത്തിലെ സ്ത്രീകള് ഉദ്ഘോഷിക്കാന് പോകുന്നതെന്നും കോടിയേരി പറഞ്ഞു.
ശബരിമലയില് യുവതികളെ പ്രവേശിപ്പിക്കാനുള്ള കോടതി ഉത്തരവ് ഏകപക്ഷീയമായി നടപ്പാക്കാനൊരുങ്ങുന്ന മുഖ്യമന്ത്രി പിണറായി വിജയന് ദാര്ഷ്ട്യമാണെന്നും പാര്ട്ടി സെക്രട്ടറിയെ പോലെയാണ് അദ്ദേഹം പെരുമാറുന്നതെന്നും സുകുമാരന് നായര് വിമര്ശിച്ചിരുന്നു. അതിന് മറുപടിയാണ് ഇന്നലെ ആദിവാസി സംഗമത്തില് കോടിയേരി പറഞ്ഞത്.
കഴിഞ്ഞ നിയമസഭാ തെരഞ്ഞെടുപ്പ് മുതല് എന്.എസ്.എസും സി.പി.എമ്മും തമ്മില് അടുത്തബന്ധമായിരുന്നു. ചെങ്ങന്നൂര് ഉപതെരഞ്ഞെടുപ്പിലും അത് ആവര്ത്തിച്ചു. ഇതേ തുടര്ന്ന് ദേവസ്വം ബോര്ഡില് മുന്നോക്കക്കാരിലെ ദരിദ്രര്ക്ക് 10 ശതമാനം സംവരണം നല്കാനും തീരുമാനിച്ചിരുന്നു സര്ക്കാര്. ശബരിമല വിധി വന്നതോടെ എന്.എസ്.എസ് ആണ് ആദ്യമായി എതിര്്പ്പുമായി തെരുവിലിറങ്ങിയത്. അതോടെയാണ് സര്ക്കാരും എന്.എസ്.എസും തമ്മില് അടിച്ച് പിരിഞ്ഞത്.
https://www.facebook.com/Malayalivartha