ശബരിമല ദര്ശനത്തിനെത്തിയ കേന്ദ്രമന്ത്രി പൊന്രാധാകൃഷ്ണനെ അപമാനിച്ച എസ്.പി യതീഷ് ചന്ദ്രയ്ക്കെതിരെ നടപടിയുണ്ടായേക്കും, പാര്ലമെന്റില് എസ്.പിയെ സ്പീക്കര് വിളിച്ചുവരുത്തി വിശദീകരണം തേടിയേക്കും, എസ്.പി മാപ്പ് അപേക്ഷനല്കി തടിയൂരിയേക്കും
ശബരിമല ദര്ശനത്തിനെത്തിയ കേന്ദ്രമന്ത്രി പൊന്രാധാകൃഷ്ണനെ അപമാനിച്ച എസ്.പി യതീഷ് ചന്ദ്രയ്ക്കെതിരെ നടപടിയുണ്ടായേക്കും. ഇത് സംബന്ധിച്ച് പൊന്രാധാകൃഷ്ണന് അവകാശലംഘനത്തിന് സ്പീക്കര് സുമിത്രമഹാജന് പരാതി നല്കി. ദര്ശനത്തിനെത്തിയ തന്നോട് എസ്.പി അപമര്യാദയായി പെരുമാറിയെന്നും അപമാനിച്ചെന്നും നോട്ടീസില് പറയുന്നു. നോട്ടീസ് പരിഗണിക്കാമെന്ന് സ്പീക്കര് സുമിത്രാ മഹാജന് ഉറപ്പ് നല്കി. അതിനാല് നടപടിയുണ്ടാകുമെന്നറിയുന്നു. ഏത് തരത്തിലുള്ള പരാതി നല്കണമെന്ന് പാര്ലമെന്റ് സമ്മേളനം തുടങ്ങിയ ദിവസം മുതല് കേന്ദ്രമന്ത്രി ആലോചിച്ചിരുന്നു. എസ്.പിയുടെ പെരുമാറ്റം മോശമായിരുന്നെന്നും സ്പീക്കര്ക്ക് അദ്ദേഹത്തെ വിളിച്ച് വരുത്തി നടപടി സ്വീകരിക്കാവുന്നതാണെന്നും മുന്രാജ്യസഭാ ഉപാധ്യക്ഷന് പി.ജെകുര്യന് വ്യക്തമാക്കിയിരുന്നു.
ശബരിമല ദര്ശനത്തിനായി നിലയ്ക്കലില് എത്തിയ പൊന്രാധാകൃഷ്ണന്റെ കൂടെ വന്നവരുടെ സ്വകാര്യവാഹനങ്ങള് പമ്പയിലേക്ക് വിടാനാവില്ലെന്ന് എസ്.പി അറിയിച്ചതിനെ മന്ത്രി ചോദ്യം ചെയ്തിരുന്നു. പ്രളയത്തില് പമ്പ തകര്ന്ന് കിടക്കുകയാണെന്നും സ്വകാര്യവാഹനങ്ങള് പോയാല് ട്രാഫിക്ജാം ഉണ്ടാകുമെന്നും എസ്.പി അറിയിച്ചു. അപ്പോള് കെ.എസ്.ആര്.ടി.സി പോകുന്നതിനെ കുറിച്ച് മന്ത്രി ചോദിച്ചു. കെ.എസ്.ആര്.ടി.സി അവിടെ പാര്ക്ക് ചെയ്യുന്നില്ലെന്ന് വ്യക്തമാക്കി. സ്വകാര്യവാഹനങ്ങള് കടത്തിവിടാത്തത് ശരിയല്ലെന്ന് മന്ത്രി പറഞ്ഞു. സാര് ഉത്തരവിട്ടാല് കടത്തിവിടാമെന്നും അവിടെ ഉണ്ടാകുന്ന ഗതാഗതക്കുരുക്ക് ഉള്പ്പെടെയുള്ള കാര്യങ്ങളുടെ ഉത്തരവാദിത്വം ഏറ്റെടുക്കണമെന്നും എസ്.പി പറഞ്ഞു.
ഉത്തരവിടാന് തനിക്ക് അധികാരമില്ലെന്നും ഉത്തരവാദിത്വം ഏറ്റെടുക്കില്ലെന്നും മന്ത്രി അറിയിച്ചു. ഉത്തരവിറക്കാന് അധികാരമുള്ളവര് പറഞ്ഞതാണ് താന് അനുസരിക്കുന്നതെന്ന് എസ്.പി പറഞ്ഞു. അതോടെ മന്ത്രി പൊന്രാധാകൃഷ്ണനൊപ്പം ഉണ്ടായിരുന്ന ബി.ജെ.പി നേതാവ് എ.എന് രാധാകൃഷ്ണന് എസ്.പിയോട് ക്ഷുഭിതനായി. എസ്.പിയുടെ പെരുമാറ്റം വളരെ മോശമായിരുന്നെന്നും കേരളത്തിലെ ഒരു മന്ത്രിയോട് ഇത്തരത്തില് സംസാരിക്കുമോ എന്നും കേന്ദ്രമന്ത്രി മാധ്യമങ്ങളോട് പ്രതികരിച്ചിരുന്നു. മലകയറിയ കേന്ദ്രമന്ത്രി ദേവസ്വംബോര്ഡിന്റെ ആഥിത്യവും സ്വീകരിച്ചില്ല.
രാത്രി രണ്ട് മണിയോടെ അദ്ദേഹവും ഒപ്പം ഉണ്ടായിരുന്ന സ്വകാര്യവാഹനങ്ങളും പമ്പയില് നിന്ന് നിലയ്ക്കലേക്ക് പോയി. അതിനിടെ മന്ത്രിക്കൊപ്പം വന്ന സ്വകാര്യവാഹനം ഏഴ് മിനിറ്റ് വൈകിയാണ് വന്നത്. അതോടെ എസ്.പി ഹരിശങ്കറിന്റെ നേതൃത്വത്തില് ആ വാഹനം തടഞ്ഞു. തന്റെ കൂടെ വന്ന വാഹനം കാണാതെ കേന്ദ്രമന്ത്രി തിരികെയെത്തി. എസ്.പി ഹരിശങ്കറോട് കാര്യങ്ങള് തിരക്കി. ഈ സംഭവവും വിവാദമായിരുന്നു. എന്നാല് മന്ത്രിയെ തടഞ്ഞില്ലെന്ന് തെളിയിക്കുന്ന സി.സി.ടി.വി ദൃശ്യങ്ങള് പൊലീസ് അന്ന് തന്നെ പുറത്ത് വിട്ടു. ദര്ശനത്തിനെത്തിയ ഹിന്ദുഐക്യവേദി നേതാവ് കെ.പി ശശികലയോട് പരുഷമായി പെരുമാറിയ എസ്.പി യതീഷ് ചന്ദ്രയ്ക്കെതിരെ അവരുടെ മകള് മാനനഷ്ടക്കേസ് ഫയല് ചെയ്തിട്ടുണ്ട്.
https://www.facebook.com/Malayalivartha