നൂറനാട് എന്‍എസ്എസ് കരയോഗം ഓഫീസിലെ കൊടിമരത്തില്‍ കരിങ്കൊടി നാട്ടിയ സംഭവത്തില്‍ രണ്ട് ആര്‍എസ്എസ് പ്രവര്‍ത്തകര്‍ അറസ്റ്റില്‍. കുടശനാട് കരയോഗത്തിലെ അംഗങ്ങളും ആര്‍എസ്എസ് പ്രവര്‍ത്തകരുമായ വിക്രമന്‍ നായര്‍, ശ്രീജിത്ത് എന്നിവരാണ് അറസ്റ്റിലായത്. നവംബര്‍ ഏഴ് രാവിലെയാണ് കൊടിമരത്തിലും സമീപത്തെ എന്‍എസ്എസ് സ്‌കൂളിലും കരിങ്കൊടി ഉയര്‍ത്തിയതായി കണ്ടത്. കൊടിമരത്തിനു താഴെ സുകുമാരന്‍നായരുടെ പേരില്‍ റീത്തുമുണ്ടായിരുന്നു. സിസിടിവി ദൃശ്യങ്ങളും ടെലഫോണ്‍ ടവര്‍ ലൊക്കേഷനും പരിശോധിച്ചാണ് പൊലിസ് പ്രതികളെ കണ്ടെത്തിയത്. സംഭവത്തില്‍ മഹേഷ് എന്ന പ്രതി ഒളിവിലാണ്.

തിരുവനന്തപുരം നേമത്തും കൊല്ലത്തും എന്‍.എസ്.എസ് കരയോഗമന്ദിരങ്ങള്‍ക്ക് നേരെ ആക്രമണം നടന്നിരുന്നു. ശബരിമല യുവതീപ്രവേശനത്തെ എന്‍.എസ്.എസ് എതിര്‍ക്കുകയും നാമജപഘോഷയാത്രയും നടത്തിയിരുന്നു. എന്നാല്‍ എന്ത് വില കൊടുത്തും കോടതിവിധി നടപ്പാക്കുമെന്ന നിലപാടിലായിരുന്നു സര്‍ക്കാരും സി.പി.എമ്മും. ഇതേ തുടര്‍ന്നാണ് കരയോഗമന്ദിരങ്ങള്‍ക്ക് നേരെ ആക്രമണം നടന്നത്. ഇതിനെല്ലാം പിന്നില്‍ സി.പി.എമ്മാണെന്ന് വരുത്തിത്തീര്‍ക്കാന്‍ വ്യാപക ശ്രമം നടന്നിരുന്നു. ബി.ജെ.പി, സംഘപരിവാര്‍ പ്രവര്‍ത്തകര്‍ അത്തരത്തില്‍ സോഷ്യല്‍ മീഡിയയില്‍ പ്രചരണം നടത്തിയിരുന്നു. എന്നാല്‍ പൊലീസ് അന്വേഷണം നടത്തിയെങ്കിലും പ്രതികളെ പിടികൂടാന്‍ കഴിഞ്ഞിരുന്നില്ല. നൂറനാട്ടെ ആക്രമണത്തിലെ പ്രതികളെ മൊബൈല്‍ ടവര്‍ കേന്ദ്രീകരിച്ച് നടത്തിയ അന്വേഷണത്തിലാണ് പിടികൂടിയത്.

ശബരിമല വിഷയത്തില്‍ എന്‍.എസ്.എസുമായി സര്‍ക്കാരും സി.പി.എമ്മും കൊമ്പ് കോര്‍ക്കുകയും ചില എന്‍.എസ്.എസ് നേതാക്കള്‍ ബി.ജെ.പിക്കും ആര്‍എസ്.എസിനും അനുകൂലമായ പ്രസ്താവനകള്‍ നടത്തുകയും ചെയ്തിരുന്നു. അത്തരമൊരു അഭിപ്രായഭിന്നത രൂക്ഷമായി നില്‍ക്കുമ്പോഴാണ് കരയോഗം ആക്രമിച്ച രണ്ട് ആര്‍.എസ്.എസുകാര്‍ പിടിയിലായത്.

ഇത് സി.പി.എമ്മിനെ സംബന്ധിച്ചിടത്തോളം രാഷ്ട്രീയ വിജയമാണ്. ശബരിമല ദര്‍ശനത്തിന് പോയ ബി.ജെ.പി നേതാവ് കെ.സുരേന്ദ്രനെയും ഹിന്ദുഐക്യവേദി നേതാവ് കെ.പി ശശികലയേയും അറസ്റ്റ് ചെയ്തത് ശരിയായില്ലെന്ന് എന്‍.എസ്.എസ് വിമര്‍ശനം ഉന്നയിച്ചിരുന്നു. ആര്‍.എസ്.എസ് പ്രവര്‍ത്തകര്‍ സന്നിധാനത്ത് പോയികിടന്ന് അടി കൊണ്ടത് കൊണ്ടാണ് യുവതീപ്രവേശനം നടക്കാതിരുന്നതെന്ന് എന്‍.എസ്.എസ് പ്രസിഡന്റ് നരേന്ദ്രനാഥന്‍ നായര്‍ പറഞ്ഞിരുന്നു. അതിനെല്ലാം തിരിച്ചടിയാണ് നൂറനാട്ടെ അറസ്റ്റ്.