കോടതിയില്ല ആര് പറഞ്ഞാലും കോതമംഗലം ചെറിയപള്ളി വിട്ട് കൊടുക്കില്ലെന്ന കടുത്തനിലപാടില് യാക്കോബായസഭ വിശ്വാസികള്, എന്ത് വിലകൊടുത്തും തങ്ങളുടെ പള്ളി സംരക്ഷിക്കുമെന്നും അവര്
കോടതിയില്ല ആര് പറഞ്ഞാലും കോതമംഗലം ചെറിയപള്ളി വിട്ട് കൊടുക്കില്ലെന്ന കടുത്തനിലപാടിലാണ് യാക്കോബായസഭ വിശ്വാസികള്. എന്ത് വിലകൊടുത്തും തങ്ങളുടെ പള്ളി സംരക്ഷിക്കുമെന്നും അവര് പറയുന്നു. സുപ്രീംകോടതി ഉത്തരവ് പ്രകാരം ചെറിയപള്ളിയില് രാവിലെ പ്രാര്ത്ഥനയ്ക്കെത്തിയ ഓര്ത്തഡോക്സ് റമ്പാന് തോമസ് പോളിനെതിരെ യാക്കോബായ വിശ്വാസികള് പ്രതിരോധമതില് തീര്ത്തു.
അവസാനം പൊലീസ് റമ്പാനേയും കൊണ്ട് കാറില് കടന്നു. റമ്പാന് പമ്പകടന്നെങ്കിലും പള്ളിയില് നിന്ന് പിരിഞ്ഞ് പോകാന് വിശ്വാസികള് തയ്യാറായില്ല. പോകരുതെന്ന ആഹ്വാനം സഭാനേതൃത്വം മൈക്കിലൂടെ നല്കുകയും ചെയ്തു. അതോടെ കരുത്തരായ വിശ്വാസികള് പള്ളിയിലും പരിസരത്തുമായി നിലയുറപ്പിച്ചു.
ഉച്ചയ്ക്ക് ഒരു മണിയോടെ റമ്പാന് തോമസ് പോള് വീണ്ടും എത്തി. അപ്പോഴും യാക്കോബായ വിശ്വാസികള് ഭക്ഷണവും വെള്ളവും പോലും ഉപേക്ഷിച്ച് തടയാനായി കാത്തിരിക്കുകയായിരുന്നു. പൊലീസിന് അവരെ ഒന്നും ചെയ്യാനായില്ല. പൊലീസ് പൂര്ണമായും പരാജയപ്പെട്ടു. കാറിലെത്തിയ റമ്പാന് നിലത്ത് കാല്കുത്താന് പോലും യാക്കോബായയുടെ കരുത്തന്മാര് അനുവദിച്ചില്ല. മണിക്കൂറുകളോളം റമ്പാന് കാറിലിരിക്കേണ്ടിവന്നു. വിശ്വാസികളുടെ വലിയനിരതന്നെ ഉണ്ടായിരുന്നതിനാല് അവരെ അറസ്റ്റ് ചെയ്ത് നീക്കി കോടതിവിധി നടപ്പാക്കുക പൊലീസിന് കഴിയുമായിരുന്നില്ല. കോടതിവിധിയുടെ പിന്ബലത്തില് വിശ്വാസികളുടെ അവകാശം ഇല്ലാതാക്കാനാവില്ലെന്നും കോടതി പറഞ്ഞാല് കേള്ക്കാത്തവരാണ് വിശ്വാസികളെന്നും അവരെ തങ്ങളാണ് തടഞ്ഞ് നിര്ത്തിയിരിക്കുന്നെന്നും തോമസ് പ്രഥമന് കാതോലിക്കബാവ പറഞ്ഞു. എത്രനാള് വിശ്വാസികളെ ഇങ്ങനെ കൊണ്ടുപോകാനാവുമെന്ന് അറിയില്ലെന്നും അദ്ദേഹം പറഞ്ഞു.
കോടതി ഉത്തരവ് പ്രകാരം പിറവം പള്ളിയില് പ്രാര്ത്ഥനയ്ക്കെത്തിയ ഓര്ത്തഡോക്സ് വിശ്വാസികളെയും പുരോഹിതന്മാരേയും യാക്കോബായ സഭാ വിശ്വാസികള് പറപറപ്പിച്ചിരുന്നു. പൊലീസ് പള്ളിയില് പ്രവേശിക്കാതിരിക്കാന് പള്ളിയുടെ ഗേറ്റ് പൂട്ടിയ ശേഷം കൂട്ടമണിയടിച്ച് വിശ്വാസികളെ കൂട്ടിയാണ് അന്ന് യാക്കോബായസഭ കരുത്ത്കാട്ടിയത്. സ്ത്രീകള് ഉള്പ്പെടെയുള്ള വിശ്വാസികള് കരഞ്ഞ് അലറിവിളിച്ചാണ് പള്ളിയിലേക്ക് പാഞ്ഞെത്തിയത്. വര്ഷങ്ങളായി തങ്ങള് ആരാധന നടത്തുന്ന പള്ളി മറ്റാര്ക്കും വിട്ട് നല്കില്ലെന്നും രണ്ടായിരത്തോളം വിശ്വികള് എവിടെ പോകുമെന്നും അവര് ചോദിച്ചപ്പോള് വിധി നടപ്പാക്കാനെത്തിയ പൊലീസിന് മറുപടിയുണ്ടായിരുന്നില്ല.
രണ്ട് മണിയോടെ എത്തിയ ഓര്ത്തഡോക്സ് വിശ്വാസികള് പള്ളിയില് കടക്കാതിരിക്കാന് ആത്മബലിക്ക് പോലും യാക്കോബായ വിശ്വാസികള് തയ്യാറായി. പള്ളിയുടെ മുകളില്കയറി അവര് ഭീഷണി മുഴക്കി. അവസാനം അവരുടെ വിശ്വാസത്തിന്റെ കരുത്തിന് മുന്നില് പൊലീസ് കീഴടങ്ങുകയായിരുന്നു. ആ നിലപാട് തന്നെയാണ് കോതമംഗലം ചെറിയപള്ളിയിലും യാക്കോബായ വിശ്വാസികള് സ്വീകരിക്കുന്നത്. തങ്ങളുടെ പൂര്വപിതാക്കന്മാര് കാലങ്ങളായി ആരാധന നടത്തിവന്നിരുന്ന പള്ളി ഒരു സുപ്രഭാതത്തില് കോടതി പറയുന്നത് കേട്ട് ആര്ക്കും കൈമാറാനാവില്ലെന്ന നിച്ഛയദാര്ഢ്യത്തിലാണവര്.
https://www.facebook.com/Malayalivartha
