ശബരിമല യുവതീ പ്രക്ഷോഭത്തിനെതിരായി വനിതകളെ അണിനിരത്തി നവോത്ഥാനത്തിന്റെ പേരുപറഞ്ഞ് കരുത്ത് കാട്ടിക്കൊടുക്കാന്‍ ശ്രമിച്ച സിപിഎമ്മിന് കനത്ത തിരിച്ചടി. 18 തികയാത്ത പെണ്‍കുട്ടികളെ അണിനിരത്തി വനിതാ മതില്‍ നിറയ്ക്കാമെന്ന സര്‍ക്കാരിന്റെയും പാര്‍ട്ടിയുടേയും തീരുമാനം പാളിപ്പോയി. പെണ്‍കുട്ടികളെ വനിതാ മതിലില്‍ പങ്കെടുപ്പിക്കരുതെന്ന കര്‍ശന നിര്‍ദേശമാണ് ഹൈക്കോടതി നല്‍കിയിട്ടുള്ളത്. ഇതോടെ വിദ്യാര്‍ത്ഥിനികളെ എസ്എഫ്‌ഐയെ കൊണ്ട് പേടിപ്പിച്ച് ഇറക്കാമെന്ന തീരുമാനം പൊളിഞ്ഞു. ഇനിയങ്ങനെയാരെങ്കിലും ഇറക്കിയാലും ആരെങ്കിലും പരാതിപ്പെട്ടാല്‍ സര്‍ക്കാര്‍ ഉത്തരം പറയേണ്ടി വരും. 

ഇതോടൊപ്പം വനിതാ മതിലിന്റെ നിര്‍മാണത്തെ ചൊല്ലി കുടുംബശ്രീയിലും വിള്ളലുണ്ടായി. അയല്‍ക്കൂട്ടം മുതല്‍ മുകള്‍ത്തട്ടിലുളള സിഡിഎസ് വരെ ഭിന്നത പ്രകടം. വിവിധ രാഷ്ടീയ ആഭിമുഖ്യമുള്ളവരും വിവിധ മതവിശ്വാസികളുമായ വനിതകള്‍ അംഗങ്ങളായ കുടുംബശ്രീയെ മതിലിന് കരുവാക്കുന്നത് സംഘടനയുടെ കെട്ടുറുപ്പിനെ ബാധിക്കുമെന്ന് ആശങ്ക. 

ശബരിമല വിഷയവുമായി കൂട്ടിക്കലര്‍ത്തി വനിതാ മതില്‍ നിര്‍മിക്കുന്നതിനെതിരെ അയല്‍ക്കൂട്ടം മുതല്‍ സിഡിഎസ് വരെ കടുത്ത എതിര്‍പ്പ്. വനിതാ മതില്‍ നിര്‍മാണം സംസ്ഥാനത്തിന്റെ വിവിധ ഭാഗങ്ങളില്‍ കുടുംബശ്രീയില്‍ വലിയ എതിര്‍പ്പ് ഉണ്ടാക്കിയതിനെ തുടര്‍ന്ന് സംസ്ഥാന മിഷന് വിശദീകരണവുമായി രംഗത്ത് വരേണ്ടി വന്നു. വനിതാ മതിലില്‍ അംഗങ്ങള്‍ നിര്‍ബന്ധമായി പങ്കെടുക്കണമെന്ന നിര്‍ദ്ദേശം കൊടുത്തിട്ടില്ലെന്നാണ് മിഷന്‍ കേന്ദ്രങ്ങള്‍ പറയുന്നത്. 

സ്ത്രീശാക്തീകരണ പ്രവര്‍ത്തനങ്ങള്‍ക്ക് രാജ്യത്തിന് തന്നെ മാതൃകയായി മാറിയ കുടുംബശ്രീക്കുള്ളില്‍ പ്രകടമായ രാഷ്ടീയം കുറവായിരുന്നു. സിഡിഎസ് ഭാരവാഹികള്‍ അടക്കമുളളവരെ ജനാധിപത്യപരമായി തെരഞ്ഞെടുക്കുന്ന രീതിയാണ് ഉണ്ടായിരുന്നത്. കുടുംബശ്രീയുടെ പ്രവര്‍ത്തനങ്ങളെ രാഷ്ടീയ വ്യത്യാസം പൊതുവേ ബാധിച്ചിരുന്നില്ല. എന്നാല്‍, വനിതാ മതില്‍ നിര്‍മാണം സ്ത്രീകളെ രണ്ട് തട്ടിലാക്കുമെന്ന വിമര്‍ശനം ശക്തം.

അതേസമയം, വനിതാ മതില്‍ കെട്ടാന്‍ ഭീഷണിപ്പെടുത്തിയും അല്ലാതെയും അംഗങ്ങളെ രംഗത്തിറക്കാനാണ് സിപിഎമ്മിന്റെ നീക്കം. സര്‍ക്കാര്‍ പരിപാടിയാണെന്നും കുടുംബശ്രീയുടെ നയപരമായ തീരുമാനമെന്നും പറഞ്ഞാണ് അംഗങ്ങളെ മതില്‍ നിര്‍മാണത്തിന് പ്രേരിപ്പിക്കുന്നത്. പ്രളയ ദുരിതാശ്വാസ സഹായങ്ങള്‍ നിഷേധിക്കുമെന്ന് വരെ ഭീഷണിപ്പെടുത്തുന്നു. മതിലിന് ഒരു അയല്‍ക്കൂട്ടത്തില്‍ നിന്ന് കുറഞ്ഞത് 30 പേരെ പങ്കെടുപ്പിക്കാനാണ് നിര്‍ദ്ദേശം. ചിലയിടങ്ങളില്‍ അയല്‍ക്കൂട്ടങ്ങളുടെ യോഗത്തില്‍ വനിതാമതില്‍ നിര്‍മാണം ഉയര്‍ത്തിയപ്പോള്‍ വിശ്വാസികളായ അംഗങ്ങള്‍ യോഗത്തില്‍ നിന്ന് ശരണം വിളിച്ച് ഇറങ്ങിപ്പോയി. 

വനിതാ മതില്‍ സിപിഎം നടത്തുന്ന പാര്‍ട്ടി പരിപാടിയാണെന്നാണ് എതിര്‍ക്കുന്ന കുടുംബശ്രീ അംഗങ്ങള്‍ പറഞ്ഞു. ഈ പരിപാടി കുടുംബശ്രീയുടെ ലക്ഷ്യത്തിന് എതിരാണെന്നും അവര്‍ പറയുന്നു. കുടുംബശ്രീ അംഗങ്ങളില്‍ ഒരു വിഭാഗം എതിര്‍പ്പ് ഉയര്‍ത്തിയതോടെ അംഗങ്ങള്‍ നിര്‍ബന്ധമായും പങ്കെടുക്കണമെന്ന നിര്‍ദ്ദേശം സിപിഎം ഭരിക്കുന്ന തദ്ദേശ സ്ഥാപനങ്ങള്‍ പുറപ്പെടുവിച്ചു.

അതേസമയം വനിതാമതിലില്‍ കുടുംബശ്രീ അംഗങ്ങളെ പങ്കെടുപ്പിക്കുന്നതുമായി ബന്ധപ്പെട്ട് ഭിന്നാഭിപ്രായം നിലനില്‍ക്കുന്നതിനിടെ വിശദീകരണവുമായി കുടുംബശ്രീ സ്‌റ്റേറ്റ് മിഷന്‍ രംഗത്തെത്തി. വനിതാ മതിലില്‍ കുടുംബശ്രീ അംഗങ്ങള്‍ നിര്‍ബന്ധമായി പങ്കെടുക്കണം എന്നാവശ്യപ്പെട്ട് ഔദ്യോഗികമായി ഒരറിയിപ്പും നല്‍കിയിട്ടില്ലെന്ന് കുടുംബശ്രീ സ്‌റ്റേറ്റ് മിഷന്‍ ഓഫീസ് അറിയിച്ചു. എന്നാല്‍ ഇത് സര്‍ക്കാര്‍ പരിപാടിയാണെന്നും കുടുംബശ്രീയുടെ നയപരമായ തീരുമാനമാണെന്നും പറഞ്ഞ് ചില ജില്ലകളില്‍ കുടുംബശ്രീ അംഗങ്ങളെ പരിപാടിയില്‍ പങ്കെടുപ്പിക്കാന്‍ നിര്‍ബന്ധിക്കുന്നുണ്ട്. ഇത് പലയിടങ്ങളിലും എതിര്‍പ്പുകള്‍ക്കും വഴിവെക്കുന്നുണ്ട്.

കോഴിക്കോട് കോര്‍പ്പറേഷനിലെ കുടുംബശ്രീ സി.ഡി.എസിന് കീഴില്‍ നിന്ന് മാത്രം കുടുംബാംഗങ്ങളെ അടക്കം ഉള്‍പ്പെടുത്തി ഒരു ലക്ഷം പേരെ അണിനിരത്താനാണ് തീരുമാനിച്ചിരിക്കുന്നത്. കോഴിക്കോട് ജില്ലയില്‍ തന്നെ ഏറ്റവും കൂടുതല്‍ കുടുംബശ്രീ അംഗങ്ങള്‍ ഉള്ള സി.ഡി.എസുകളില്‍ ഒന്നാണിത്. 3500 അയല്‍കൂട്ടങ്ങളുള്ള ഇവിടെ നിന്ന് ഓരോ അയല്‍ക്കൂട്ടങ്ങളില്‍ നിന്നും 30 ല്‍ കുറയാത്ത അംഗങ്ങളെ പരിപാടിയില്‍ പങ്കെടുപ്പിക്കാനാണ് നിര്‍ദേശിച്ചിരിക്കുന്നത്. കുടുംബശ്രീയുടെ നയപരമായ തീരുമാനമാണ് എന്നിരിക്കെ പങ്കെടുത്തില്ലെങ്കില്‍ നടപടി അടക്കമുള്ള കാര്യങ്ങളിലേക്ക് പോവുമെന്ന സൂചനയും അംഗങ്ങള്‍ക്ക് നല്‍കിയിട്ടുണ്ട്.

വനിതാ മതില്‍ സിപിഎം നടത്തുന്ന പാര്‍ട്ടി പരിപാടിയാണെന്ന ആരോപണമുണ്ടായിരുന്നു. ഇതോടെ പങ്കെടുക്കാന്‍ താല്‍പര്യമില്ലെന്ന് ചൂണ്ടിക്കാണിച്ച് കുടുംബശ്രീ അംഗങ്ങള്‍ മുന്നോട്ട് വന്നിരുന്നു. യു.ഡി.എഫ് അടക്കമുള്ളവര്‍ പരിപാടിക്ക് പിന്തുണയും നല്‍കുന്നില്ല. തുടര്‍ന്നാണ് സര്‍ക്കാര്‍ പരിപാടിയെന്ന നിലയ്ക്ക് കുടംബശ്രീ അംഗങ്ങള്‍ നിര്‍ബന്ധമായും പങ്കെടുക്കണം എന്ന് ചൂണ്ടിക്കാട്ടി പല കുടുംബശ്രീ യൂണിറ്റുകളിലും നിര്‍ദേശം ലഭിച്ചിരിക്കുന്നത്. ഇങ്ങനെ ആകെ ആശങ്കയിലാണ് വനിതാമതില്‍...