ശബരിമല സ്ത്രീപ്രവേശത്തെ അനുകൂലിച്ച പൊതുപ്രവര്‍ത്തകന്റെ വീട് മുഖം മൂടി ധരിച്ചെത്തിയ സംഘം അടിച്ചു തകര്‍ത്തു. രാമദാസ് കതിരൂരിന്റ തലശേരി പുന്നോലിലെ വീടിന് നേരെയാണ് ആക്രമണമുണ്ടായത്. മുഖം മൂടി ധരിച്ച് കാറിലെത്തിയ എട്ടംഗ സംഘമാണ് ആക്രമണം നടത്തിയത്. ജനല്‍ ചില്ലുകളും വീട്ടുപകരണങ്ങളും തകര്‍ത്ത നിലയിലാണ്. ന്യൂമാഹി പൊലീസ് അന്വേഷണം ആരംഭിച്ചു.

അതേസമയം, ദര്‍ശനത്തിനെത്തിയ യുവതികളുടെ വീടുകള്‍ക്കുമുന്നില്‍ നാമജപപ്രതിഷേധം നടന്നു. ബിന്ദുവിന്റെ കോഴിക്കോട് കൊയിലാണ്ടി പൊയില്‍കാവിലെ വീടിനുമുന്നില്‍ പ്രതിഷേധം തുടങ്ങും മുന്‍പ് തന്നെ ഭര്‍ത്താവും മകളും വീട്ടില്‍നിന്ന് മാറിയിരുന്നു. മലപ്പുറം അങ്ങാടിപ്പുറം സ്വദേശി കനകദുര്‍ഗയുടെ വീടിന് മുന്‍പിലും അരീക്കോട്ടെ സ്വന്തം വീടിന് മുന്‍പിലും നാമജപ പ്രതിഷേധം നടന്നു.

സിവില്‍ സപ്ലൈസ് ജീവനക്കാരിയായ കനകദുര്‍ഗ തിരുവനന്തപുരത്ത് യോഗമുണ്ടെന്ന് പറഞ്ഞാണ് വീട്ടില്‍ നിന്ന് പോയത്. ചാനലുകളില്‍ വാര്‍ത്ത കണ്ടപ്പോഴാണ് സംഭവം അറിയുന്നതെന്നും ശബരിമലയിലെ ആചാരങ്ങള്‍ സംരക്ഷിക്കണം എന്നാണ് അഭിപ്രായമെന്നും ഭര്‍ത്താവ് കൃഷ്ണനുണ്ണിയും അമ്മയും ബന്ധുക്കളും പറഞ്ഞു. ദേവസ്വം ബോര്‍ഡ് പ്രസിഡന്റിന്റെ വീടിനുമുന്നിലും നാമജപ പ്രതിഷേധമുണ്ടായി.