നിലയ്ക്കല് മുതല് സന്നിധാനം വരെ നിറം മാറി.... ഇനി യുവതികളെ ഉരുട്ടി മലകയറാമെന്ന് ആരും മോഹിക്കേണ്ട; അയ്യപ്പ ദര്ശനത്തിനെത്തുന്ന ഭക്തരുടെ എണ്ണത്തില് അഭൂതപൂര്വമായ വര്ധന; ഇതിനിടെ തടയാനുറച്ച് ആയിരക്കണക്കിന് പേരും
അയ്യപ്പ ദര്ശനത്തിനെത്തുന്ന ഭക്തരുടെ എണ്ണത്തില് അഭൂതപൂര്വമായ വര്ധനയുണ്ടായതോടെ ഇനി യുവതികളുടെ മലകയറ്റം നടക്കില്ലാത്ത അവസ്ഥയായി. പോലീസിന് പോലും തിരക്ക് നിയന്ത്രിക്കാന് കഴിയുന്നില്ല. അതിനിടെ യുവതികള് കയറിയാല് തടയുമെന്ന് വരുന്ന ആയിരക്കണക്കിന് പേരുമുണ്ട്. എല്ലാം കൂടിയാകുമ്പോള് യുവതികളുടെ മോഹം അസ്ഥാനത്താകും.
അതേസമയം മലകയറ്റത്തിന് പൊലീസ് നിയന്ത്രണം ഏര്പ്പെടുത്തി. പമ്പ ഗണപതി ക്ഷേത്രത്തിന് സമീപത്ത് ബാരിക്കേഡുകള് സ്ഥാപിച്ചാണ് ഭക്തരെ നിയന്ത്രിക്കുന്നത്. ദര്ശനം നടത്തിയവര് അടിയന്തിരമായി തിരികെ മലയിറങ്ങണമെന്നും പൊലീസ് ആവശ്യപ്പെട്ടിട്ടുണ്ട്.
ഇന്നലെ രാത്രി മുതലാണ് അയല് സംസ്ഥാനങ്ങളില് നിന്നുള്പ്പെടെയുള്ള, നിലയ്ക്കല് ബേസ് ക്യാമ്പിലേക്ക് തീര്ഥാടകരുമായി എത്തുന്ന വാഹനങ്ങളുടെ എണ്ണം ക്രമാതീതമായി വര്ദ്ധിച്ചത്. മണ്ഡലകാലം അവസാനിക്കാറായതിന് പുറമെ സ്കൂള് അവധി തുടങ്ങിയതും തീര്ത്ഥാടകരുടെ എണ്ണം കൂടാന് കാരണമായി. ചില സമയങ്ങളില് അഞ്ചു മണിക്കൂറില് അധികമാണ് തീര്ത്ഥാടകര് വഴിയില് കുടുങ്ങി കിടക്കുന്നത്.
17 പാര്ക്കിങ് ഗ്രൗണ്ടുകളാണ് നിലയ്ക്കലില് ഇപ്പോള് ഉള്ളത്. ഇവിടെല്ലാമായി 15000 വാഹനങ്ങള് പാര്ക്ക് ചെയ്യാമെന്നാണ് കണക്ക്. എന്നാല് നിലവില് 8000 വാഹനങ്ങള് മാത്രമേ പാര്ക്ക് ചെയ്യാന് കഴിയുകയുള്ളൂ. പകല് നിലയ്ക്കലില് വാഹനം പാര്ക്ക് ചെയ്ത് സന്നിധാനത്തേക്ക് പോകുന്ന തീര്ത്ഥാടകാര് തിരിച്ചെത്താന് വൈകുന്നതും പാര്ക്കിങ്ങിലെ അപര്യാപ്തതയുമാണ് ഗതാഗതക്കുരുക്ക് രൂക്ഷമാക്കുന്നത്.
അടുത്ത രണ്ടു ദിവസങ്ങളില് തിരക്ക് വര്ധിക്കാന് ഇടയുള്ളതിനാല് പാര്ക്കിങിന് കൂടുതല് സൗകര്യമൊരുക്കാന്, നിലയ്ക്കലില് സന്ദര്ശനം നടത്തിയ ഹൈക്കോടതി നിരീക്ഷണ സമിതി പൊലീസിനോട് നിര്ദേശം നല്കി. അടുത്ത സീസണ് വരെ ഇതിനായി കാത്തിരിക്കരുതെന്നും നിര്ദ്ദേശിച്ചിട്ടുണ്ട്. ഇതിനാവശ്യമായ നടപടികള് ആരംഭിച്ചിട്ടുണ്ട്.
അടുത്ത് വരാനിരിക്കുന്ന മകരവിളക്ക് സീസണില് തിരക്ക് കൂടുതല് വര്ദ്ധിക്കാനാണ് സാധ്യത. അതിനു മുന്പ് കൂടുതല് പാര്ക്കിങ് സംവിധാനം ഒരുക്കിയില്ലെങ്കില് കാര്യങ്ങള് കൂടുതല് പ്രതിസന്ധിയിലാകും.
അതേസമയം ശബരിമല ദര്ശനത്തിന് സുരക്ഷ നല്കാനാവില്ലെന്ന് പൊലീസ് അറിയിച്ചതോടെ യാത്ര മാറ്റിവയ്ക്കാന് തയ്യാറാണെന്ന് കനകദുര്ഗയും ബിന്ദുവും അറിയിച്ചു. ശബരിമലയിലെ തിരക്ക് കണക്കിലെടുത്ത് സുരക്ഷ നല്കാനാവില്ലെന്നാണ് പൊലീസ് ഇവരോട് അറിയിച്ചത്. തുടര്ന്ന് യുവതികള് യാത്ര മാറ്റിവയ്ക്കുകയായിരുന്നു.
തിങ്കളാഴ്ച രാവിലെയാണ് മലപ്പുറം സ്വദേശിയായ കനകദുര്ഗയും കോഴിക്കോട് സ്വദേശി ബിന്ദുവും പൊലീസ് സംരക്ഷണയില് സന്നിധാനത്തിന് സമീപം വരെ എത്തിയത്. എന്നാല് ഭക്തരുടെ ശക്തമായ പ്രതിഷേധത്തെ തുടര്ന്ന് ഇവരെ പൊലീസ് തിരിച്ചിറക്കുകയായിരുന്നു. ക്രമസമാധാന പ്രശ്നത്തെ തുടര്ന്നാണ് യുവതികളെ തിരിച്ചിറക്കുന്നതെന്നാണ് പൊലീസ് ഔദ്യോഗികമായി അറിയിച്ചത്. ഇതിനിടെ മലപ്പുറം സ്വദേശിയായ കനകദുര്ഗയ്ക്ക് ദേഹാസ്വാസ്ഥ്യം അനുഭവപ്പെട്ടു. തുടര്ന്ന് ഇരുവരെയും കോട്ടയം മെഡിക്കല് കോളേജ് ആശുപത്രിയില് എത്തിച്ച് ചികിത്സ നല്കി.
അതേസമയം, ക്രമസമാധാന പ്രശ്നങ്ങള് പരിഹരിച്ചതിന് ശേഷം തങ്ങളെ വീണ്ടും മലകയറ്റണമെന്ന് യുവതികള് പൊലീസിനോട് ആവശ്യപ്പെട്ടു. പൊലീസ് തങ്ങളെ നിര്ബന്ധിച്ച് തിരിച്ചിറക്കുകയാണെന്നും ദുര്ഗയ്ക്ക് ദേഹാസ്വാസ്ഥ്യം ഇല്ലെന്നും ബിന്ദു മാദ്ധ്യമങ്ങളോട് പറഞ്ഞു. എന്നാല് സന്നിധാനത്തെ തിരക്ക് കണക്കിലെടുത്ത് ഇരുവര്ക്കും സുരക്ഷ നല്കാന് അവില്ലെന്നായിരുന്നു പൊലീസിന്റെ നിലപാട്. ഇക്കാര്യം ചൂണ്ടിക്കാട്ടി ഉന്നത പൊലീസ് ഉദ്യോഗസ്ഥര് ഇരുവരുമായും ചര്ച്ച നടത്തി. ഇതിന് ശേഷമാണ് യുവതികള് തങ്ങളുടെ യാത്ര മാറ്റിവയ്ക്കാമെന്ന് അറിയിച്ചത്.
https://www.facebook.com/Malayalivartha
