ശബരിമല യുവതീപ്രവേശന നിലപാടില് സി.പി.എമ്മിനേയും മുഖ്യമന്ത്രി പിണറായി വിജയനേയും പരസ്യമായി തള്ളി ദേവസ്വം ബോര്ഡ് പ്രസിഡന്റ് എ.പത്മകുമാര്, യുവതീപ്രവേശനത്തിന് അനുകൂലമല്ല, സര്ക്കാരിന്റെയും പാര്ട്ടിയുടെയും നിലപാടിന് വഴങ്ങി പ്രവര്ത്തിക്കും
ശബരിമല യുവതീപ്രവേശന നിലപാടില് സി.പി.എമ്മിനേയും മുഖ്യമന്ത്രി പിണറായി വിജയനേയും പരസ്യമായി തള്ളി ദേവസ്വം ബോര്ഡ് പ്രസിഡന്റ് എ.പത്മകുമാര്. യുവതികള് ശബരിമലയില് പ്രവേശിക്കരുതെന്ന നിലപാടില് താന്ഉറച്ച് നില്ക്കുന്നെന്നും എന്നാല് സര്ക്കാരിന്റെയും പാര്ട്ടിയുടെയും നിലപാടിന് വഴങ്ങി പ്രവര്ത്തിക്കുമെന്നും അദ്ദേഹം വാര്ത്താസമ്മേളനത്തില് അറിയിച്ചു.
ഇതോടെ യുവതീപ്രവേശനത്തില് സര്ക്കാരും ദേവസ്വം ബോര്ഡും തമ്മിലുള്ള ഭിന്നത മറനീക്കി പുറത്ത് വന്നിരിക്കുകയാണ്. കോടതി വിധി വന്നപ്പോള് മഹാത്തായ വിധിയെന്ന് വാര്ത്ത നല്കിയ ചില ചാനലുകളും പത്രങ്ങളും ഭക്തരുടെ എതിര്പ്പ് വന്നതോടെ അവര്ക്കൊപ്പം അണിനിരന്ന് പ്രതിഷേധത്തിന്റെ മുന് നിരയിലെത്തിയെന്നും ജന്മഭൂമിയേയും ജനംടി.വിയേയും പരോക്ഷമായി വിമര്ശിച്ച് അദ്ദേഹം പറഞ്ഞു.
സെപ്തംബര്ഡ 28ന് വിധി വന്ന ദിവസം തന്നെ യുവതീപ്രവേശനത്തിന് എതിരാണെന്ന് വ്യക്തമാക്കിയതാണെന്നും ആ നിലപാടില് മാറ്റമില്ലെന്നും പത്മകുമാര് ആവര്ത്തിച്ചു. ദേവസ്വം ബോര്ഡിനും അതേനിലപാടായിരുന്നു. മനുഅഭിഷേക് സിംഗ്വിയെ കൊണ്ട് കഴിഞ്ഞ യു.ഡി.എഫ് സര്ക്കാര് ഫയല് ചെയ്ത സത്യവാങ്മൂലം തന്നെ താന് പ്രസിഡന്റായ ശേഷം സുപ്രീംകോടതിയില് നല്കിയത് യുവതീപ്രവേശനത്തെ എതിര്ക്കുന്നത് കൊണ്ടാണെന്നും പത്മകുമാര് വ്യക്തമാക്കി. ഇതോടെ യുവതീപ്രവേശനത്തില് സര്ക്കാരും ബോര്ഡും തമ്മിലുള്ള തമ്മിലടിയും പാര്ട്ടിയിലെയും ബോര്ഡിലെയും സ്ഥാനങ്ങള് തെറിക്കാതിരിക്കാന് എ.പത്മകുമാര് നടത്തുന്ന നീക്കങ്ങളും പുറത്തായിരിക്കുകയാണ്.
സുപ്രീംകോടതി വിധിക്കെതിരെ റിവ്യൂഹര്ജി നല്കുമെന്ന് കോടതി വിധി വന്ന ശേഷം പത്മകുമാര് പറഞ്ഞെങ്കിലും മുഖ്യമന്ത്രി ഇടപെട്ട് അത് തിരുത്തി. പത്തനംതിട്ടയില് നടത്തിയ രാഷ്ട്രീയ വിശദീകരണ യോഗത്തില് പത്മകുമാറിനെതിരെ മുഖ്യമന്ത്രി രൂക്ഷവിമര്ശനം നടത്തി. വല്ലവരുടെയും ചട്ടുകമായി ദേവസ്വം പ്രസിഡന്റ് പ്രവര്ത്തിക്കരുതെന്നും മുഖ്യമന്ത്രി മുന്നറിയിപ്പ് നല്കി. അതോടെയാണ് നിലപാടില് പ്രസിഡന്റ് അയവ് വരുത്തിയത്. കടുത്തനിലപാട് സ്വീകരിച്ചാല് കസേര തെറിക്കുമെന്ന് പ്രസിഡന്റിന് മനസിലായി. പിന്നീട് പന്തളംകൊട്ടാരം നിര്വാഹക സമിതി അംഗങ്ങളും താഴമണ്കുടുംബാംഗങ്ങളും മുഖ്യമന്ത്രിയുമായി ചര്ച്ച നടത്തിയ ശേഷമാണ് ദേവസ്വം ബോര്ഡ് സുപ്രീംകോടതിയില് സാവകാശ ഹര്ജി നല്കാന് തീരുമാനിച്ചത്. അത് മുഖ്യമന്ത്രിയുടെ സമ്മതത്തോടെയായിരുന്നു താനും.
പിണറായി പാര്ട്ടി സെക്രട്ടറിയായ കാലം മുതല് അദ്ദേഹത്തിനൊപ്പം നിന്നയാളാണ് പത്മകുമാര്. പത്തനംതിട്ട ജില്ല അന്ന് വി.എസിന് ആധിപത്യമുള്ള ജില്ലയായിരുന്നു. അന്ന് പിണറായിക്കൊപ്പം അടിയുറച്ച് നിന്ന ചുരുക്കം ചില നേതാക്കളില് ഒരാളായിരുന്നു പത്മകുമാര്. ഇപ്പോള് കോടിയേരിയുടെ തണലിലാണ് പത്മകുമാര്. അതുകൊണ്ടാണ് പിണറായിയുടെ നിലപാടിനെതിരെ പരസ്യമായി പ്രസ്താവനകള് നടത്താന് ധൈര്യം കാണിക്കുന്നത്. എന്.എസ്.എസുമായി അടുത്തബന്ധം പുലര്ത്തുന്ന പത്മകുമാറിനെ പിണക്കാന് സി.പി.എം തയ്യാറല്ല, പ്രത്യേകിച്ച് അടുത്ത മുഖ്യമന്ത്രിയാകാന് കൊതിക്കുന്ന കോടിയേരിക്ക് പത്മകുമാറിനെ കൊണ്ട് പല കാര്യങ്ങളും സാധിക്കാനുണ്ട്.
https://www.facebook.com/Malayalivartha
