മണ്ഡല പൂജയ്ക്കായി അയ്യപ്പ വിഗ്രഹത്തില്‍ ചാര്‍ത്താനുള്ള തങ്കഅങ്കിയും വഹിച്ചു കൊണ്ടുള്ള ഘോഷയാത്ര ശബരിമല സന്നിദാനത്തെത്തി. ഭക്തിസാന്ദ്രമായ അന്തരീക്ഷത്തില്‍ ശരണം വിളികളോടെ സന്നിധാനത്തെത്തിച്ച തങ്കഅങ്കി ഘോഷയാത്രയെ ദേവസ്വം പ്രസിഡന്റ് സ്വീകരിച്ചു.

ആചാരവിധി പ്രകാരമുള്ള സ്വീകരണത്തോടെയാണ് തങ്കഅങ്കി സന്നിധാനത്തെത്തിച്ചത്. തുടര്‍ന്ന് തങ്കഅങ്കി അടക്കം ചെയ്ത പേടകം തന്ത്രി കണ്ഠര് രാജീവരര് , മേല്‍ശാന്തി വി. എന്‍ വാസുദേവന്‍ നമ്ബൂതിരി എന്നിവര്‍ ചേര്‍ന്ന് സോപാനത്തു നിന്നും ഏറ്റുവാങ്ങി. തങ്കഅങ്കിയോടൊപ്പം പന്തളം കുടുംബ പ്രതിനിധി ശശി കുമാര വര്‍മ്മ അകമ്പടി സേവിച്ചു. വൈകീട്ട് ആറരയോടെയാണ് തങ്കഅങ്കി സന്നിധാനത്തെത്തിയത്.

തങ്കയങ്കി ചാര്‍ത്തിയുള്ള ദീപാരാധനയ്ക്ക് ശേഷം ഹരിവരാസനം പാടി നടയടക്കും. നാളെ ഉച്ചയ്ക്കാണ് മണ്ഡല പൂജ. മണ്ഡലപൂജയ്ക്ക് ശബരിമല പ്രതിഷ്ഠയില്‍ തങ്കഅങ്കി ചാര്‍ത്തും. നാളെ മണ്ഡലപൂജ കഴിയുന്നതോടെ മണ്ഡലകാലം പൂര്‍ത്തിയാകും. കഴിഞ്ഞ ഞായറാഴ്ച്ചയാണ് ആറന്മുള പാര്‍ഥസാരഥി ക്ഷേത്രത്തില്‍ നിന്നാണ് തങ്കഅങ്കി സന്നിധാനത്തേക്ക് പുറപ്പെട്ടത്. തിരുവിതാംകൂര്‍ മഹാരാജാവായിരുന്ന ചിത്തിരതിരുനാള്‍ ബാലരാമവര്‍മ്മയാണ് തങ്കയങ്കി അയ്യപ്പന് സമര്‍പ്പിച്ചത്. ഏതാണ്ട് 451 പവന്‍ തൂക്കം വരുന്നതാണ് തങ്കയങ്കി.