മകരവിളക്ക് ഉത്സവത്തിന് ഇന്ന് തുടക്കമാവും. വൈകീട്ട് അഞ്ചിന് നട തുറക്കുന്നതോടെ ഭക്തര്‍ക്ക് ദര്‍ശനം നടത്താം.ഇന്ന് വൈകീട്ട് 6.20ന് ദീപാരാധനക്കു ശേഷം രാത്രി 11ന് ഹരിവരാസനത്തോടെ നട അടക്കും. തിങ്കളാഴ്ച പുലര്‍ച്ച മൂന്നിന് നട തുറക്കും. തുടര്‍ന്ന് 3.15 മുതല്‍ ഉച്ചക്ക് 12 വരെ നെയ്യഭിഷേകം. ഒരുക്കം വിവിധ വകുപ്പുകളുടെ നേതൃത്വത്തില്‍ പൂര്‍ത്തിയായി.
ശബരിമലയില്‍ സുരക്ഷക്കുള്ള പൊലീസ് സംഘവും പൂര്‍ണസജ്ജമാണ്. ജനുവരി 14നാണ് മകരവിളക്ക് മഹോത്സവം. ശബരിമല മകരവിളക്ക് മഹോത്സവത്തിന് ഇന്ന് നടതുറക്കുമ്പോള്‍ സന്നിധാനത്തെയും പമ്പയിലെയും സുരക്ഷചുമതല കണ്ണൂര്‍ റേഞ്ച് ഐ.ജി ബല്‍റാംകുമാര്‍ ഉപാധ്യായക്ക്. ഇവര്‍ ഇന്ന് ചുമതലയേല്‍ക്കും. ഇന്നു മുതല്‍ ജനുവരി 16 വരെയാണ് ചുമതല. ഐ.ജിക്ക് പുറമെ ഒരു ഡി.ഐ.ജി, 10 എസ്.പിമാര്‍ എന്നിവരും സുരക്ഷക്കുണ്ട്.
നിലക്കല്‍, വടശ്ശേരിക്കര, എരുമേലി എന്നിവിടങ്ങളില്‍ സുരക്ഷചുമതല ഡി.ഐ.ജി സഞ്ജയ്കുമാര്‍ ഗുരുഡിനാണ്. സന്നിധാനത്ത് കൊല്ലം കമീഷനര്‍ പി.കെ. മധുവും ആലപ്പുഴ എസ്.പി സുജിത് ദാസുമായിരിക്കും കണ്‍ട്രോളര്‍മാര്‍. പമ്പയില്‍ തിരുവനന്തപുരം ഡി.സി.പി ആര്‍. ആദിത്യയും െ്രെകംബ്രാഞ്ച് എസ്.പി ബി.കെ. പ്രകാശും ചുമതലവഹിക്കും. നിലക്കലില്‍ കാസര്‍കോട് എസ്.പി ഡോ. ശ്രീനിവാസും എന്‍.ആര്‍.ഐ സെല്‍ എസ്.പി വി.ജി. വിനോദ്കുമാറും കണ്‍ട്രോളര്‍മാരാകും. എരുമേലിയില്‍ എസ്.പി മെറിന്‍ ജോസഫ് ക്രമീകരണങ്ങളുടെ ചുമതലയും എസ്.പി വിനോദ്കുമാര്‍ ക്രമസമാധാന ചുമതലയും നിര്‍വഹിക്കും.