പാര്‍ലമെന്റില്‍ മുത്തലാക്ക് ബില്‍ ചര്‍ച്ചയില്‍ പങ്കെടുക്കാതിരുന്നതിനെക്കുറിച്ച് പി.കെ. കുഞ്ഞാലിക്കുട്ടി എംപി വിശദീകരണം നല്‍കിയിട്ടില്ലെന്ന് ലീഗ് സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങള്‍. കുഞ്ഞാലിക്കുട്ടിയുമായി ടെലിഫോണില്‍ സംസാരിച്ചിട്ടില്ലെന്നും അദ്ദേഹം പറഞ്ഞു. വോട്ടെടുപ്പ് വിവാദം പാര്‍ട്ടി ചര്‍ച്ച ചെയ്യും. ലീഗ് യോഗത്തിനുശേഷം ഇക്കാര്യത്തില്‍ തുടര്‍ നടപടി സ്വീകരിക്കുമെന്നും അദ്ദേഹം പറഞ്ഞു.

കുഞ്ഞാലിക്കുട്ടി ഇതുവരെ പറഞ്ഞതെല്ലാം പച്ചക്കള്ളമെന്നുറപ്പിക്കുന്നതാണ് തങ്ങളുടെ വാക്കുകള്‍. രാജ്യസഭയില്‍ ബില്ലിനെതിരെ വോട്ട് ചെയ്യാന്‍ ലീഗ് നിര്‍ദേശം നല്‍കിയെന്നും ബില്ല് പരാജയപ്പെടാല്‍ നിലവിലെ ആക്ഷേപത്തിന് പരിഹാരമാകുമെന്നും തങ്ങള്‍ പറഞ്ഞു.

മുത്തലാക്ക് ബില്‍ ചര്‍ച്ചയ്‌ക്കെടുത്തപ്പോള്‍ പങ്കെടുക്കാതിരുന്നതിന് കുഞ്ഞാലിക്കുട്ടിയോട് ഹൈദരലി ശിഹാബ് തങ്ങള്‍ നേരിട്ട് വിശദീകരണം ആവശ്യപ്പെട്ടിരുന്നു. എന്നാല്‍ ചര്‍ച്ചയില്‍ പങ്കെടുക്കാതിരുന്നതിനെക്കുറിച്ചു ലീഗ് നേതൃത്വത്തിനു വിശദീകരണം നല്‍കിയെന്ന് കുഞ്ഞാലിക്കുട്ടി പറഞ്ഞു. ഇക്കാര്യമാണ് ഹൈദരലി ശിഹാബ് തങ്ങള്‍ തള്ളിയത്.

കുഞ്ഞാലിക്കുട്ടിയുടെ തന്‍പ്രമാണിതമായിരുന്നു ഇതുവരെ ലീഗില്‍. പാണക്കാട് തങ്ങളും കുഞ്ഞാലിക്കുട്ടിയുടെ വാക്കുകള്‍ക്കനുസരിച്ചായിരുന്നു കാര്യങ്ങള്‍ നിയന്ത്രിച്ചിരുന്നത്. എന്നാല്‍ ഇടക്കാലത്തു നിര്‍ജീവമായ ഗ്രൂപ്പ് പോര് ഇപ്പോള്‍ ലീഗില്‍ വീണ്ടും സജീവമാകുന്നു. കുഞ്ഞാലിക്കുട്ടിക്കെതിരെ രൂക്ഷ വിമര്‍ശനമാണ് പാര്‍ട്ടിയിലുയരുന്നത്. അടുത്ത തവണ യു പി എ അധികാരത്തിലെത്തിയാല്‍ മുതിര്‍ന്ന നേതാവായിരുന്ന ഇ ടി മുഹമ്മദ് ബഷീര്‍ ആയിരുന്നു കേന്ദ്ര മന്ത്രി ആകേണ്ടിയിരുന്നത് എന്നാല്‍ പുതിയ സാഹചര്യത്തില്‍ നറുക്ക് കുഞ്ഞാലിക്കുട്ടിക്ക് വീഴും. ഗ്രൂപ്പ് പോരിന്റെ പിന്നില്‍ ഇത്തരം വിഷയങ്ങളുമുണ്ട്.

മുസ്ലീംലീഗ് ദേശീയ ജനറല്‍ സെക്രട്ടറിയായ പി.കെ കുഞ്ഞാലിക്കുട്ടിയുടെ ഭാഗത്ത് നിന്ന് വീഴ്ചയുണ്ടായെന്ന് വ്യക്തമായതിന്റെ അടിസ്ഥാനത്തിലാണ് ദേശീയ രാഷ്ട്രീയകാര്യ ഉപദേശക സമിതി ചെയര്‍മാന്‍ പാണക്കാട് ഹൈദരലി ശിഹാബ് തങ്ങള്‍ വിശദീകരണം തേടിയത്. കുഞ്ഞാലിക്കുട്ടിക്കെതിരെയുള്ള നിലപാട് മുതിര്‍ന്ന നേതാക്കളും അണികളും കടുപ്പിച്ച സാഹചര്യം കൂടി കണക്കെലെടുത്തായിരുന്നു ഹൈദരലി തങ്ങളുടെ വിശദീകരണം ചോദിക്കല്‍. പാര്‍ട്ടി പരിപാടിയും വിദേശ സന്ദര്‍ശനവുമുള്ളതു കൊണ്ടാണ് ലോക്‌സഭയില്‍ പോകാതിരുന്നതെന്നതെന്നാണ് കുഞ്ഞാലിക്കുട്ടി മാധ്യമങ്ങളോട് പറഞ്ഞത് ഒപ്പം പാര്‍ട്ടി മുഖപത്രമായ ചന്ദ്രികയുടെ ഗവേണിംഗ് ബോര്‍ഡ് യോഗത്തില്‍ പങ്കെടുക്കേണ്ട അടിയന്തര സാഹചര്യം ഉണ്ടായിരുന്നുവന്നും പറയുന്നു.