ശബരിമല ദര്‍ശനം നടത്തിയ യുവതികളെ രൂക്ഷഭാഷയില്‍ വിമര്‍ശിച്ച് ഡാന്‍സ് കൊറിയോഗ്രാഫര്‍ പ്രസന്ന മാസ്റ്റര്‍. സമൂഹമാധ്യമത്തില്‍ പോസ്റ്റു ചെയ്ത കുറിപ്പിലാണു പ്രതികരണം. അമ്മയ്ക്കും ബന്ധുക്കള്‍ക്കുമൊപ്പം ശബരിമല ദര്‍ശനം നടത്തിയതിനു പിന്നാലെയാണു ഞെട്ടിക്കുന്ന വാര്‍ത്ത കേട്ടതെന്നും അദ്ദേഹം കുറിച്ചു.

ശബരിമല ദര്‍ശനം നടത്തിയത് 'വനിതാ തീവ്രവാദികള്‍' എന്നായിരുന്നു ആദ്യ പരാമര്‍ശം. എന്നാല്‍ വിമര്‍ശനങ്ങളെത്തുടര്‍ന്ന് ഇതു നീക്കം ചെയ്തു. തീവ്രവാദികള്‍ എന്നതു ഭീരുക്കള്‍ എന്നു മാറ്റി. ശബരിമലയില്‍ ദര്‍ശനം നടത്തിയതിലൂടെ ഈ രണ്ടു യുവതികളും എന്താണു നേടിയതെന്നും എല്ലാ അയ്യപ്പഭക്തരുടെയും വിശ്വാസമാണു മുറിവേറ്റതെന്നും പറയുന്നു.

ഫെയ്‌സ്ബുക്ക് കുറിപ്പ് ഇങ്ങനെ:

''ജനുവരി ഒന്നിനു ശബരിമലയിലെത്തി ദര്‍ശനം നടത്താന്‍ കഴിഞ്ഞതില്‍ അതീവസന്തോഷം. രണ്ടാം തിയതി ഗണപതി ഹോമം കഴിപ്പിച്ചു തന്ത്രിയെ കണ്ട ശേഷം അമ്മക്കും ബന്ധുക്കള്‍ക്കുമൊപ്പം തിരിച്ചിറങ്ങി. മലയിറങ്ങുമ്പോള്‍ ആയിരക്കണക്കിനു വൃദ്ധരും കുഞ്ഞുങ്ങളും ഭിന്നശേഷിക്കാരും അയ്യപ്പനെ കാണാന്‍ കാത്തുനില്‍ക്കുന്ന കാഴ്ച കണ്ടു. എന്നാല്‍ കുറച്ചുമണിക്കൂറുകള്‍ക്കു ശേഷമാണു രണ്ടു ഭീരുക്കള്‍ അയ്യപ്പദര്‍ശനം നടത്തിയെന്ന ഞെട്ടിക്കുന്ന വാര്‍ത്ത കേട്ടത്. ആ ഭീരുക്കളെ ഓര്‍ത്ത് നാണക്കേട് തോന്നുന്നു.

ആരുടെയോ സ്വാര്‍ഥതാത്പര്യം സംരക്ഷിക്കപ്പെട്ട പോലെ തോന്നുന്നു. നിങ്ങളുടെ അഹങ്കാരത്തിന് കുഞ്ഞുങ്ങളും വൃദ്ധരുമുള്‍പ്പടെ മുപ്പതിനായിരത്തോളം വരുന്ന ഭക്തര്‍ മൂന്ന് മണിക്കൂറോളം കാത്തുനില്‍ക്കേണ്ടി വന്നു. ശബരിമലയില്‍ ഇന്ന് കരിദിനം.
ഇതിലൂടെ ഭീരുക്കളേ, നിങ്ങളെന്താണ് നേടിയത്? ഒരു ഹിന്ദു എന്ന നിലയില്‍, എല്ലാ അയ്യപ്പഭക്തരുടെയും വിശ്വാസത്തെയാണു നിങ്ങള്‍ മുറിവേല്‍പ്പിച്ചിരിക്കുന്നത്.''