കനകദുര്‍ഗയും ബിന്ദുവും ദര്‍ശനം നടത്തിയതിനെ തുടര്‍ന്ന് ശബരിമല നടയടച്ച തന്ത്രി കണ്ഠരര് രാജീവര്‍ക്കെതിരെ ദേവസ്വം ബോര്‍ഡ് പെട്ടെന്ന് നടപടി സ്വീകരിക്കില്ല. മകരവിളക്ക് പൂജയടക്കം നടക്കേണ്ടതിനാലാണ് ഈ തീരുമാനം. അതേസമയം ദേവസ്വം ബോര്‍ഡുമായി ആലോചിക്കാതെ നടയടച്ച് ശുദ്ധികലശം നടത്തിയതിന് വിശദീകരണം തേടും.

സുപ്രീംകോടതി വിധിയുടെ അന്തസത്തയ്ക്ക് നിലയ്ക്കാത്ത രീതിയിലാണ് തന്ത്രി പ്രവര്‍ത്തിച്ചതെന്ന് ബോര്‍ഡ് യോഗം വിലയിരുത്തി. 15 ദിവസത്തിനകം തന്ത്രി വിശദീകരണം നല്‍കണമെന്നാണ് ആവശ്യപ്പെട്ടിരിക്കുന്നത്. കോടതി വിധി മാനിക്കാന്‍ തയ്യാറല്ലെങ്കില്‍ തന്ത്രി സ്വയം ഒഴിയണമെന്നും ഭരണഘടനയെ വെല്ലുവിളിച്ച തന്ത്രിയെ മാറ്റണമെന്ന് മന്ത്രി സുനില്‍കുമാറും ആവശ്യപ്പെട്ടതിന് പിന്നാലെയാണ് ബോര്‍ഡിന്റെ തീരുമാനം. 

കോടതി വിധി മറികടക്കാന്‍ തന്ത്രി തയ്യാറല്ലെന്നാണ് ഇന്നത്തെ സംഭവവികാസങ്ങള്‍ വ്യക്തമാക്കുന്നത്. കാരണം ശ്രീലങ്കന്‍ സ്വദേശി ശശികല ഇരുമുടിക്കെട്ടുമായി പതിനെട്ടാംപടി കയറി ദര്‍ശനം നടത്തിയതിന് പിന്നാലെ മാധ്യമങ്ങളോട് പ്രതികരിക്കാന്‍ പോലും തന്ത്രി രാജീവര് തയ്യാറായില്ലെന്ന് മാത്രമല്ല ശുദ്ധികലശവും നടത്തിയില്ല. നടയടച്ച് താക്കോല്‍ കൈമാറാനും തയ്യാറായില്ല. കോടതി വിധി ആവര്‍ത്തിച്ച് ലംഘിച്ചാല്‍ ഒരു പക്ഷെ, പ്രശ്‌നമാണെന്ന് അദ്ദേഹത്തെ ആരൊക്കെയോ ധരിപ്പിച്ചിട്ടുണ്ട്. മാത്രമല്ല കോടതിയലക്ഷ്യത്തിന് സുപ്രീംകോടതിയില്‍ ഹര്‍ജി നല്‍കിയിട്ടുണ്ട്. അത് ഉടനെങ്ങും പരിഗണിക്കില്ലെങ്കിലും ഭാവിയില്‍ പ്രശ്‌നമാകും.

ബിന്ദുവും കനകദുര്‍ഗയും ദര്‍ശനം നടത്തിയതിന് പിന്നാലെ നടത്തിയ ശുദ്ധികലശം അയിത്താചാരണമാണെന്ന ആക്ഷേപവും ഉയര്‍ന്നിട്ടുണ്ട്. ദളിത് വിഭാഗക്കാരായ ബിന്ദുവും കനകദുര്‍ഗയും ആ രീതിയില്‍ കേസ് നല്‍കിയാല്‍ തന്ത്രി പെട്ടത് തന്നെ എന്ന് മുതിര്‍ന്ന ചില അഭിഭാഷകര്‍ ചാനല്‍ ചര്‍ച്ചകളിലും മറ്റും വ്യക്തമാക്കിയിട്ടുണ്ട്. കോടതിയേയും ഭരണഘടനയേയും സര്‍ക്കാരിനേയും വെല്ലുവിളിച്ച് മുന്നോട്ട് നീങ്ങുക അസാധ്യമാണെന്ന യാഥാര്‍ത്ഥ്യം തന്ത്രി തിരിച്ചറിഞ്ഞെന്നാണ് അറിയുന്നത്. എന്നാല്‍ മകരവിളക്ക് അടുത്തിരിക്കെ തന്ത്രിയെ പിണക്കിയാല്‍ അത് പൂജകളെയും മറ്റും ബാധിക്കുമെന്ന് ബോര്‍ഡിന് അറിയാം. അതിനാലാണ് വേഗത്തില്‍ നടപടിയെടുക്കാത്തത്.