കനകദുര്‍ഗയും ബിന്ദുവും ദര്‍ശനം നടത്തി മടങ്ങിയതിന് പിന്നാലെ ശ്രീലങ്കന്‍ യുവതി ശശികല ദര്‍ശനം നടത്തിയതോടെ പന്തളം കൊട്ടാരം നിര്‍വാഹക സമിതി തന്ത്രി കണ്്ഠരര് രാജീവരരോട് വിശദീകരണം തേടും. തുടര്‍ച്ചയായി യുവതികള്‍ ദര്‍ശനം നടത്തുന്നത് ആചാരലംഘനം അടിയ്ക്കടി ഉണ്ടാകുന്നതിലുള്ള അതൃപ്തി വിശദീകരണത്തില്‍ അറിയിക്കുമെന്നും അറിയുന്നു. അതേസമയം നിയമപരമായി പന്തളം കൊട്ടാരത്തിന് തന്ത്രിയോട് വിശദീകരണം തേടാനാവില്ല. ശബരിമല ക്ഷേത്രം പന്തളം കൊട്ടാരത്തിന്റെ ഉടമസ്ഥതയില്‍ ഉണ്ടായിരുന്ന കാലത്ത് താഴ്മണ്‍കുടുംബവുമായി ഉടമ്പടി ഉണ്ടാക്കിയിരുന്നു. അതിന്റെ അടിസ്ഥാനത്തിലാണ് വിശദീകരണം തേടുക. 

മുമ്പ് തന്ത്രി കുടുംബത്തിനെതിരെ നിരവധി പരാതികള്‍ പന്തളം കൊട്ടാരം ദേവസ്വം ബോര്‍ഡിന് നല്‍കിയിട്ടുണ്ടായിരുന്നെങ്കിലും ശബരിമല യുവതീപ്രവേശനത്തെ തുടര്‍ന്ന് ഇരുവരും ഒന്നിക്കുകയായിരുന്നെന്ന് മുന്‍ ദേവസ്വം പ്രസിഡന്റ് എം.രാജഗോപാലന്‍ നായര്‍ പറഞ്ഞിരുന്നു. യുവതികള്‍ ദര്‍ശനത്തിനെത്തിയാല്‍ തന്ത്രി നട അടയ്ക്കുമെന്നും അതിന് നിര്‍ദ്ദേശം നല്‍കിയെന്നും പന്തളം കൊട്ടാരം നിര്‍വാഹക സമിതി അംഗം ശശികുമാര വര്‍മ മാധ്യമങ്ങളോട് പറഞ്ഞിരുന്നു. ബിന്ദുവും കനകദുര്‍ഗയും ദര്‍ശനം നടത്തിയപ്പോള്‍ പന്തളം കൊട്ടാരം അധികൃതര്‍ ഞെട്ടിയിരുന്നു. എന്നാല്‍ തന്ത്രി ശുദ്ധിക്രീയ നടത്തിയതോടെ അവര്‍ക്ക് ആശ്വാസമായി. 

സുപ്രീംകോടതിക്ക് മേലെയാണ് അയ്യപ്പന്റെ കോടതി എന്ന നിലപാടിലാണ് പന്തളം കൊട്ടാരം നിര്‍വാഹകസമിതി. അതിനാല്‍ യുവതീപ്രവേശനത്തെ എന്ത് വിലകൊടുത്തും എതിര്‍ക്കുമെന്ന തീരുമാനത്തില്‍ നിന്ന് പിന്‍മാറാന്‍ പന്തളം കൊട്ടാരം അധികൃതര്‍ തയ്യാറായിട്ടില്ല. നൂറ്റാണ്ടുകളായി തുടരുന്ന ആചാരം മാറ്റാനാകില്ലെന്ന് അവര്‍ ആവര്‍ത്തിച്ച് വ്യക്തമാക്കിയതാണ്.

പണ്ട് പന്തളം കൊട്ടാരത്തിലെ ഒരു രാജ്ഞി തിരുവാഭരണത്തിന് അകമ്പടി സേവിച്ചെന്നും യാത്രാ മദ്ധ്യേ അവര്‍ അപ്രത്യക്ഷയായെന്നുമാണ് ഐതീഹ്യം. ശബരിമലയിലെ ചില ആചാരങ്ങളില്‍ പന്തളം കൊട്ടാരം അംഗങ്ങള്‍ പങ്കാളികളാണ്. അതല്ലാതെ അവര്‍ക്ക് അവിടെ യാതൊരു അധികാരവും ഇല്ലെന്നതാണ് വസ്തുത. പക്ഷെ, തന്ത്രി പന്തളം കൊട്ടാരത്തിന്റെ വിശദീകരണത്തിന് മറുപടി നല്‍കുമെന്നാണ് അറിയുന്നത.