തിരുവനന്തപുരം: കഴിഞ്ഞ വര്‍ഷത്തെ സംസ്ഥാന കായകല്‍പ്പ് അവാര്‍ഡ് ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചര്‍ പ്രഖ്യാപിച്ചു. സര്‍ക്കാര്‍ ആരോഗ്യ സ്ഥാപനങ്ങളിലെ ശുചിത്വം, ശുചിത്വ പരിപാലനം, അണുബാധ നിയന്ത്രണം എന്നിവ വിലയിരുത്തി പ്രോത്സാഹിപ്പിക്കുന്നതിനുവേണ്ടി സര്‍ക്കാര്‍ ആവിഷ്‌കരിച്ച അവാര്‍ഡാണ് കായകല്‍പ്പ്. കേരളത്തിലെ പ്രാഥമികാരോഗ്യ കേന്ദ്രങ്ങള്‍(പി.എച്ച്.സി) സാമൂഹികാരോഗ്യ കേന്ദ്രങ്ങള്‍ (സി.എച്ച്.സി), താലൂക്ക് ആശുപത്രികള്‍, ജില്ലാ അശുപത്രികള്‍ എന്നിവയില്‍ നിന്ന് തിരഞ്ഞെടുക്കുന്ന മികച്ച ആശുപത്രികള്‍ക്കാണ് കായകല്‍പ്പ് അവാര്‍ഡ് നല്‍കുന്നത്. ആശുപത്രികളില്‍ ജില്ലാതല പരിശോധനയും പിന്നീട് സംസ്ഥാനതല പരിശോധനയും നടത്തി അവാര്‍ഡ് നിയന്ത്രണ കമ്മിറ്റിയിലൂടെയാണ് ഏറ്റവും മികച്ച ആശുപത്രികളെ തിരഞ്ഞെടുത്തിരിക്കുന്നത്.

ജില്ലാതല ആശുപത്രികളില്‍ 89.33% മാര്‍ക്ക് നേടി ജില്ലാ ആശുപത്രി കാഞ്ഞങ്ങാട് ഒന്നാം സ്ഥാനമായ 50 ലക്ഷം രൂപ കരസ്ഥമാക്കി. ജില്ലാ തലത്തില്‍ രണ്ടാം സ്ഥാനമായ 20 ലക്ഷം രൂപ ജനറല്‍ ആശുപത്രി (ബീച്ച് ഹോസ്പിറ്റല്‍) കോഴിക്കോടും കരസ്ഥമാക്കി. ജില്ലാതലത്തില്‍ മൂന്നാം സ്ഥാനം ജില്ലാ അശുപത്രി ആലുവ (എറണാകുളം) 5 ലക്ഷം രൂപ കരസ്ഥമാക്കി. ജില്ലാതലത്തില്‍ 70% ത്തില്‍ കൂടുതല്‍ നേടിയ 8 ആശുപത്രികള്‍ക്ക് 3 ലക്ഷം രൂപ വീതം കമന്‍ഡേഷന്‍ അവാര്‍ഡ് ലഭിക്കുന്നതാണ്.

സബ് ജില്ലാ തലത്തില്‍ ഒന്നാം സ്ഥാനമായ 15 ലക്ഷം രൂപ ട്രൈബല്‍ സ്‌പെഷ്യാലിറ്റി ആശുപത്രി കോട്ടത്തറ, പാലക്കാട് 94.50% മാര്‍ക്കോടുകൂടി അര്‍ഹരായി. രണ്ടാം സ്ഥാനമായ 10 ലക്ഷം രൂപ താലൂക്ക് ഹെഡ്ക്വാര്‍ട്ടേഴ്‌സ് ആശുപത്രി പയ്യന്നൂര്‍, കണ്ണൂര്‍ 93.20% മാര്‍ക്കോടുകൂടി അര്‍ഹരായി. മൂന്നാം സ്ഥാനമായ 3 ലക്ഷം രൂപ താലൂക്ക് ഹെഡ്ക്വാര്‍ട്ടേഴ്‌സ് ആശുപത്രി കൊടുങ്ങല്ലൂര്‍ അര്‍ഹരായി. അതോടൊപ്പം തന്നെ സബ് ജില്ലാതലത്തില്‍ 70% ത്തില്‍ കൂടുതല്‍ മാര്‍ക്ക് നേടിയ 4 ആശുപത്രികള്‍ക്ക് 1 ലക്ഷം രൂപ വീതം കമന്‍ഡേഷന്‍ അവാര്‍ഡ് തുക ലഭിക്കുന്നതാണ്.

കമ്മ്യൂണിറ്റി ഹെല്‍ത്ത് സെന്റര്‍ വിഭാഗത്തില്‍ ഒന്നാം സ്ഥാനമായ 6 ലക്ഷം രൂപയ്ക്ക് അര്‍ഹരായിരിക്കുന്നത് കമ്മ്യൂണിറ്റി ഹെല്‍ത്ത് സെന്റര്‍ വാടാനപ്പളളി തൃശൂര്‍ ആണ്, കമ്മ്യൂണിറ്റി ഹെല്‍ത്ത് സെന്റര്‍ വിഭാഗത്തില്‍ തന്നെ രണ്ടാം സമ്മാനമായ 3 ലക്ഷം രൂപയ്ക്ക് കമ്മ്യൂണിറ്റി ഹെല്‍ത്ത് സെന്റര്‍ തലക്കളത്തൂര്‍, കോഴിക്കോടും കമ്മ്യൂണിറ്റി ഹെല്‍ത്ത് സെന്റര്‍ ബദിയഡുക്ക കാസറഗോഡും അര്‍ഹരായി. ഈ വിഭാഗത്തില്‍ തന്നെ മൂന്നാം സമ്മാനമായ 2 ലക്ഷം രൂപയ്ക്ക് സി.എച്ച്.സി. മറയൂര്‍, ഇടുക്കി അര്‍ഹരായി.

അര്‍ബന്‍ പ്രൈമറി ഹെല്‍ത്ത് സെന്റര്‍ വിഭാഗത്തില്‍ ഒന്നാം സമ്മനമായ 2 ലക്ഷം രൂപയ്ക്ക് യു.പി.എച്ച്.സി, തൃക്കാക്കര എറണാകുളം 90% മാര്‍ക്ക് നേടി അര്‍ഹരായി. രണ്ടാം സമ്മാനമായ 1.50 ലക്ഷം രൂപയ്ക്ക് യു.പി.എച്ച്.സി, പെരുന്ന, കോട്ടയം ജില്ല അര്‍ഹരായി. മൂന്നാം സമ്മാനമായ ഒരു ലക്ഷം രുപയ്ക്ക് യു.പി.എച്ച്.സി, കല്‍പ്പറ്റ വയനാട് അര്‍ഹരായി.

70%ത്തില്‍ കൂടുതല്‍ മാര്‍ക്ക് നേടിയ 6 അര്‍ബന്‍ പ്രൈമറി ഹെല്‍ത്ത് സെന്റര്‍ന് 50,000 രൂപ സമ്മാനതുക ലഭിക്കുന്നതാണ്.

പ്രാഥമികാരോഗ്യ കേന്ദ്ര വിഭാഗത്തില്‍ എല്ലാ ജില്ലകളില്‍ നിന്നും ഏറ്റവും കൂടുതല്‍ മാര്‍ക്ക് ലഭിച്ച പ്രാഥമികാരോഗ്യ കേന്ദ്രത്തിന് 2 ലക്ഷം രൂപ വീതവും ജില്ലയില്‍ തന്നെ 70% ത്തില്‍ കൂടുതല്‍ മാര്‍ക്ക് ലഭിച്ച രണ്ട് പ്രാഥമികാരോഗ്യ കേന്ദ്രങ്ങള്‍ക്ക് 50,000 രൂപ വീതവും അവാര്‍ഡ് തുക ലഭിക്കുന്നതാണ്.

ഇതോടൊപ്പം ജില്ലാതല വിജയികളേയും തെരഞ്ഞെടുത്തു. തിരുവനന്തപുരം എഫ്.എച്ച്.സി. പൂഴനാട്, കൊല്ലം പി.എച്ച്.സി. ശക്തികുളങ്ങര, ആലപ്പുഴ എഫ്.എച്ച്.സി. പാലമേല്‍, പത്തനം തിട്ട പി.എച്ച്.സി. തെള്ളിയൂര്‍, കോട്ടയം പി.എച്ച്.സി. മൂന്നിലാവ്, ഇടുക്കി പി.എച്ച്.സി. ആലകോട്, എറണാകുളം പി.എച്ച്.സി. കോട്ടപടി, തൃശൂര്‍ എഫ്.എച്ച്.സി. ദേശമംഗലം, പാലക്കാട് പി.എച്ച്.സി. തിരുമിട്ടക്കോട്, മലപ്പുറം പി.എച്ച്.സി. ചാലിയാര്‍, കോഴിക്കോട് പി.എച്ച്.സി. പുറമേരി, വയനാട് എഫ്.എച്ച്.സി. നൂല്‍പ്പുഴ, കണ്ണൂര്‍ എഫ്.എച്ച്.സി. കൊട്ടിയൂര്‍, കാസര്‍ഗോഡ് എഫ്.എച്ച്.സി. കയ്യൂര്‍, പി.എച്ച്.സി. വലിയപറമ്പ എന്നിവയാണ് ജില്ലാതല വിജയികള്‍.