ഭിന്നശേഷി സഹായക ഉപകരങ്ങളുടെ വിപുലമായ ഷോറൂമുകള് ആരംഭിക്കാനൊരുങ്ങി ആരോഗ്യ സാമൂഹ്യനീതി വകുപ്പ്
തിരുവനന്തപുരം: സംസ്ഥാനത്ത് ഭിന്നശേഷിക്കാര്ക്ക് സഹായകരമായ ഉപകരണങ്ങളുടെ ഷോറൂം ഉടന് ആരംഭിക്കുമെന്നും അതുകഴിഞ്ഞ് സഹായ ഉപകരണങ്ങളുടെ നവീന നിര്മ്മാണ കേന്ദ്രം തുടങ്ങുമെന്നും ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്. സാമൂഹ്യനീതി വകുപ്പിന്റെ കേരള സംസ്ഥാന വികലാംഗ ക്ഷേ കോര്പ്പറേഷന്റെ ശുഭയാത്ര പദ്ധതിയിലൂടെ നിരവധി ഭിന്നശേഷിക്കാര്ക്കാണ് സഹായ ഉപകരണങ്ങള് വിതരണം ചെയ്തുവരുന്നത്. കൂടാതെ ഭിന്നശേഷിക്കാര്ക്കായി മെഗാ മെഡിക്കല് ക്യാമ്പ് നടത്തി ആയിരക്കണക്കിന് പേര്ക്ക് സഹായ ഉപകരണങ്ങള് വിതരണം ചെയ്തു. കാസര്ഗോഡ് ഡിസെബിലിറ്റി വില്ലേജും ജില്ലകള് തോറും ഡിസെബിലിറ്റി കേന്ദ്രങ്ങളും സ്ഥാപിക്കുന്നതാണെന്നും മന്ത്രി പറഞ്ഞു. തൈക്കാട് ഗവ. ഗസ്റ്റ്ഹൗസില് കേരള സംസ്ഥാന വികലാംഗ ക്ഷേമ കോര്പറേഷന്റെ നേതൃത്വത്തില് നടന്ന ഭിന്നശേഷിക്കാര്ക്കുള്ള വാഹന വായ്പ വിതരണം ഉദ്ഘാടനം നിര്വഹിച്ച് സംസാരിക്കുകയായിരുന്നു മന്ത്രി.
ആരോഗ്യ വകുപ്പുമായി സഹകരിച്ച് സാമൂഹ്യനീതി വകുപ്പിന് കീഴില് ഭിന്നശേഷിക്കാര്ക്കായി നിരവധി പ്രവര്ത്തനങ്ങളാണ് നടത്തി വരുന്നതെന്ന് മന്ത്രി പറഞ്ഞു. സാമൂഹ്യനീതി വകുപ്പില് നിന്നും സ്ത്രീകളുടേയും കുട്ടികളുടേയും വികസനത്തിന് വേണ്ടി പ്രത്യേക വകുപ്പ് ആരംഭിച്ചതോടെ വയോജനങ്ങള്, ഭിന്നശേഷിക്കാര്, ട്രാന്സ്ജെന്ഡേഴ്സ് എന്നിവര്ക്കായി ശ്രദ്ധിക്കാന് ഈ വകുപ്പിനായി. പാര്ശ്വവത്ക്കരിക്കപ്പെട്ട ജനവിഭാഗത്തിനായി സാമൂഹ്യനീതി വകുപ്പിന് കീഴിലുള്ള വികലാംഗക്ഷേമ കോര്പറേഷന്, സാമൂഹ്യ സുരക്ഷാമിഷന് എന്നിവ ഒട്ടേറെ ക്ഷേമ പ്രവര്ത്തനങ്ങളാണ് നടത്തി വരുന്നത്. ഇത് വിപുലീകരിക്കാനുള്ള ശ്രമത്തിലാണ് സര്ക്കാര്.
ജന്മനായുള്ള വൈകല്യങ്ങള് കണ്ടുപിടിച്ച് മതിയായ ചികിത്സ ഉറപ്പുവരുത്തുന്ന സാമൂഹ്യ സുരക്ഷാമിഷന്റെ അനുയാത്ര, കാതോരം, ശ്രുതിതരംഗം തുടങ്ങിയ പദ്ധതികള് വന് വിജയത്തിലാണ്. ഇതുകൂടാതെ വിവിധ പുനരധിവാസ പദ്ധതികളും നടത്തിവരുന്നു.
സാമൂഹ്യനീതി വകുപ്പിന്റെ പ്രവര്ത്തന മികവിന് രണ്ട് ദേശീയ അവാര്ഡുകളാണ് ഈ വര്ഷം ലഭിച്ചത്. രാഷ്ട്രപതിയില് നിന്നും വയോജനങ്ങളുടെ സംരക്ഷണത്തിന് നല്കിയ മാതൃകാപരമായ പ്രവര്ത്തനം കണക്കിലെടുത്ത് 'വയോശേഷ്ഠ' പുരസ്കാരം ലഭിച്ചിരുന്നു. ഇപ്പോള് 'എന്.എച്ച്.എഫ്.ഡി.സി.യുടെ മികച്ച സംസ്ഥാന ചാനലൈസിംഗ് ഏജന്സി' വിഭാഗത്തില് സംസ്ഥാന വികലാംഗ ക്ഷേമ കോര്പറേഷനും ദേശീയ പുരസ്കാരം ലഭിച്ചിരിക്കുന്നു. 2000ല് സ്വയംതൊഴില് വായ്പ ആരംഭിച്ച വികലാംഗ ക്ഷേമ കോര്പറേഷന് 16 വര്ഷം കൊണ്ട് ഏകദേശം 25 കോടി രൂപയായിരുന്നു സ്വയം തൊഴില് വായ്പയായി നല്കിയിരുന്നത്. എന്നാല് കഴിഞ്ഞ രണ്ട് വര്ഷം കൊണ്ട് വായ്പ മേളകള് ഉള്പ്പെടെ സംഘടിപ്പിച്ച് 16.5 കോടി രൂപ വായ്പയായി നല്കാന് കഴിഞ്ഞിട്ടുണ്ടെന്നും മന്ത്രി വ്യക്തമാക്കി.
വികലാംഗക്ഷേമ കോര്പറേഷന് ചെയര്മാന് അഡ്വ. പരശുവയ്ക്കല് മോഹനന് അധ്യക്ഷത വഹിച്ച ചടങ്ങില് മാനേജിംഗ് ഡയറക്ടര് കെ. മൊയ്തീന് കുട്ടി സ്വാഗതമാശംസിച്ചു. പ്ലാനിംഗ് ബോര്ഡ് അംഗം ഡോ. മൃദുല് ഈപ്പന്, ജില്ല പഞ്ചായത്ത് പ്രസിഡന്റ് വി.കെ. മധു എന്നിവര് മുഖ്യാതിഥികളായ ചടങ്ങില് സാമൂഹ്യനീതി വകുപ്പ് സ്പെഷ്യല് സെക്രട്ടറി ബിജു പ്രഭാകര് ഐ.എ.എസ്. മുഖ്യ പ്രഭാഷണം നടത്തി. വനിത ശിശുവികസന വകുപ്പ് ഡയറക്ടര് ഷീബ ജോര്ജ് ഐ.എ.എസ്., സാമൂഹ്യ സുരക്ഷാമിഷന് എക്സിക്യുട്ടീവ് ഡയറക്ടര് ഡോ. മുഹമ്മദ് അഷീല്, നിഷ് എക്സി. ഡയറക്ടര് സതീഷ് കുമാര്, കൗണ്സിലര് വിദ്യ മോഹന്, ഡയറക്ടര്മാരായ ഒ. വിജയന്, ഗിരീഷ് കീര്ത്തി, കെ.ജി. സജന്, മുന് ഡയറക്ടര് കൊറ്റാമം വിമല്കുമാര് എന്നിവര് ആശംസകള് അര്പ്പിച്ചു.
https://www.facebook.com/Malayalivartha
