കനകദുര്‍ഗയും ബിന്ദുവും ശശികലയും മലകയറിയത് കൂടാതെ പത്തോളം യുവതികള്‍ ദര്‍ശനം നടത്തിയെന്ന് ദേവസ്വം മന്ത്രി കടകംപള്ളി സുരേന്ദ്രന്‍ വെളിപ്പെടുത്തി. സ്ത്രീകളുടെ പ്രായം നോക്കാതെ ശബരിമല ദര്‍ശനം നടത്താന്‍ സുപ്രീംകോടതി ഭരണഘടനാ ബെഞ്ച് അനുമതി നല്‍കിയിട്ടുണ്ട്. കോടതി വിധി പ്രകാരം ധാരാളം യുവതികള്‍ ശബരിമല ദര്‍ശനം നടത്തിയിട്ടുണ്ട്. ഇതൊന്നും മാധ്യമങ്ങള്‍ പുറത്തറിയിക്കാത്തത് കൊണ്ടാണ് പൊതുജനം അറിയാത്തത്. യുവതികളെ ആരും നിര്‍ബന്ധിപ്പിച്ച് മലകയറ്റിയിട്ടില്ലെന്നും ദേവസ്വം മന്ത്രി വ്യക്തമാക്കി.

ആര്‍എസ്എസിന്റെ നേതൃത്വത്തില്‍ ശബരിമല കര്‍മസമിതി പ്രവര്‍ത്തകര്‍ എത്ര ബഹളം വച്ചിട്ടും കാര്യമില്ല. നിരവധി യുവതികള്‍ ശബരിമല പതിനെട്ടാംപടി കയറി ദര്‍ശനം നടത്തിക്കഴിഞ്ഞു. പ്രായഭേദമന്യേ ആര്‍ക്കും ആര്‍ക്കും ശബരിമലയില്‍ ദര്‍ശനം നടത്താം. അതേസമയം ആക്ടിവിസ്റ്റുകള്‍ വരേണ്ടെന്ന മുന്‍നിലപാടില്‍ നിന്ന് മന്ത്രി മലക്കംമറിഞ്ഞു. ശബരിമലയില്‍ വിശ്വാസികളായ ആക്റ്റിവിസ്റ്റുകള്‍ക്ക് വരാമെന്ന് മന്ത്രി വെളിപ്പെടുത്തി. ശബരിമല ദര്‍ശനം നടത്തിയ യുവതികള്‍ക്ക് പ്രത്യേക ലക്ഷ്യങ്ങളൊന്നും ഉണ്ടായിരുന്നില്ല. അവര്‍ കയറിയപ്പോള്‍ ഭക്തരാരും പ്രതിഷേധിച്ചില്ല. അത് വ്യക്തമാക്കുന്നതെന്താണെന്നും കടകംപള്ളി ചോദിച്ചു.

ശബരിമലയില്‍ ആക്ടിവിസ്റ്റുകള്‍ വരേണ്ടെന്ന് ആദ്യം പറഞ്ഞ ദേവസ്വംമന്ത്രി പിന്നീട് യുവതികള്‍ ദര്‍ശനം നടത്താന്‍ വരേണ്ടെന്ന് പറഞ്ഞു. അതിനെതിരെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും മുഖ്യമന്ത്രി പിണറായി വിജയനും രംഗത്തെത്തി. അതോടെ ബി.ജെ.പിയും കോണ്‍ഗ്രസും സര്‍ക്കാരിനെതിരെ രംഗത്തെത്തിയിരുന്നു. അതിന് ശേഷമാണ് യുവതികള്‍ ശബരിമല ദര്‍ശനം നടത്തിയത്.