ആറന്മുളയില്‍ വോട്ടെടുപ്പ് കഴിഞ്ഞ് മടങ്ങവെ കോണ്‍ഗ്രസ് ബൂത്ത് ഏജന്റിന് നേരെ ഡി വൈ എഫ് ഐ പ്രവര്‍ത്തകരുടെ ആക്രമണമെന്ന് പരാതി. ആറന്മുള വല്ലനയിലെ കോണ്‍ഗ്രസ് ബൂത്ത് ഏജന്റായ ഷാജി പി എച്ച് (64) ആണ് മര്‍ദ്ദനത്തിനിരയായത്. വോട്ടെടുപ്പ് കഴിഞ്ഞ് വീട്ടിലേക്ക് മടങ്ങുന്നതിനിടെയാണ് ഷാജിക്ക് നേരെ ആക്രമണമുണ്ടായത്. സംഭവത്തിന്റെ സി സി ടി വി ദൃശ്യങ്ങള്‍ ഇതിനോടകം പുറത്തുവന്നിട്ടുണ്ട്. ആറന്മുളയിലെ യു ഡി എഫ് സ്ഥാനാര്‍ഥി അബിന്‍ വര്‍ക്കിയുടെ, വല്ലന ബൂത്തിലെ ഏജന്റായിരുന്നു ഷാജി. വോട്ടിംഗ് സമയത്തെ തര്‍ക്കങ്ങളുടെ തുടര്‍ച്ചയായാണ് ഡി വൈ എഫ് ഐയുടെ ആക്രമണമെന്നാണ് കോണ്‍ഗ്രസ് പ്രവര്‍ത്തകര്‍ പറയുന്നത്. സി സി ടി വി ദൃശ്യങ്ങളടക്കമാണ് കോണ്‍ഗ്രസ് പ്രവര്‍ത്തകര്‍ പരാതിയുമായി രംഗത്തെത്തിയിരിക്കുന്നത്.