വനിതാ ബൂത്ത് ഏജന്റിനെതിരെ നായ്ക്കുരണ പൊടി പ്രയോഗമെന്ന് പരാതി. പേരാവൂരിലെ മുഴക്കുന്ന് യുപി സ്‌കൂളിലെ യുഡിഎഫ് ഏജന്റ് സജിതാ മോഹന്റെ ദേഹത്തേക്ക് നായ്ക്കുരണ പൊടി വിതറി എന്നാണ് പരാതി. യുഡിഎഫ് സ്ഥാനാര്‍ത്ഥി സണ്ണി ജോസഫ് കര്‍ശന നടപടി ആവശ്യപ്പെട്ടു. കാസര്‍കോട് ഉദിനൂരിലും സമാന സംഭവം റിപ്പോര്‍ട്ട് ചെയ്തു. ബൂത്ത് 154 ലെ യുഡിഎഫ് വനിതാ ഏജന്റാണ് പരാതി ഉന്നയിച്ചത്. കള്ളവോട്ട് ചോദ്യം ചെയ്തപ്പോഴാണ് എല്‍ഡിഎഫ് ആക്രമണമെന്ന് യുഡിഎഫ് പറയുന്നു. അതിനിടെ തളിപ്പറമ്പില്‍ 165ആം ബൂത്തിലെ ബിജെപിയുടെ ബൂത്ത് ഏജന്റിനെ സിപിഎം പ്രവര്‍ത്തകര്‍ മര്‍ദിച്ചതായും പരാതി ഉയര്‍ന്നു.

പയ്യന്നൂരില്‍ കളളവോട്ട് നടന്നതായി യുഡിഎഫ് പിന്തുണയോടെ മത്സരിക്കുന്ന വി കുഞ്ഞികൃഷ്ണന്‍ ആരോപിച്ചു. വ്യാജ ഐഡന്റിറ്റി കാര്‍ഡ് ഉപയോഗിക്കുന്നെന്ന് നേരത്തെ പരാതി നല്‍കിയിരുന്നുവെന്നും ഉച്ചക്ക് ശേഷം വ്യാപകമായി കള്ളവോട്ട് നടന്നെന്നുമാണ് കുഞ്ഞികൃഷ്ണന്‍ പറയുന്നത്. കള്ളവോട്ട് ചലഞ്ച് ചെയ്തവര്‍ക്കെതിരെ ബൂത്തില്‍ കയറി പ്രശ്‌നം ഉണ്ടാക്കി. പ്രിസൈഡിങ് ഓഫീസര്‍മാര്‍ ഇത്. പരിശോധിച്ചില്ല. കണ്ടോത്ത് സ്‌കൂളില്‍ സഹകരണ ബാങ്ക് ജീവനക്കാരന്റെ ഭാര്യ കള്ളവോട്ട് ചെയ്യാന്‍ എത്തി. ഇവരെ പ്രിസൈഡിങ് ഓഫീസര്‍ ഓടി രക്ഷപ്പെടാന്‍ അനുവദിച്ചെന്നും കുഞ്ഞികൃഷ്ണന്‍ ആരോപിച്ചു.

അതേസമയം കള്ളവോട്ട് ആരോപണങ്ങള്‍ മാധ്യമങ്ങള്‍ ഉണ്ടാക്കുന്ന പ്രശ്‌നമാണെന്നാണ് എല്‍ഡിഎഫ് സ്ഥാനാര്‍ത്ഥി മധുസൂദനന്റെ ആരോപണം. ഒരു നാടിനെ അപമാനിക്കുകയാണ്. മാനസിക വിഭ്രാന്തി ബാധിച്ച് പലതും വിളിച്ച് പറയുകയാണ് വി കുഞ്ഞികൃഷ്ണന്‍. 'കള്ളവോട്ട് ചെയ്യുകയാണോ ഞങ്ങളുടെ പണിയെന്നും പയ്യന്നൂര്‍ ഞങ്ങളുടെ ശക്തികേന്ദ്രമാണെ'ന്നും മധുസൂദനന്‍ അവകാശപ്പെട്ടു.