കേന്ദ്രസര്ക്കാര് തൊഴിലാളികളെ വെല്ലുവിളിക്കുകയാണ്; ദേശീയ പണിമുടക്കില്നിന്ന് വിനോദസഞ്ചാരമേഖലയെ ഒഴിവാക്കിയതായി എളമരം കരീം
കേന്ദ്രസര്ക്കാര് തൊഴിലാളികളെ വെല്ലുവിളിക്കുകയാണെന്ന് സിഐടിയു സംസ്ഥാന ജനറല്സെക്രട്ടറി എളമരം കരീം പറഞ്ഞു. ദേശീയ പണിമുടക്ക് സംബന്ധിച്ച് വിളിച്ചുചേര്ത്ത വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം. ട്രേഡ് യൂണിയനുകളുടെ ശബ്ദം പരിഗണിക്കാന് കേന്ദ്രസര്ക്കാര് തയ്യാറാവുന്നില്ല.
തൊഴിലാളികളുടെ ജീവിതപ്രശ്നങ്ങളില് ഒന്നിനുപോലും പരിഹാരമാകുന്നില്ല. ട്രേഡ് യൂണിയന് നിയമം ഭേദഗതി ചെയ്ത് ഭരണമുന്നണിക്ക് ഇഷ്ടമില്ലാത്തവരെ മാറ്റിനിര്ത്താനുള്ള നീക്കമാണ് നടക്കുന്നത്. അങ്ങനെ വന്നാല് സര്ക്കാരിന് തൊഴിലാളിവിരുദ്ധ നീക്കങ്ങളുമായി പോകാം. തൊഴില് നിയമങ്ങള് തൊഴിലാളികളുടെ നിലവിലുള്ള അവകാശങ്ങള് നിയന്ത്രിക്കുന്ന തരത്തിലേക്കാണ് ഭേദഗതി ചെയ്യുന്നത്. ഇത്തരത്തില് നാലര വര്ഷമായി കേന്ദ്ര ഭരണാധികാരികള് തുടരുന്ന ജനദ്രോഹ നയങ്ങള്ക്കെതിരെയാണ് നാല്പ്പത്തെട്ട് മണിക്കൂര് പണിമുടക്ക്.
ദേശീയ പണിമുടക്കില്നിന്ന് വിനോദസഞ്ചാരമേഖലയെ ഒഴിവാക്കിയതായി എളമരം കരീം എംപി പറഞ്ഞു. വിദേശികളും സ്വദേശികളുമായ വിനോദസഞ്ചാരികള്ക്കോ അവര് താമസിക്കുന്ന ഹോട്ടലുകള്ക്കോ അവരുടെ യാത്രാ സൗകര്യങ്ങള്ക്കോ ഒരു തരത്തിലുള്ള തടസവും ഇല്ലാതിരിക്കാന് പ്രത്യേക നിര്ദേശം നല്കിയിട്ടുണ്ട്. ശബരിമല തീര്ഥാടകര്ക്ക് പണിമുടക്ക് ഒരു തടസവും ഉണ്ടാക്കില്ല. നിര്ബന്ധിച്ച് ഒരു കടയും അടപ്പിക്കില്ല.
https://www.facebook.com/Malayalivartha
