ശബരിമലയില്‍ യുവതികള്‍ ദര്‍ശനം നടത്തിയതിന് പിന്നാലെ ശബരിമല കര്‍മസമിതി നടത്തിയ അക്രമങ്ങളില്‍ 5397 പേരെ അറസ്റ്റ് ചെയ്തു. 4666 പേരെ ജാമ്യത്തില്‍ വിട്ടയച്ചു. 731 പേര്‍ റിമാന്‍ഡിലാണ്. ശബരിമല വിഷയത്തെ തുടര്‍ന്ന് വര്‍ഗ്ഗീയത പരത്തുന്ന സന്ദേശം പ്രചരിപ്പിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് ഡി.ജി.പി ലോക്‌നാഥ് ബഹ്‌റ അറിയിച്ചു. നവമാധ്യമങ്ങളിലൂടെയും അല്ലാതെയും മതവിദ്വേഷവും വര്‍ഗീയതയും പ്രചരിപ്പിക്കുന്നവര്‍ക്കെതിരെ ശക്തമായ നടപടി സ്വീകരിക്കുമെന്ന് സംസ്ഥാന പോലീസ് മേധാവി ലോക്‌നാഥ് ബെഹ്‌റ അറിയിച്ചു.

ഇത്തരം സന്ദേശങ്ങളും പ്രസംഗങ്ങളും വീഡിയോയും വ്യാപകമായി പ്രചരിപ്പിക്കുന്നത് പൊലീസിന്റെ ശ്രദ്ധയില്‍ പെട്ടിട്ടുണ്ട്. ഇതിനു പിന്നില്‍ പ്രവര്‍ത്തിച്ചവരെ കണ്ടെത്തുന്നതിന് നിര്‍ദ്ദേശം നല്‍കിക്കഴിഞ്ഞു. സമൂഹത്തില്‍ സ്പര്‍ധ വളര്‍ത്തുന്നതിന് നടത്തുന്ന ഇത്തരം ശ്രമങ്ങള്‍ക്കു പിന്നിലുള്ളവരെ കണ്ടെത്തി നിയമത്തിനു മുന്നില്‍ കൊണ്ടുവരുമെന്ന് അദ്ദേഹം വ്യക്തമാക്കി. സംസ്ഥാനത്ത് പോലീസ് പുലര്‍ത്തിവരുന്ന ജാഗ്രത ഏതാനും ദിവസം കൂടി തുടരാന്‍ ജില്ലാ പോലീസ് മേധാവിമാരോട് ആവശ്യപ്പെട്ടിട്ടുണ്ട്. നിലവിലുള്ള പോലീസ് സന്നാഹവും തുടരും. അക്രമത്തില്‍ പങ്കെടുത്തവര്‍ എല്ലാവരും ഉടന്‍ തന്നെ പിടിയിലാകുമെന്നും അദ്ദേഹം അറിയിച്ചു.

സി.പി.എം , സി.പി.ഐ, ബി.ജെ.പി ഓഫീസുകള്‍ക്ക് നേരെ നടന്ന് വന്ന അക്രമങ്ങള്‍ അവസാനിച്ചിട്ടുണ്ട്. സംസ്ഥാനത്തുടനീളം മാധ്യമപ്രവര്‍ത്തകരെ ഹര്‍ത്താല്‍ അനുകൂലികള്‍ ആക്രമിച്ച കേസുകളില്‍ അന്വേഷണം ആരംഭിച്ചു. ഹര്‍ത്താല്‍ അക്രമം തടയുന്നതിനും മുന്‍ കൂട്ടി അറിയുന്നതിലും പൊലീസിന് വീഴ്ച പറ്റിയെന്ന് ഡി.ജി.പി എസ്.പിമാരെ അറിയിച്ചതായുള്ള റിപ്പോര്‍ട്ട് മുഖ്യമന്ത്രി തിരുത്തി. പൊലീസിന് വീഴ്ച പറ്റിയില്ലെന്നാണ് അദ്ദേഹം പറഞ്ഞത്. അക്രമികളെ പിടികൂടാന്‍ നിലയ്ക്കല്‍ മാതൃകയില്‍ അക്രമികളുടെ ഫോട്ടോ ലുക്ക്ഔട്ട് നോട്ടീസ് പുറത്ത് വിടാനും ആലോചിക്കുന്നുണ്ട്.