ശബരിമല സുപ്രീംകോടതി വിധിയുടെ മറവില്‍ സര്‍ക്കാര്‍ കലാപം നടത്തുന്നെന്ന എന്‍.എസ്.എസിന്റെ ആരോപണത്തിന് സര്‍ക്കാരിന്റെ ചുട്ട മറുപടി. എന്‍.എസ്.എസ് ജനറല്‍ സെക്രട്ടറി കലാപത്തിന് ആഹ്വാനം ചെയ്തിരിക്കുകയാണെന്ന് ദേവസ്വം മന്ത്രി കടകംപള്ളി സുരേന്ദ്രന്‍ ആരോപിച്ചു.

എന്‍.എസ്.എസ് നിലപാട് അത്ഭുതപ്പെടുത്തുന്നു. അവരെ പോലൊരു നവോത്ഥാന സംഘടനയില്‍ നിന്ന് ഇത് പ്രതീക്ഷിച്ചില്ല. ഭരണഘടനയെ ഉയര്‍ത്തിപ്പിടിക്കാനാണ് സര്‍ക്കാര്‍ ശ്രമിക്കുന്നത്. സുപ്രീംകോടതി വിധി നടപ്പാക്കാനുള്ള പിന്‍ബലമാണ് സര്‍ക്കാര്‍ നല്‍കുന്നത്. അല്ലാതെ വിശ്വാസം ഇല്ലാതാക്കാനല്ലെന്നും മന്ത്രി വ്യക്തമാക്കി. സംഘപരിവാറിനെ പിന്തുണയ്ക്കുന്ന നിലപാട് തിരുത്തണം. കലാപകാരികളെ സംരക്ഷിക്കുന്ന നിലപാടാണ് എടുത്തത്. ഇത് അത്ഭുതപ്പെടുത്തുന്നെന്നും മന്ത്രി പറഞ്ഞു. 

ശബരിമലയില്‍ കോടതി വിധി നടപ്പാക്കുന്നതില്‍ യഥാര്‍ത്ഥവിശ്വാസികള്‍ക്ക് അതൃപ്തിയില്ല. എന്‍എസ്.എസ് ശബരിമല വിഷയം വസ്തുനിഷ്ഠമായി പഠിക്കാന്‍ തയ്യാറാകണം. സര്‍ക്കാര്‍ നിരീശ്വരവാദം പ്രോത്സാഹിപ്പിക്കുന്നു എന്നത് തെറ്റായ പ്രചരണമാണ്. സുകുമാരന്‍ നായര്‍ എല്‍.ഡി.എഫ് നയം വായിച്ച് നോണമെന്നും മന്ത്രി ആവശ്യപ്പെട്ടു. എന്‍.എസ്.എസ് സമദൂരത്തോടെയല്ല കാര്യങ്ങള്‍ കാണുന്നതെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. സമൂഹത്തെ വിഭജിച്ച് ഇടത്പക്ഷത്തെ ആക്രമിക്കാന്‍ നോക്കണ്ടെന്നും കാനം വ്യക്തമാക്കി. എന്‍.എസ്.എസിന്റെ പ്രസ്താവന നിലവാരമില്ലാത്തതാണ്. ഇത്തരം പ്രസ്താവന നടത്തരുതായിരുന്നു. വിശ്വാസവും ഭരണഘടനയും സംരക്ഷിക്കേണ്ടത് സര്‍ക്കാരിന്റെ ബാധ്യതയാണെന്നും ഇ.പി ജയരാജന്‍ പറഞ്ഞു. 

മന്ത്രിമാരും ഇടത് നേതാക്കളും രംഗത്ത് എത്തിയതോടെ എന്‍.എസ്.എസിനെതിരെ യാതൊരുതരത്തിലുമുള്ള വി്ട്ട് വീഴ്ചയും നടത്തേണ്ട എന്ന നിലപാടിലേക്ക് സര്‍ക്കാരും മുന്നണിയും എത്തിയെന്ന് ഇതോടെ വ്യക്തമായി. എന്‍.എസ്.എസ് ആര്‍.എസ്.എസിന് കുടപിടിക്കുകയാണെന്നാണ് എല്‍.ഡി.എഫ് ആരോപണം. സമുദായത്തെ സുകുമാരന്‍ നായര്‍ ആര്‍.എസ്.എസിന്റെ തൊഴുത്തില്‍ കെട്ടാന്‍ ശ്രമിക്കുന്നെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നേരത്തെ ആരോപിച്ചിരുന്നു.