തന്ത്രിയെ മാറ്റാന്‍ അധികാരമുണ്ടെന്ന് ദേവസ്വം കമ്മീഷ്ണര്‍ എന്‍.വാസു വാര്‍ത്താസമ്മേളനത്തില്‍ അറിയിച്ചു. ബിന്ദുവും കനകദുര്‍ഗയും ദര്‍ശനം നടത്തിയതിന് പിന്നാലെ തന്ത്രി ദേവസ്വം ബോര്‍ഡുമായി ആലോചിക്കാതെ ശുദ്ധിക്രീയ നടത്തിയത് ശരിയായില്ല. അതിനാണ് വിശദീകരണ നോട്ടീസ് നല്‍കിയത്. 14 ദിവസത്തിനകം തന്ത്രി വിശദീകരണം നല്‍കണമെന്നാണ് ആവശ്യപ്പെട്ടിരിക്കുന്നത്. ശുദ്ധിക്രീയ സുപ്രീംകോടതി വിധിക്കെതിരാണ്. ഇനി വാദത്തിന് വേണ്ടി ശുദ്ധിക്രീയ നടത്തിയത് തെറ്റല്ലെന്ന് പറഞ്ഞാല്‍ തന്നെ അത് ദേവസ്വം ബോര്‍ഡുമായി ആലോചിക്കണമായിരുന്നു. താന്‍ ശുദ്ധിക്രീയ നടത്താന്‍ പോവുകയാണെന്ന് പ്രസിഡന്റ് എ. പത്മകുമാറിനോട് പറഞ്ഞ ശേഷം തന്ത്രി ഫോണ്‍ കട്ട് ചെയ്യുകയായിരുന്നു.

ക്ഷേത്രത്തിന്റെ ഉടമസ്ഥാവകാശം ദേവസ്വംബോര്‍ഡിനാണ്. ശുദ്ധിക്രീയ ഉള്‍പ്പെടെയുള്ളവ നടത്തുന്നതിന് മുന്‍പ് ബോര്‍ഡിനോട് അനുമതി തേടണം ദേവസ്വം മാന്വലില്‍ അത് വ്യക്തമായി പറയുന്നുണ്ട്. ആചാരപ്രകാരമുള്ള താന്ത്രിക ക്രിയ പാലിക്കാന്‍ തന്ത്രിക്ക് അവകാശമില്ലേ എന്ന് മാധ്യമപ്രവര്‍ത്തകര്‍ ചോദിച്ചപ്പോള്‍ ശുദ്ധിക്രിയ സുപ്രീംകോടതി ഉത്തരവിനെതിരാണെങ്കില്‍ അതിന് ദേവസ്വംബോര്‍ഡിന്റെ അനുമതി തേടിയേ തീരൂ എന്നും എന്‍ വാസു ആവര്‍ത്തിച്ചു. ശബരിമല ക്ഷേത്രത്തിന്റെ ഉടമസ്ഥാവകാശവും ഭരണാധികാരവും ദേവസ്വംബോര്‍ഡിനാണെന്നും സന്നിധാനത്ത് ചേര്‍ന്ന ദേവസ്വംബോര്‍ഡ് അവലോകനത്തിന് ശേഷം അദ്ദേഹം വ്യക്തമാക്കി.

അവലോകനയോഗത്തിലാണ് തന്ത്രിയോട് വിശദീകരണം തേടാന്‍ തീരുമാനമായത്. തന്ത്രി ദേവസ്വം ജീവനക്കാരനല്ലെങ്കിലും മാറ്റാന്‍ ബോര്‍ഡിന് അധികാരമുണ്ട്. തന്ത്രിയുടെ കുടുംബത്തിലെ മുതിര്‍ന്ന അംഗവുമായി ആലോചിച്ച് ആ കുടുംബത്തിലെ മറ്റേതെങ്കിലും അംഗത്തിന് തന്ത്രി സ്ഥാനം നല്‍കാം. അല്ലെങ്കില്‍ അവരുടെ നിര്‍ദ്ദേശപ്രകാരം മറ്റൊരാളെ തന്ത്രിയാക്കാം. അതാണ് ദേവസ്വം മാന്വലില്‍ പറയുന്നതെന്ന് മുന്‍ ദേവസ്വം ബോര്‍ഡ് പ്രസിഡന്റ് രാജഗോപാലന്‍ നായര്‍ വ്യക്തമാക്കി.