ശബരിമല ദര്‍ശനം നടത്തി മടങ്ങിയ സംഘം സഞ്ചരിച്ച വാന്‍ ലോറിയുമായി കൂട്ടിയിടിച്ച് വൻ ദുരന്തം.10 പേര്‍ മരിച്ചു. അഞ്ചുപേര്‍ക്ക് പരിക്കേറ്റു. പുതുക്കോട്ട ജില്ലയിലെ തിരുമയത്തില്‍ വെച്ചാണ് അപകടമുണ്ടായത്. തെലുങ്കാനയില്‍ നിന്നും വന്ന തീര്‍ത്ഥാടക സംഘത്തിന്റെ വാഹനമാണ് അപകടത്തില്‍ പെട്ടത്. ശബരിമല ദര്‍ശനത്തിന് ശേഷം രാമേശ്വരത്തേക്ക് പോയി മടങ്ങും വഴിയായിരുന്നു അപകടം. അമിതവേഗത്തില്‍ വന്ന ലോറിയാണ് അപകടമുണ്ടാക്കിയതെന്ന് പോലീസ് വ്യക്തമാക്കി.

തെലുങ്കാന കാശിപത് സ്വദേശികളാണ് മരിച്ചത്. ആര്‍. നാഗരാജ് (35), എ. മഹേഷ് (28) എം.കുമാര്‍ (22), ശ്യാം (22), എസ് പ്രവീണ്‍(24), എം സായി(22), ആഞ്ജനേയലു (25), സുരേഷ് (25) വാന്‍ ഡ്രൈവറുമാണ് മരിച്ചത്. ഇയാളെ തിരിച്ചറിഞ്ഞിട്ടില്ല. അപകടത്തില്‍ പരിക്കേറ്റവരെ ആശുപത്രിയില്‍ പ്രവേശിപ്പിച്ചിരിക്കുകയാണ്. അപകടത്തില്‍ വാന്‍ പൂര്‍ണമായും തകര്‍ന്നു. ലോറിഡ്രൈവര്‍ അപ്പോള്‍ തന്നെ ഓടി് രക്ഷപെട്ടു. ഇയാള്‍ക്കെതിരെ അന്വേഷണം തുടരുകയാണ്.