ദേവസ്വം ബോര്‍ഡിന്റെ ക്ഷേത്രങ്ങളില്‍ കാണിക്കയിടരുതെന്ന ക്യാമ്പയിന്‍ വീണ്ടും ശക്തി പ്രാപിക്കുന്നു. മണ്ഡലമകരവിളക്ക് ഉത്സവകാലത്ത് ശനിയാഴ്ചവരെയുള്ള ശബരിമല നടവരവില്‍ 71.47 കോടി രൂപയുടെ കുറവ്. മകരവിളക്കുത്സവത്തിന് നടതുറന്ന് ആറുദിവസത്തെ വരുമാനത്തില്‍മാത്രം 9.15 കോടി രൂപയുടെ കുറവുണ്ടായി. വൃശ്ചികം ഒന്നുമുതല്‍ ശനിയാഴ്ച വരെ ആകെ നടവരവ് 131.45 കോടി രൂപയാണ്. കഴിഞ്ഞ തീര്‍ഥാടനകാലത്ത് ഇത് 202.92 കോടിയായിരുന്നു. മണ്ഡലവിളക്കു കഴിഞ്ഞ് നടയടച്ചപ്പോള്‍ 62.32 കോടിയുടെ കുറവുണ്ടായിരുന്നു.

ഡിസംബര്‍ 30 മുതല്‍ ജനുവരി ആറുവരെ 20.49 കോടി രൂപയാണ് നടവരവ്. കഴിഞ്ഞവര്‍ഷം ഇതേസമയം മകരവിളക്കുകാലത്ത് 29.64 കോടി രൂപയാണ് ലഭിച്ചത്. അരവണ വിറ്റയിനത്തില്‍ 9.43 കോടി രൂപ ലഭിച്ചു. കഴിഞ്ഞവര്‍ഷം ഇത് 10.22 കോടി രൂപയായിരുന്നു. മകരവിളക്ക് ഉത്സവത്തിന്റെ ആറുദിവസം പിന്നിടുമ്പോള്‍ അപ്പം വിറ്റയിനത്തില്‍ 96.52 ലക്ഷം രൂപയാണ് വരവ്. കഴിഞ്ഞവര്‍ഷം ഇത് 1.58 കോടി രൂപയായിരുന്നു. കാണിക്കയിനത്തില്‍ 8.06 കോടി ലഭിച്ചു. കഴിഞ്ഞവര്‍ഷം ഈ ആറുദിവസങ്ങളില്‍ 9.51 കോടി രൂപ ലഭിച്ചിരുന്നു.

അതേസമയം ക്രെഡിറ്റ്‌ഡെബിറ്റ് കാര്‍ഡുകള്‍ ഉപയോഗിച്ച് കാണിക്ക നല്‍കുന്നവരുടെ എണ്ണം കൂടി. ശനിയാഴ്ചയാണ് ഏറ്റവും കൂടുതല്‍ പേര്‍ ഇങ്ങനെ കാണിക്കയിട്ടത്. 102 പേര്‍ ഇകാണിക്കയായി 34,251 രൂപ നല്‍കി. ഡിസംബര്‍ ആറുമുതലാണ് ദേവസ്വം ബോര്‍ഡ്, സൗത്ത് ഇന്ത്യന്‍ ബാങ്കുമായി ചേര്‍ന്ന് ഇ കാണിക്ക സംവിധാനം ഏര്‍പ്പെടുത്തിയത്.

ശബരിമലയിലെ നടവരവിലുണ്ടായ കുറവ് ദേവസ്വം ബോര്‍ഡിന്റെ പ്രവര്‍ത്തനങ്ങളെ ബാധിക്കുമെന്ന് ദേവസ്വം മന്ത്രി കടകംപള്ളി സുരേന്ദ്രന്‍ വ്യക്തമാക്കിയിരുന്നു. ജീവനക്കാരുടെ ശമ്പളത്തിലും ആനുകൂല്യങ്ങളിലും പ്രതിസന്ധിയുണ്ടാകും. അത്തരം സാഹചര്യമുണ്ടായാല്‍ സര്‍ക്കാര്‍ സഹായിക്കുമെന്നും കടകംപള്ളി വ്യക്തമാക്കി.

സര്‍ക്കാരിന് നടവരവിലെ കുറവ് പ്രതിസന്ധിയുണ്ടാക്കില്ല. എന്നാല്‍ ദേവസ്വം ബോര്‍ഡിനെ ഉദ്യോഗസ്ഥരുടെ ശമ്പളം, ആനുകൂല്യങ്ങള്‍, പെന്‍ഷന്‍ തുടങ്ങിയവയിലൊക്കെ ചെറിയ പ്രയാസങ്ങള്‍ ഉണ്ടാകുമെന്നും മന്ത്രി വ്യക്തമാക്കി.

ശബരിമലയിലെ നടവരവ് കുറയ്ക്കുക എന്നത് സംഘപരിവാറിന്റെ ലക്ഷ്യമാണ്. അതിനുവേണ്ടിയാണ് സന്നിധാനത്തെ പ്രക്ഷോഭ കേന്ദ്രമാക്കി മാറ്റിയത്. പ്രതിസന്ധിയുണ്ടാകുമ്പോള്‍ സര്‍ക്കാര്‍ അവരെ കൈവെടിയില്ലെന്നും മന്ത്രി വ്യക്തമാക്കി.

ശബരിമലയിലുണ്ടായ പ്രശ്‌നങ്ങള്‍ ജനങ്ങള്‍ക്കിടയില്‍ ഭയം ഉണ്ടാക്കി. എന്നാല്‍ ഇപ്പോള്‍ അത് മാറുകയാണ്. തീര്‍ത്ഥാടകരുടെ എണ്ണത്തില്‍ വര്‍ധനവ് ഉണ്ടാകുന്നുണ്ടെന്ന് മന്ത്രി കൂട്ടിച്ചേര്‍ത്തു.