മകരവിളക്കിന് ഇനി ഒരാഴ്ച മാത്രം ശേഷിക്കേ എരുമേലിയില്‍ വന്‍ ഭക്തജനത്തിരക്ക്. ഇതര സംസ്ഥാനങ്ങളില്‍നിന്നുള്ള തീര്‍ഥാടകരാണ് ഭൂരിപക്ഷവും. എരുമേലിയില്‍ പേട്ടതുള്ളിയ ശേഷം ബസുകളിലും പേരൂത്തോട് കാളകെട്ടിവഴിയുള്ള കാനനപാതയിലൂടെയുമാണ് തീര്‍ഥാടകര്‍ സന്നിധാനത്തേക്ക് എത്തുന്നത്. റെയില്‍വേ സ്‌റ്റേഷനുകളിലും വന്‍തിരക്കാണ് അനുഭവപ്പെടുന്നത്. സ്‌പെഷ്യല്‍ ട്രെയിനുകളിലാണ് തീര്‍ഥാടകര്‍ കൂടുതല്‍ വരുന്നത്.് പൊലീസിന്റെ കണക്കുകള്‍ പ്രകാരം ശബരിമലയില്‍ ശരാശരി ലക്ഷത്തിലധികം ഭക്തര്‍ എത്തുന്നുണ്ട്.
യുവതികളെത്തുമെന്ന സൂചന ശക്തമായതോടെ എരുമേലിയിലും കാനനപാതകളിലും പമ്പാവാലിഇലവുങ്കല്‍ റൂട്ടിലും കനത്ത സുരക്ഷ ഒരുക്കിയിട്ടുണ്ട്. മകരവിളക്കുവരെ നിരോധനാജ്ഞ നീട്ടിയതിനാല്‍ പരിശോധനയും ശക്തമാക്കി. ജനുവരി 11നാണ് ചരിത്രപ്രസിദ്ധമായ അമ്പലപ്പുഴആലങ്ങാട് സംഘങ്ങളുടെ പേട്ടതുള്ളല്‍. എരുമേലി ചന്ദനക്കുടം 10നും. ഈദിവസങ്ങളില്‍ തിരക്ക് കൂടുമ്പോള്‍ നടപ്പാക്കേണ്ട ക്രമീകരണങ്ങളിലാണ് പൊലീസ്.
എരുമേലി നിലക്കല്‍ പമ്പ എന്നിവിടങ്ങളിലും വനമേഖലകളിലും പെരിയാര്‍സത്രം പുല്ലുമേട് മേഖലകളും പൊലീസ് വലയത്തിലാണ്. പുല്ലുമേട് വഴി യുവതികളെത്തുമെന്ന സൂചനകളെ തുടര്‍ന്ന് അവിടെയും നിരീക്ഷണം ശക്തമാക്കി. മകരവിളക്കുവരെ കൂടുതല്‍ സുരക്ഷ ഏര്‍പ്പെടുത്തിയിട്ടുണ്ട്.