തിരുവനന്തപുരം ടെക്നോപാർക്ക് പരിസര പ്രദേശങ്ങളിലും ഹോട്ടലുകളിലും ബേക്കറികളിലും നഗരസഭയുടെ ആരോഗ്യവകുപ്പ് വിഭാഗം റെയ്ഡ് നടത്തി. റെയ്ഡിൽ ക്രമക്കേട് കണ്ടെത്തിയ 2 ഹോട്ടലുകള്‍ പൂട്ടികുകയും 9 സ്ഥാപനങ്ങള്‍ക്ക് ആരോഗ്യവകുപ്പ് നോട്ടീസും നല്‍കി.

കഴിഞ്ഞയാഴ്ച ടെക്നോപാര്‍ക്ക് ജീവനക്കാര്‍ക്ക് ഭക്ഷ്യവിഷബാധ ഏറ്റതിനെ തുടര്‍ന്നായിരുന്നു പരിശോധന. നഗരസഭാ മേയര്‍ വികെ പ്രശാന്തിന്‍റെ നേതൃത്വത്തിലായിരുന്നു റെയ്ഡ് നടന്നത്. ടെക്നോപാര്‍ക്കിനുള്ളിലെ നിള, കാര്‍ണിവല്‍, തേജസ്വിനി, ഭവാനി എന്നിങ്ങനെ നാല് കെട്ടിടങ്ങളിലായി 17 ഹോട്ടലുകളിലും ബേക്കറികളിലുമാണ് റെയ്ഡ് നടന്നത്.

റെയ്ഡില്‍ വൃത്തിഹീനമായ അടുക്കള, വൃത്തി ഹീനമായ പാത്രങ്ങള്‍, പഴകിയ ഭക്ഷണ പദാര്‍ത്ഥങ്ങള്‍, ഭക്ഷണത്തില്‍ ഉപയോഗിച്ച്‌ വന്നിരുന്ന നിരോധിത ഉല്‍പന്നങ്ങള്‍, ഭക്ഷണം പായ്ക്ക് ചെയ്യാന്‍ ഉപയോഗിക്കുന്ന പ്ലാസ്റ്റിക് കവര്‍ എന്നിവ കണ്ടെത്തി. ക്രമക്കേട് കണ്ടെത്തിയ 9 സ്ഥാപനങ്ങള്‍ക്ക് ആരോഗ്യവകുപ്പ് നോട്ടീസ് നല്‍കി. ടെക്ക്നോപാര്‍ക്കിന്‍റെ പരിസര പ്രദേശമായ ആറ്റിന്‍കുഴിയില്‍ രണ്ട് സ്ഥാപനങ്ങള്‍ ആരോഗ്യ വകുപ്പ് പൂട്ടിച്ചു. ജ്യൂസ് പാലസ്, ടേസ്റ്റിലാന്‍റ് എന്നീ സ്ഥാപനങ്ങളാണ് പൂട്ടിയത്.

വരും ദിവസങ്ങളിലും കഴക്കൂട്ടത്തും ടെക്ക്നോപാര്‍ക്കിന്‍റെ പരിസര പ്രദേശങ്ങളിലും പരിശോധന ശക്തമാക്കുമെന്ന് കോര്‍പ്പറേഷന്‍ മേയര്‍ വി കെ പ്രശാന്ത് പറഞ്ഞു. അതേസമയം കഴിഞ്ഞ ദിവസം ഉണ്ടായ ഭക്ഷ്യവിഷബാധ ആഹാരത്തിലൂടെയാണോ വെള്ളത്തിലൂടെയാണോ എന്നത് വ്യക്തമല്ല. അത് കൊണ്ട് ടെക്ക്നോപാര്‍ക്കിനുള്ളിലെ വെളളവും വിതരണം ചെയ്യുന്ന കുപ്പിവെള്ളവും ഉടന്‍ പരിശോധിക്കുമെന്ന് ആരോഗ്യ വകുപ്പ് അറിയിച്ചു. ഇതിനായി ടെക്നോപാര്‍ക്കിനുള്ളില്‍ വിതരണം ചെയ്യുന്ന വെള്ള കമ്ബനികളുടെ ലിസ്റ്റ് എടുത്ത് പരിശോധിക്കാനാണ് ആരോഗ്യ വകുപ്പിന്‍റെ തീരുമാനം.