സംസ്ഥാനത്ത് കഴിഞ്ഞ് മൂന്നുമാസം എട്ടുലക്ഷത്തിലധികം കാര്‍ഡ് ഉടമകള്‍ റേഷന്‍ വാങ്ങിയിട്ടില്ല. ഭക്ഷ്യ ഭദ്രതാ നിയമത്തിന്റെ ഗുണഭോക്താക്കളായ അന്ത്യോദയ, മുന്‍ഗണന കാര്‍ഡുകളില്‍ 1,04,810 പേരാണ് ഈമാസങ്ങളില്‍ സബ്‌സിഡി അരിയും ഗോതമ്പും അടക്കം വാങ്ങാതിരുന്നത്.

മുന്‍ഗണന വിഭാഗത്തില്‍ 91,000 പേരും അന്ത്യോദയ വിഭാഗത്തില്‍ 12,000 പേരും അടക്കമാണിത്. മുന്‍ഗണനേതര, സ്‌റ്റേറ്റ് സബ്‌സിഡി വിഭാഗത്തില്‍പെട്ട 4,98,783 പേരടക്കം ഒക്‌ടോബര്‍, നവംബര്‍ മാസങ്ങളിലായി 6,03,590 കാര്‍ഡ് ഉടമകളാണ് റേഷന്‍ വാങ്ങാതിരുന്നത്. ഡിസംബറിലെ കണക്ക് കൂടി ലഭ്യമാകുന്നതോടെ റേഷന്‍ വാങ്ങാത്തവരുടെ എണ്ണം എട്ട് ലക്ഷത്തില്‍ അധികമാവും. അന്ത്യോദയ വിഭാഗത്തില്‍ ഇടുക്കി, വയനാട് ജില്ലകളിലെ ആദിവാസികളാണ് റേഷന്‍ വാങ്ങാത്തവരില്‍ കൂടുതല്‍. ഇടുക്കി ദേവികുളം താലൂക്കില്‍ മാത്രം ആയിരത്തില്‍ അധികം അന്ത്യോദയ വിഭാഗത്തില്‍പെട്ടവര്‍ റേഷന്‍ വാങ്ങിയിട്ടില്ല. വയനാട് ജില്ലയില്‍ 636 അന്ത്യോദയ കാര്‍ഡുകാരാണ് റേഷന്‍ വാങ്ങാത്തത്.

നിരന്തരം റേഷന്‍വാങ്ങാത്തവരുടെ എണ്ണം അടിക്കടി വര്‍ധിക്കുന്നതിനാല്‍ കാരണം അന്വേഷിച്ച് റിപ്പോര്‍ട്ട് നല്‍കാന്‍ പൊതുവിതരണ വകുപ്പ് താലൂക്ക് സപ്ലൈ ഓഫിസര്‍മാര്‍ക്ക് ഉത്തരവ് നല്‍കിയിരിക്കുകയാണ്. റേഷന്‍ വാങ്ങാത്ത കാര്‍ഡ് ഉടമകളുടെ താലൂക്ക്തല പട്ടിക ഇപോസ് വഴി എടുത്ത് വകുപ്പ് നല്‍കിയിട്ടുണ്ട്. ഈമാസം 25നകം റിപ്പോര്‍ട്ട് നല്‍കണം. നിരന്തരം റേഷന്‍ വാങ്ങാതെ വരുന്നതോടെ സബ്‌സിഡിയായി കേന്ദ്രം നല്‍കുന്ന വിഹിതം കുറക്കാനുള്ള സാധ്യത വകുപ്പ് മുന്നില്‍ കാണുന്നുണ്ട്. അന്ത്യോദയ, മുന്‍ഗണന പട്ടികയില്‍ ഉള്‍പ്പെട്ട അനര്‍ഹര്‍ റേഷന്‍ വാങ്ങാതെ ഇതര സേവനങ്ങള്‍ക്കായി റേഷന്‍ കാര്‍ഡ് ഉപയോഗിക്കുന്നതായും വിവിരം ലഭിച്ചിട്ടുണ്ട്.
അനര്‍ഹര്‍ ഗുണഭോക്തൃ വിഹിതം വാങ്ങുന്നത് കുറ്റകരമാണെന്ന തിരിച്ചറിവാണ് റേഷന്‍ വാങ്ങുന്നതില്‍ നിന്നും ഇവരെ പിന്തിരിപ്പിക്കുന്നത്. ഇത്തരം അനര്‍ഹരെ ഒഴിവാക്കുന്നതിനും കൂടിയാണ് കാരണം കാണിക്കല്‍ നോട്ടീസ്.