ഒരിടവേളയ്ക്ക് ശേഷം ശബരിമലയില്‍ വീണ്ടും പ്രതിഷേധം ഉയരുകയാണ്. ശബരിമലയില്‍ ദര്‍ശനത്തിനായി എത്തിയ കണ്ണൂര്‍ സ്വദേശി രേഷ്മ , ഷാനില എന്നിവര്‍ ഭക്തരുടെ ശക്തമായ പ്രതിഷേധം കാരണം തിരിച്ചു മലയിറങ്ങി. നീലിമലയില്‍ ഇവരെ പ്രതിഷേധക്കാര്‍ രണ്ടു മണിക്കൂറായി തടഞ്ഞിരിക്കുകയായിരുന്നു. എന്നാല്‍ അന്യ സംസ്ഥാന ഭക്തരുള്‍പ്പെടെ നിരവധി പേര് ഇവര്‍ക്കെതിരെ പ്രതിഷേധവുമായി രംഗത്തെത്തിയതോടെ പോലീസ് ഇവരെ മടക്കി അയക്കുകയായിരുന്നു. അതെ സമയം ഇവര്‍ക്കൊപ്പം വന്ന രണ്ടു യുവതികളെ ഇവര്‍ മാധ്യമങ്ങളോടും മറ്റും അന്വേഷിക്കുന്നുണ്ട്.

ഈ യുവതികളെ അപ്പം അരവണ കൗണ്ടറില്‍ രഹസ്യമായി ഉണ്ടെന്നു ഭക്തര്‍ പറയുന്നു. പ്രതിഷേധക്കാരുടെ ശ്രദ്ധ തിരിച്ചു വിട്ടു മറ്റൊരു വഴിയിലൂടെ അവരെ പോലീസ് സന്നിധാനത്ത് എത്തിച്ചോ എന്നും ഭക്തര്‍ക്ക് സംശയമുണ്ട്. ഇവര്‍ക്കൊപ്പം മനോജ് അബ്രഹാമിന്റെ സ്‌ക്വാഡില്‍ ഉള്ള രണ്ടു പോലീസുകാര്‍ ഉണ്ടെന്നാണ് പ്രതിഷേധക്കാര്‍ ആരോപിക്കുന്നത്. ആ രണ്ട് യുവതികള്‍ക്കായി പല ഭാഗങ്ങളിലും ഭക്തര്‍ തെരച്ചില്‍ നടത്തുകയാണ്. നിരോധനാജ്ഞമാറിയതോടെ യുവതികള്‍ വന്നാല്‍ ശക്തമായ പ്രതിഷേധത്തിനാണ് കളമൊരുങ്ങുന്നത്.