തിരുവനന്തപുരം: 9188 100 100 എന്ന അടിയന്തര ആംബുലന്‍സ് സേവനത്തിനുള്ള ഐ.എം.എ.യുടെയും കേരള പോലീസിന്റെയും സംരംഭമായ ട്രോമ റെസ്‌ക്യൂ ഇനിഷിയേറ്റീവ് (TRI) കൂടുതല്‍ കാര്യക്ഷമമാകുന്നു. ഇതിന്റെ ഭാഗമായി തിരുവനന്തപുരം നഗരത്തിലെ അടിയന്തര രക്ഷയ്ക്കായി ഐ.എം.എ കണ്ടോള്‍മെന്റ് പോലീസ് സ്‌റ്റേഷനു സമീപം ഒരു ആംബംലന്‍സ് കൂടി 24 മണിക്കൂര്‍ സേവനത്തിന്നായി വ്യന്യസിച്ചു. ഇതിന്റെ പ്രവര്‍ത്തനോത്ഘാടനം മേയര്‍ അഡ്വ. വി.കെ. പ്രശാന്തും സിറ്റി പോലീസ് കമ്മീഷണര്‍ കെ. സുരേന്ദ്രനും ചേര്‍ന്ന് നിര്‍വഹിച്ചു. ഇതോടൊപ്പം പോലീസ് സേനാംഗങ്ങള്‍ക്കും സന്നദ്ധ പ്രവര്‍ത്തകര്‍ക്കും അടിയന്തര രക്ഷയെ കുറിച്ചുള്ള പരിശീലനവും നല്‍കി.

ഐ.എം.എ. ട്രോമ കെയര്‍ ചെയര്‍മാന്‍ ഡോ. ശ്രീജിത്ത് എന്‍ കുമാര്‍ കണ്‍വീനര്‍ ഡോ. ജോണ്‍ പണിക്കര്‍, ഐ.എം.എ. പ്രിസിഡന്റ് ഡോ. ആര്‍. അനുപമ, ഡോ. ഉണ്ണികൃഷ്ണന്‍, ഡോ. ആനന്ദ് എം. പിള്ള, ഡോ. ഷിജു സ്റ്റാന്‍ലി, ഡോ. ഡാനിഷ് സലീം, ഷാജുദ്ദീന്‍ ചിറയ്ക്കല്‍, ജലീല്‍ വെന്‍മ എന്നിവര്‍ സംസാരിച്ചു.

ഐ.എം.എ.യുടെ നേതൃത്വത്തില്‍ നടക്കുന്ന TRI കഴിഞ്ഞ ഒരു വര്‍ഷത്തില്‍ ആയിരത്തിലധികം പേര്‍ക്ക് അടിയന്തിര അപകട സംരക്ഷ നല്‍കിയതായി ഡോ. ശ്രീജിത്ത് എന്‍ കുമാര്‍, ഡോ. ജോണ്‍ പണിക്കര്‍ എന്നിവര്‍ പറഞ്ഞു.

തിരുവനന്തപുരം നഗരത്തില്‍ ഉള്‍പ്പെടെ കേരളത്തില്‍ മുഴുവന്‍ വരുന്ന ഒരു മാസം കൊണ്ട് അടിയന്തര ആംബുലന്‍സ് സേവനം കാര്യക്ഷമമാക്കുവാനുള്ള കര്‍മ്മ പദ്ധതി ആരംഭിച്ചു. ഇതിന്റെ ഭാഗമായാണ് തിരുവനന്തപുരം നഗരത്തിലേയ്ക്ക് വേണ്ടിയുള്ള പുതിയ ആംബുലന്‍സ് സേവനം. ഡോ. രമേഷ് കുമാര്‍ ഫൗണ്ടേഷനും ഐ.എം.എയും പോലീസിന് നല്‍കിയ ട്രോമ റെസ്‌ക്യൂ ആംബുലന്‍സിനും നഗരത്തിലെ എല്ലാ ആംബുലന്‍സുകളേയും ഉള്‍പ്പെടുത്തിയ TRI ശൃംഖലയ്ക്കും പുറമെയാണ് പുതിയ സേവനം.