നിങ്ങൾക്ക് സമ്മാനമടിച്ചിട്ടുണ്ട്. ആ സമ്മാനം നിങ്ങളുടെ കൈയിലെത്തിയ്ക്കാനുള്ള ചിലവ് നിങ്ങൾ തന്നെയാണ് നോക്കേണ്ടത്. അതിന് വേണ്ടി കുറച്ച് ക്യാഷ് നിങ്ങൾ അയച്ച് തരണം. സ്ത്രീ ശബ്‌ദത്തിൽ എത്തുന്ന ആ ഫോൺ വിളിയിൽ പെട്ടാൽ പിന്നെ തീർന്നു. സമ്മാനപൊയിട്ട് പൊടിപോലും കിട്ടില്ലെന്ന് മാത്രമല്ല കയ്യിലിരിക്കുന്ന കാശും ഗോവിന്ദ തന്നെ. അങ്ങനെയൊരു ചെത്തി കുഴിയിൽ പെട്ടതാണ് എടക്കര വഴിക്കടവിലെ ഹോട്ടല്‍ തൊഴിലാളിയായ ഷഹിന്‍ഷ.12,000 രൂപ വിലവരുന്ന മൊബൈല്‍ ഫോണ്‍ സമ്മാനം ലഭിച്ചെന്ന് അറിയിപ്പ്. തുടര്‍ന്ന് 3,600 രൂപ പണം അടച്ച്‌ പാഴ്‌സല്‍ വാങ്ങിയ ആള്‍ക്ക് കിട്ടിയത് എട്ടിന്റെ പണി. സമ്മാനപ്പൊതി തുറന്നപ്പോള്‍ കിട്ടിയത് ഫോണിന് പകരം ബെല്‍റ്റും പഴ്‌സും.

വഴിക്കടവിലെ ഹോട്ടല്‍ തൊഴിലാളിയായ ഷഹിന്‍ഷയ്ക്കാണ് തട്ടിപ്പിനിരയായത്. രണ്ടാഴ്ച മുമ്ബാണ് മലയാളം സംസാരിക്കുന്ന യുവതി 12,000 രൂപ വിലവരുന്ന മൊബൈല്‍ ഫോണ്‍ സമ്മാനം ലഭിച്ച വിവരം ഫോണില്‍ വിളിച്ച്‌ അറിയിച്ചത്. മണിമൂളി പോസ്റ്റ് ഓഫിസില്‍ ആണ് പഴ്‌സല്‍ എത്തിയത്. എന്നാല്‍ ഇത് പ്രദേശത്ത് ആദ്യ സംഭവമല്ല. സമാനമായ രീതീയില്‍ കെട്ടിടനിര്‍മാണ തൊഴിലാളിയായ പൂക്കുന്നന്‍ ഉസ്മാന്റെയും പണം നഷ്ടപ്പെട്ടിട്ടുണ്ട്.

വഴിക്കടവ് പോലീസ് നടത്തിയ അന്വേഷണത്തില്‍ ഡല്‍ഹി കേന്ദ്രീകരിച്ചുള്ള സംഘമാണ് തട്ടിപ്പിനു പിന്നിലെന്നാണ് സൂചന ലഭിച്ചത്. മറ്റു പലര്‍ക്കും പണം നഷ്ടപ്പെട്ടിട്ടുണ്ടെങ്കിലും പുറത്തുപറയാന്‍ മടിക്കുകയാണെന്നാണ് പോലീസ് നല്‍കുന്ന സൂചന. പല ബ്രാൻഡഡ് പേരുകളിലൂടെയും സമ്മാനം അടിച്ചിട്ടുണ്ട് എന്ന് വരുന്ന മെസ്സേജുകൾ മാത്രമല്ല കോളുകളും വരുന്നത് നിരവധിയാണ്. ലക്ഷങ്ങളുടെ കാറുകൾ മുതൽ പതിനായിരങ്ങളുടെ ഫോണുകൾ വരെ ലിസ്റ്റിൽ വരും. അങ്ങനെയുള്ള അറിയിപ്പുകൾ വന്നാൽ സത്യാവസ്ഥ മനസിലാക്കാതെ എടുത്ത് ചാടി അബദ്ധത്തിൽ വീഴാതെ സൂക്ഷിക്കുക.