തന്നെ നോക്കുകുത്തിയാക്കി സര്ക്കാരും ദേവസ്വം കമ്മിഷ്ണറും ചേര്ന്ന് കാര്യങ്ങള് നടപ്പാക്കിയതിലുള്ള അമര്ഷവും പുറത്താക്കുമെന്ന സൂചനകളും ഭയന്ന് ദേവസ്വം ബോര്ഡ് പ്രസിഡന്റ് എ.പത്മകുമാര് രാജി വെച്ചേക്കുമെന്ന് അറിയുന്നു
തന്നെ നോക്കുകുത്തിയാക്കി സര്ക്കാരും ദേവസ്വം കമ്മിഷ്ണറും ചേര്ന്ന് കാര്യങ്ങള് നടപ്പാക്കിതിലുള്ള അമര്ഷവും പുറത്താക്കുമെന്ന സൂചനകളും ഭയന്ന് ദേവസ്വം ബോര്ഡ് പ്രസിഡന്റ് എ.പത്മകുമാര് രാജി വെച്ചേക്കുമെന്ന് അറിയുന്നു. ഇക്കാര്യം അദ്ദേഹം സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനുമായി സംസാരിച്ചതായാണ് വിവരം. യുവതീപ്രവേശനത്തെ അനുകൂലിക്കുന്ന നിലപാട് ദേവസ്വം അഭിഭാഷകന് സുപ്രീംകോടതിയില് സ്വീകരിച്ചത് തന്നോട് ആലോചിക്കാതെയാണെന്നും അദ്ദേഹം കോടിയേരിയെ ധരിപ്പിച്ചു. തുടര്ന്ന് കോടിയേരി ദേവസ്വം കമ്മിഷ്ണന്, ഡല്ഹിയില് നിന്നെത്തിയ ദേവസ്വം കമ്മിഷ്ണറെയും റിക്രൂട്ട്മെന്റ് ബോര്ഡ് ചെയര്മാന് രാജഗോപാലന് നായരേയും എ.കെ.ജി സെന്ററില് വിളിച്ചുവരുത്തി കാര്യങ്ങള് അന്വേഷിച്ചു.
കോടതിയില് ബോര്ഡ് പുതിയ കാര്യങ്ങളൊന്നും പറഞ്ഞിട്ടില്ലെന്ന് എന്. വാസു കോടിയേരിയെ ധരിപ്പിച്ചു. യുവതീപ്രവേശനത്തിലെ ബോര്ഡിന്റെ നിലപാട് കോടതി ചോദിച്ചപ്പോള് അനുകൂലിക്കുന്നു എന്ന് പറയുക മാത്രമാണ് ചെയ്തത്. കഴിഞ്ഞ നവംബറില് ചേര്ന്ന ബോര്ഡ് യോഗം ഇക്കാര്യം പ്രമേയത്തിലൂടെ അംഗീകരിച്ചതാണെന്നും വാസു വ്യക്തമാക്കി. രണ്ട് ദിവസത്തിനകം ബോര്ഡ് യോഗവും ചേരുന്നുണ്ട്. എന്ത് സംഭവിക്കുമെന്ന് അന്നേ പറയാനൊക്കൂ. അടുത്തമാസം വിരമിക്കുന്ന കമ്മിഷ്ണറെ താമസിക്കാതെ പ്രസിഡന്റ് സ്ഥാനത്തേക്ക് കൊണ്ടുവരാനുള്ള ചരട് വലികള് നടക്കുന്നുണ്ട്. അതിന്റെ ബലത്തിലാണ് ഇന്നലെ ഡല്ഹിയില് നിന്നെത്തിയ കമ്മിഷ്ണര് വിമാനത്താവളത്തില് വെച്ച് പ്രസിഡന്റിന്റെ നിലപാടുകളെ തള്ളി സംസാരിച്ചതും. ഡല്ഹി വിമാനത്താവളത്തില് വെച്ച് തന്നെ പ്രസിഡന്റ് വിളിച്ചിരുന്നെന്നും കോടതിയിലെ കാര്യങ്ങളെ കുറിച്ച് റിപ്പോര്ട്ട് തേടിയിട്ടില്ലെന്നും എന്.വാസു തുറന്നടിച്ചു. ഇത് പത്മകുമാറിന് വലിയ ക്ഷീണമാണ് ഉണ്ടാക്കിയത്.
തെരഞ്ഞെടുപ്പ് അടുത്തിരിക്കുന്ന സാഹചര്യത്തില് പത്മകുമാറിന്റെ രാജി പാര്ട്ടി അനുവദിക്കില്ല. അത് പാര്ട്ടിക്കും സര്ക്കാരിനും തിരിച്ചടിയായേക്കും. ഇടഞ്ഞ് നില്ക്കുന്ന എന്.എസ്.എസിനെ കൂടുതല് പ്രകോപിക്കാനും തയ്യാറല്ല. അവരുടെ കൂടെ സമ്മതത്തോടെയാണ് പത്മകുമാറിനെ പ്രസിഡന്റാക്കിയത്. ശബരിമല വിഷയത്തില് തുടക്കം മുതല് പത്മകുമാര് എന്.എസ്.എസിന്റെ അതേനിലപാട് സ്വീകരിച്ചതും അതുകൊണ്ടാണ്. ബോര്ഡ് അംഗങ്ങളായ ശങ്കര് ദാസും വിജയകുമാറും ദേവസ്വം കമ്മിഷ്ണര് എന്. വാസുവും ദേവസ്വം റിക്രൂട്ട്്മെന്റ് ബോര്ഡ് ചെയര്മാന് എന്. രാജഗോപാലന് നായരും ചേര്ന്ന് തന്നെ ഒറ്റപ്പെടുത്തുകയാണെന്നാണ് പത്മകുമാറിന്റെ പ്രധാന ആരോപണം. മുഖ്യമന്ത്രി പിണറായി വിജയന്റെ അടുപ്പക്കാരുടെ പട്ടികയില് നിന്ന് പത്മകുമാര് തെറിച്ചതോടെ അവിടേക്ക് പോകാനോ ഇക്കാര്യങ്ങള് സംസാരിക്കാനോ പറ്റാത്ത സ്ഥിതിയിലാണ് പത്മകുമാര്.
പല കാര്യങ്ങളും ദേവസ്വം കമ്മിഷ്ണര് പത്മകുമാറുമായി പങ്കുവയ്ക്കുന്നില്ല. ഇതില് പത്മകുമാറിന് കടുത്ത അതൃപ്തിയുണ്ട്. എന്നാല് പാര്ട്ടിയിലെ ചിലര് വാസുവിനൊപ്പമാണ്. അവരുടെ പിന്തുണയോടെയാണ് കാര്യങ്ങള് മുന്നോട്ട് കൊണ്ടുപോകുന്നതെന്നും പത്മകുമാര് അദ്ദേഹത്തോട് അടുത്ത വൃത്തങ്ങളോട് പറഞ്ഞതായാണ് വിവരം. ബോര്ഡ് പ്രസിഡന്റായ ശേഷം പത്തനംതിട്ട ജില്ലാ സെക്രട്ടറിയേറ്റ് അംഗമായ പത്മകുമാര് പാര്ട്ടി കമ്മിറ്റികളിലും യോഗങ്ങളിലും സാധാരണ പങ്കെടുത്തിരുന്നില്ല. എന്നാല് ഇന്നലെ അദ്ദേഹം ജില്ലാ കമ്മിറ്റി യോഗത്തില് പങ്കെടുത്തു. ജില്ലയിലെ സഹപ്രവര്ത്തകരുമായി ആശയവിനിമയം നടത്തി.
https://www.facebook.com/Malayalivartha
