തിരുവനന്തപുരം മെഡിക്കല് കോളജ് പൊലീസ് സ്റ്റേഷന് ഇനി ആര്ക്കും കല്ലെറിയാം, പരാതി ഉണ്ടാവില്ല. ഇനി ആരെങ്കിലും പരാതി നല്കിയാല് കല്ലെറിഞ്ഞ അതേ വേഗത്തില് അത് ചവറ്റുകുട്ടയില് വീണിരിക്കും
തിരുവനന്തപുരം മെഡിക്കല് കോളജ് പൊലീസ് സ്റ്റേഷന് ഇനി ആര്ക്കും കല്ലെറിയാം, പരാതി ഉണ്ടാവില്ല. ഇനി ആരെങ്കിലും പരാതി നല്കിയാല് കല്ലെറിഞ്ഞ അതേ വേഗത്തില് അത് ചവറ്റുകുട്ടയില് വീണിരിക്കും. രണ്ടാഴ്ച മുമ്പ് പൊലീസ് സ്റ്റേഷന് നേരെ കല്ലെറിഞ്ഞ ഡിവൈഎഫ്ഐക്കാര്ക്കെതിരെയുള്ള പരാതി അധികൃതര് മുക്കി. പ്രതികള്ക്ക് പിന്നാലെ പോയാല് ഇരിക്കുന്ന കസേര കാണില്ലെന്ന് വ്യക്തമായതോടെയാണ് ഏമാന്മാര് സഖാക്കള്ക്ക് മുന്നില് മുട്ടുമടക്കിയത്.
പ്രതിയെ തേടി സി.പി.എം ജില്ലാ കമ്മിറ്റി ഓഫീസില് റെയ്ഡ് നടത്തിയ ഡി.സി.പി ചൈത്ര തെരേസാ ജോണിനെതിരെ നടപടി വേണമെന്ന് തിരുവനന്തപുരം സെക്രട്ടറി ആനാവൂര് നാഗപ്പനും മറ്റും ഉറഞ്ഞ് തുള്ളിയിട്ടും ആഭ്യന്തരവകുപ്പ് കയ്യാളുന്ന മുഖ്യമന്ത്രിക്ക് ഒന്നും ചെയ്യാനായില്ല. പാര്ട്ടിപ്രവര്ത്തകര്ക്കെതിരെ നടപടിയുണ്ടായാല് അത് അതിലും വലിയ നാണക്കേടാവുമെന്ന് മനസിലാക്കിയാണ് കേസ് ചുരുട്ടിക്കെട്ടിയത്.
പ്രായപൂര്ത്തിയാകാത്ത പെണ്കുട്ടിയോട് അശ്്ളീല സംഭാഷണം നടത്തിയ ഡിവൈഎഫ്ഐ പ്രവര്ത്തകനെ മെഡിക്കല് കോളജ് പൊലീസ് പോസ്ക്കോ നിയമപ്രകാരം അറസ്റ്റ് ചെയ്തിരുന്നു. കഴിഞ്ഞമാസം 24ന് പ്രതിയെ കാണാന് എത്തിയ ഡിവൈഎഫ്ഐ ഏര്യാ കമ്മിറ്റി നേതാവും സംഘവും പ്രതിയെ കാണണമെന്ന് പറഞ്ഞെങ്കിലും പൊലീസ് അനുവദിച്ചില്ല. തുടര്ന്ന് നടന്ന വാക്ക്തര്ക്കം സംഘര്ഷത്തില് കലാശിക്കുകയായിരുന്നു. അതിനിടെയാണ് കൂടുതല് പ്രവര്ത്തകര് സംഘടിച്ചെത്തി സ്റ്റേഷന് നേരെ കല്ലെറിഞ്ഞ് ജനാല പൊട്ടിച്ചത്. തുടര്ന്ന് നേതാവും പ്രവര്ത്തകരും സ്ഥലംവിട്ടു.
സംഭവം അറിഞ്ഞ് സ്ഥലത്തെത്തിയ ഡിസിപി ചൈത്ര തെരേസാ ജോണ് സ്റ്റേഷന് ജിഡിയെ കൊണ്ട് ജാമ്യമില്ലാ വകുപ്പുകള് ചുമത്തി കേസ് എടുപ്പിക്കുകയായിരുന്നു. കേസിലെ എല്ലാ പ്രതികളെയും ഇതുവരെ പിടികൂടാനായില്ല. പൊലീസും പ്രതികളും ഒത്തുകളിക്കുകയാണെന്ന് പരാതിക്കാരി ഉള്പ്പെടെ ആരോപിക്കുന്നു. ജില്ലാ കമ്മിറ്റി ഓഫീസിലെ പരിശോധനയെ തുടര്ന്ന് ഡിസിപിയുടെ ചുമതലയുണ്ടായിരുന്ന ചൈത്രയെ അവര് ജോലി ചെയ്തിരുന്ന വനിതാ സെല്ലിലേക്ക് മാറ്റുകയും ചെയ്തു. അതോടെ കേസ് ആവിയായി തുടങ്ങി.
പരാതിക്കാരിയായ പെണ്കുട്ടിക്ക് നേരെ വധഭീഷണിയും മുഴക്കിയിരിക്കുകയാണ് ഇപ്പോള്. പ്രതിയുടെ ബന്ധുക്കള് പെണ്കുട്ടിയുടെ വീട് കയറി ആക്രമിച്ചു. പൊലീസില് പരാതി നല്കിയിട്ടും യാതൊരു നടപടിയും സ്വീകരിച്ചില്ല. അതോടെ വനിതാ കമ്മിഷനെ സമീപിച്ചു. തന്റെ പിന്നാലെ നടന്ന് ശല്യം ചെയ്യുകയും മോശമായി സംസാരിക്കുകയും ചെയ്തെന്ന പെണ്കുട്ടിയുടെ പരാതിയിലാണ് ആക്കുളം ഈ റോഡ് കോളനി സ്വദേശിയായ രണ്ടു യുവാക്കള്ക്കെതിരെ മെഡിക്കല് കോളജ് പൊലീസ് പോക്സോ ചുമത്തിയത്.
മെഡിക്കല് കോളേജ് അണമുഖം കളത്തില് വീട്ടില് രാജീവ് , ബന്ധുവായ ശ്രീദേവ് എന്നിവരാണ് പോക്സോ കേസില് അറസ്റ്റിലായത്. ആദ്യം പെണ്കുട്ടിയുടെ വീട്ടുകാരുമായി ഒത്തുതീര്പ്പ് ചര്ച്ച നടത്തി അവര് വഴങ്ങാത്തതിനെ തുടര്ന്നായിരുന്നു ഭീഷണി. അതിനും അവര് കീഴടങ്ങിയില്ല. പ്രതികളുടെ ബന്ധുക്കള് പലപ്പോഴായി വധഭീഷണി നടത്തുകയാണെന്ന് കമ്മീഷണര്ക്കും വനിതാ കമ്മീഷനും നല്കിയ പരാതിയില് പെണ്കുട്ടി പറയുന്നു. സാക്ഷി പറഞ്ഞ സ്ത്രീയെ അക്രമിച്ച പരാതി പൊലീസ് നിര്ബന്ധിച്ച് ഒത്തിതീര്പ്പാക്കിയെന്നും പെണ്കുട്ടി വ്യക്തമാക്കി.
https://www.facebook.com/Malayalivartha
