കാക്കി കുപ്പായം അഴിച്ച് വെച്ച് തെരഞ്ഞെടുപ്പില്‍ മത്സരിക്കാനില്ലെന്ന് പ്രശസ്ത ഫുഡ്‌ബോള്‍ താരവും എസ്.ഐയുമായ ഐ.എം വിജയന്‍ വ്യക്തമാക്കി. തൃശൂരിലെ ആലത്തൂര്‍ മണ്ഡലത്തില്‍ മത്സരിക്കണമെന്ന് ആവശ്യപ്പെട്ട് കോണ്‍ഗ്രസ് നേതൃത്വം സമീപിച്ചിരുന്നു. പല നേതാക്കളും സംസാരിച്ചിരുന്നു. താല്‍പര്യമില്ലെന്ന് അറിയിച്ചു. തന്നെ രാഷ്ട്രീയക്കാരനായി കാണാന്‍ ജനം ആഗ്രഹിക്കുന്നില്ല. വിരമിച്ച ശേഷം എന്ത് ചെയ്യണമെന്ന് അപ്പോള്‍ ആലോചിക്കാം. ജോലി വിട്ടുള്ള കാര്യങ്ങള്‍ ആലോചിക്കുന്നില്ല. എല്ലാ രാഷ്ട്രീയ നേതാക്കളുമായി നല്ല ബന്ധമാണുള്ളത്. ജോലിയും ഫുഡ്‌ബോളും സിനിമയുമായി മുന്നോട്ട് പോകാനാണ് തീരുമാനമെന്നും ഐ.എം വിജയന്‍ വ്യക്തമാക്കി.

ഐ.എം വിജയനെ കളിക്കളത്തിലേക്ക് വരുന്ന കാലത്ത് കോണ്‍ഗ്രസ് നേതാവ് കെ.കരുണാകരന്‍ സഹായിച്ചിരുന്നു. അന്ന് മുതലേ തൃശൂരിലെ കോണ്‍ഗ്രസ് നേതാക്കളുമായി ഐ.എം വിജയന് നല്ല ബന്ധമാണുള്ളത്. ആലത്തൂര്‍ മുമ്പ് ഒറ്റപ്പാലം ലോക്‌സഭാ മണ്ഡലമായിരുന്നു. അന്ന് കോണ്‍ഗ്രസിന്റെ കോട്ടയായിരുന്നു. കോണ്‍ഗ്രസിലെ കെ.ആര്‍ നാരായണന്‍ അവിടെ നിന്ന് മത്സരിച്ച് വിജയിച്ചിട്ടുണ്ട്. എന്നാല്‍ അദ്ദേഹം കേന്ദ്രത്തിലേക്ക് പോയ ശേഷം മണ്ഡലം കൈവിട്ടു. കഴിഞ്ഞ ഇരുപത് വര്‍ഷമായി സി.പി.എമ്മിന് ആലത്തൂരില്‍ വ്യക്തമായ സ്വാധീനമുണ്ട്. 2009ലും 2014ലും പി.കെ ബിജുവാണ് ആലത്തൂരില്‍ നിന്ന് വിജയിച്ചത്. കഴിഞ്ഞതവണ ബിജു 17000ത്തിലധികം വോട്ടിന്റെ ഭൂരിപക്ഷം നേടിയിരുന്നു. ഇത്തവണ ബിജുവിന് സീറ്റ് നല്‍കില്ലെന്ന് സൂചനകളുണ്ട്.

ഐ.എം വിജയന്‍ മത്സരിക്കാനില്ലെന്ന് തീരുമാനിച്ചതോടെ കോണ്‍ഗ്രസ് പറ്റിയ സ്ഥാനാര്‍ത്ഥിയെ കണ്ടെത്താനുള്ള നെട്ടോട്ടത്തിലാണ്. കഴിഞ്ഞതവണ കെ.എ ഷീബ മത്സരിച്ചെങ്കിലും കാര്യമായ ഓളമുണ്ടാക്കാനായില്ല. മത്സരിച്ച് ജയിക്കാന്‍ ത്രാണിയുള്ള നേതാക്കളും തൃശൂരിലില്ല. അതിനാല്‍ പൊതുസ്വതന്ത്രരെ മത്സരിപ്പിക്കാനാണ് പാര്‍ട്ടി ആലോചിക്കുന്നത്. സംവരണ മണ്ഡലമായ ആലത്തൂരില്‍ ദളിത് കോണ്‍ഗ്രസ് നേതാക്കളെ മത്സരിപ്പിക്കണമെന്ന് ആഗ്രഹമുണ്ടെങ്കിലും പി.കെ ബിജുവിനെ പോലെയുള്ളവരെ തോല്‍പ്പിക്കാന്‍ കരുത്തരായവരില്ല. മുതിര്‍ന്ന നേതാവായ കൊടിക്കുന്നില്‍ സുരേഷ് മാവേലിക്കരയിലെ സിറ്റിംഗ് എം.പിയാണ്. പിന്നെയുള്ളത് പന്തളം സുധാകരനാണ്. മുതിര്‍ന്ന നേതാവാണെങ്കിലും മധ്യതിരുവിതാംകൂറില്‍ നിന്നുള്ള അദ്ദേഹത്തിന് രാഷട്രീയ പിന്തുണയുണ്ടെങ്കിലും ആലത്തൂര്‍ പിടിച്ചെടുക്കാനുള്ള ജനപിന്തുണയില്ല.

കോണ്‍ഗ്രസുമായി ഏറെ അടുപ്പമുള്ള, മുന്‍ സുപ്രീം കോടതി ചീഫ് ജസ്റ്റിസ് കെ.ജി ബാലകൃഷ്ണന്റെ മരുമകന്‍ ശ്രീനിജനെ മത്സരിപ്പിക്കാന്‍ കഴിഞ്ഞ തവണ ആലോചിച്ചിരുന്നു. അന്ന് യൂത്ത് കോണ്‍ഗ്രസ് നേതാവായിരുന്ന ശ്രീനിജന്‍ ഇന്ന് ഇടത് പാളയത്തിലാണ്. അതിനാല്‍ ആ സാധ്യതയും അടഞ്ഞു. മറ്റൊരു ശക്തനായ നേതാവായ എം.എ കുട്ടപ്പന്‍ രാഷ്ട്രീയം ഉപേക്ഷിച്ച് കൊച്ചി കലൂരിലെ വീട്ടില്‍ കഴിയുകയാണ്. ഏതാനും വര്‍ഷം മുമ്പ് പക്ഷാഘാതം പിടിപെട്ട് ചികിത്സയിലായിരുന്ന അദ്ദേഹം രോഗമുക്തനായെങ്കിലും രാഷ്ട്രീയത്തിലേക്ക് മടങ്ങിവരാന്‍ ആഗ്രഹിക്കുന്നില്ല. പാര്‍ട്ടിയുമായോ, നേതാക്കളുമായോ യാതൊരു ബന്ധവുമില്ല.