മുഖ്യമന്ത്രി പിണറായി വിജയന് പ്രധാനമന്ത്രി നരേന്ദ്രമോദിയെ ഭയമാണെന്നും അതുകൊണ്ടാണ് റഫേല്‍ ഇടപാടിലെ അഴിമതിയെ കുറിച്ചുള്ള രേഖകള്‍ പുറത്ത് വന്നിട്ടും പിണറായി മൗനംപാലിക്കുന്നതെന്നും കെ.പി.സി.സി അധ്യക്ഷന്‍ മുല്ലപ്പളളി രാമചന്ദ്രന്‍ ആരോപിച്ചു. ലാവ്‌ലിന്‍ ഇടപാട് സി.ബി.ഐ നേരാംവണ്ണം അന്വേഷിച്ചാല്‍ പിണറായി വിജയന്‍ അഴിക്കുള്ളിലാകും.

ആ ഭയം കൊണ്ടാണ് മഖ്യമന്ത്രി നരേന്ദ്രമോദിയുടെ അഴിമതിയെ പറ്റി പ്രതികരിക്കാത്തത്. ബി.ജെ.പിയുമായും അതിന്റെ ആദ്യരൂപമായ ജനസംഘവുമായും പിണറായി വിജയന് പണ്ടേ നല്ല ബന്ധമാണുള്ളത്. പിണറായി വിജയന്‍ 1970ല്‍ കൂത്തുപറമ്പില്‍ നിന്ന് ആദ്യമായി നിയമസഭയിലേക്ക് മല്‍സരിച്ചപ്പോള്‍ സഹായിച്ചത് ജനസംഘവും ആര്‍.എസ്.എസുമായിരുന്നു. പിണറായിക്ക് വേണ്ടി അവര്‍ വോട്ട് തേടിയിരുന്നു.

പിന്നീട് ബി.ജെ.പി സംസ്ഥാന അധ്യക്ഷനായിരുന്ന കെ.ജി മാരാര്‍ മഞ്ചേശ്വരത്ത് മത്സരിച്ചപ്പോഴും സി.പി.എം സഹായിച്ചിരുന്നെന്നും മുല്ലപ്പള്ളി രാമചന്ദ്രന്‍ ആരോപിച്ചു. താന്‍ കേന്ദ്ര ആഭ്യന്തരസഹമന്ത്രിയായിരുന്ന കാലത്ത് ലാവ്‌ലിന്‍ കേസില്‍ പിണറായി വിജയനെ കുടുക്കണമെന്ന് എം.പി വീരേന്ദ്രകുമാര്‍ പലതവണ ആവശ്യപ്പെട്ടിട്ടുണ്ടെന്നും അദ്ദേഹത്തിന്റെ പേര് എടുത്ത് പറയാതെ മുല്ലപ്പള്ളി വെളിപ്പെടുത്തി. അന്ന് യു.ഡി.എഫിലുണ്ടായിരുന്ന ഘടകക്ഷി നേതാവ് ഇന്ന് പിണറായിയുടെ വലംകയ്യാണ്. അദ്ദേഹം പലതവണ പിണറായിയെ അകത്താക്കണമെന്ന് ആവശ്യപ്പെട്ടിട്ടുണ്ട്. സി.ബി.ഐ വേണ്ടരീതിയില്‍ അന്വേഷിച്ചാല്‍ പിണറായി അകത്താകും. കേരളത്തിലെ സി.പി.എം- ബി.ജെ.പി കൂട്ടുകെട്ടിനെ കുറിച്ച് പറയുന്നത് തെളിവുകളുടെ അടിസ്ഥാനത്തിലാണ്. അല്‍ഫോണ്‍സ് കണ്ണന്താനമാണ് രണ്ട് പാര്‍ട്ടികളെയും തമ്മില്‍ ബന്ധിപ്പിക്കുന്ന കണ്ണി. താമസിക്കാതെ ഇത് സംബന്ധിച്ച തെളിവുകള്‍ പുറത്ത് വിടുമെന്നും മുല്ലപ്പള്ളി പറഞ്ഞു.

മോദയും പിണറായിയും തമ്മില്‍ നല്ല ബന്ധമാണെന്ന് മുഖ്യമന്ത്രിയായ ശേഷം പിണറായി പ്രധാനമന്ത്രിയെ സന്ദര്‍ശിച്ച ശേഷം മനസിലായെന്നും മുല്ലപ്പള്ളി മുമ്പ് പറഞ്ഞിരുന്നു. തന്റെ ഓഫീസ് നിങ്ങളുടെ വീടായി കരുതണമെന്നാണ് പ്രധാനമന്ത്രി പറഞ്ഞതെന്ന് പിണറായി അന്ന് പറഞ്ഞു. അത് കേട്ട് കേരളത്തിലേക്ക് പറന്നിറങ്ങിയ പിണറായി അര്‍ദ്ധരാത്രി ഡി.ജി.പിയായിരുന്ന ടി.പി സെന്‍കുമാറിനെ നീക്കി. പകരം മോഹിയുടെയും അമിത്ഷായുടെയും വലംകയ്യായ ബഹ്‌റയെ ഡി.ജി.പിയാക്കി. ഗുജറാത്ത് കലാപക്കേസില്‍ മോദിക്കും അമിത് ഷായ്ക്കും വ്യക്തമായ പങ്കുണ്ടെന്ന് കണ്ടെത്തിയിരുന്നു. ദേശീയ അന്വേഷ ഏജന്‍സിയിയെ ഉദ്യോഗസ്ഥനായിരുന്ന ബഹ്‌റയാണ് അന്ന് ഇരുവരെയും രക്ഷിച്ചത്. അതിന്റെ പ്രത്യുപകാരമായാണ് മോദി ബഹ്‌റയെ ഡി.ജി.പിയാക്കണമെന്ന് പിണറായിയോട് ആവശ്യപ്പെട്ടതെന്നും മുല്ലപ്പള്ളി ആരോപിച്ചത് വിവാദമായിരുന്നു.

ലാവ്‌ലിന്‍ കേസില്‍ പിണറായി വിജയനെ സി.ബി.ഐ കോടതിയും ഹൈക്കോടതിയും കുറ്റവിമുക്തനാക്കിയെങ്കിലും സി.ബി.ഐ പുനപ്പരിശോധനാ ഹര്‍ജി നല്‍കാന്‍ വൈകിയിരുന്നു. ഇത് കേന്ദ്രസര്‍ക്കാരിന്റെ സമ്മര്‍ദ്ദം കാരണമാണെന്നും ആക്ഷേപം ഉയര്‍ന്നിരുന്നു. ഏറെ താമസിച്ചാണ് സി.ബി.ഐ അപ്പീല്‍ നല്‍കിയത്. കേസ് ഇക്കഴിഞ്ഞ ജനുവരിയില്‍ പരിഗണിക്കാമെന്നാണ് നവംബറില്‍ സുപ്രീംകോടതി വ്യക്തമാക്കിയിരുന്നത്. അന്തിമവാദം എന്ന് വേണമെന്ന് ജനുവരി രണ്ടാംവാരം പറയാമെന്നുമാണ് അറിയിച്ചിരുന്നത്. എന്നാല്‍ ഇതുവരെ അതേക്കുറിച്ച് യാതൊരു വിവരങ്ങളും പുറത്ത് വന്നിട്ടില്ല. ഇതിലെല്ലാം ദുരൂഹതകളുണ്ടെന്നാണ് മുല്ലപ്പളളി രാമചന്ദ്രന്‍ അടക്കമുള്ള കോണ്‍ഗ്രസ് തോക്കള്‍ ആരോപിക്കുന്നത്.