ഇടഞ്ഞ് നില്ക്കുന്ന എന്.എസ്.എസിനെ അനുനയിപ്പിക്കാന് കെ.ബി ഗണേഷ്കുമാര് എം.എല്.എയെ കൊല്ലം ലോക്സഭാ മണ്ഡലത്തില് സി.പി.എം മത്സരിപ്പിച്ചേക്കും, കേരളാ കോണ്ഗ്രസ് ബി എന്.സി.പിയില് ലയിച്ച സാഹചര്യത്തിലാണ് പുതിയ നീക്കം
ഇടഞ്ഞ് നില്ക്കുന്ന എന്.എസ്.എസിനെ അനുനയിപ്പിക്കാന് കെ.ബി ഗണേഷ്കുമാര് എം.എല്.എയെ കൊല്ലം ലോക്സഭാ മണ്ഡലത്തില് സി.പി.എം മത്സരിപ്പിച്ചേക്കും. കേരളാ കോണ്ഗ്രസ് ബി എന്.സി.പിയില് ലയിച്ച സാഹചര്യത്തിലാണ് പുതിയ നീക്കം. ഇതിന് പകരമായി പത്തനാപുരം സീറ്റ് സി.പി.എം തിരിച്ച് പിടിച്ചേക്കും. അടുത്തിടെ എല്.ഡി.എഫിലെടുത്ത ബാലകൃഷ്ണപിള്ളയുടെ പാര്ട്ടിയുടെ മുന്നണി പ്രതിനിധിയാണ് ഗണേഷ്. ശബരിമല പ്രശ്നത്തില് എന്.എസ്.എസും ഹൈന്ദവസമുദായത്തിലെ സാധരണക്കാരും ഇടഞ്ഞ് നില്ക്കുകയാണ്. അവരെ അനുനയിപ്പിക്കാന് ഗണേഷിനെ പോലൊരാളുടെ സ്ഥാനാര്ത്ഥിത്വം ഉപകരിക്കുമെന്നാണ് ഇടത്പക്ഷം വിശ്വസിക്കുന്നത്. രാഷ്ട്രീയത്തിന് അതീതമായി ബന്ധമുള്ളയാളാണ് ഗണേഷ്.
ശബരിമല യുവതീപ്രവേശനത്തിനെതിരെ എന്.എസ്.എസ് സംഘടിപ്പിച്ച നാമജപഘോഷയാത്രയില് കൊല്ലം പത്തനാപുരം എന്നിവിടങ്ങളില് നിന്നുള്ള സമുദായ അംഗങ്ങളുടെ പ്രതിനിധ്യം വലുതായിരുന്നു. അന്പത് വര്ഷമായി എന്.എസ്.എസ് പത്തനാപുരം താലൂക്ക് യൂണിയന് പ്രസിഡന്റാണ് ബാലകൃഷ്ണപിള്ള അദ്ദേഹത്തെ ഉപയോഗിച്ച് സമുദായ അംഗങ്ങളെ അനുനയിപ്പിക്കാനും നീക്കം നടക്കുന്നുണ്ട്. സുകുമാരന് നായരും ബാലകൃഷ്ണപിള്ളയും അത്ര രസത്തിലല്ല. വനിതാ മതിലില് ബാലകൃഷ്ണപിള്ള പങ്കെടുത്താല് നടപടിയെടുക്കുമെന്നാണ് സുകുമാരന് നായര് മുമ്പ് ഭീഷണിപ്പെടുത്തിയിരുന്നത്. പിള്ള അത് ലംഘിച്ചെങ്കിലും നടപടിയുണ്ടായില്ല. അതിനാല് പിള്ളയുടെ കരുത്ത് സി.പി.എമ്മിന് അറിയാം. അത് ഉപയോഗിച്ച് സുകുമാരന് നായരെ നേരിടുകയാണ് തന്ത്രം.
കൊല്ലം ജില്ലാ സെക്രട്ടറിയായ കെ.എന് ബാലഗോപാലിനെ മത്സരിപ്പിക്കാനായിരുന്നു സി.പി.എം ആദ്്യം ആലോചിച്ചിരുന്നത്. എന്നാല് എന്.എസ്.എസിന്റെ അടക്കം പിന്തുണ ബാലഗോപാലിന് വേണ്ടത്ര ലഭിക്കില്ലെന്ന് മനസിലാക്കിയാണ് പുതിയ നീക്കം. എന്.കെ പ്രേമചന്ദ്രന് കൊല്ലത്തെ കരുത്തനായ നേതാവാണ്. അദ്ദേഹത്തിന് സമുദായ പിന്തുണയുമുണ്ട്. മാത്രമല്ല സി.പി.എമ്മിനെ വഞ്ചിച്ചാണ് അദ്ദേഹം യു.ഡി.എഫിനൊപ്പം ചേക്കേറിയത്. അതിനാല് എങ്ങനെയും പ്രേമചന്ദ്രനെ തറപറ്റിച്ച് സീറ്റ് തിരിച്ചുപിടിക്കുകയാണ് ലക്ഷ്യം. ഏറ്റവും അവസാനം കൊല്ലം ബൈപ്പാസിന്റെ ഉദ്ഘാടനവേളയിലും പ്രേമചന്ദ്രന് കളിച്ചെന്നാണ് സി.പി.എം ആരോപണം. മുഖ്യമന്ത്രി പിണറായി വിജയനെ കൊണ്ട് ഉദ്ഘാടനം ചെയ്യിക്കാന് സര്ക്കാര് ആലോചിച്ചതാണ്. പ്രേമചന്ദ്രന് ഇടപെട്ടാണ് നരേന്ദ്രമോദിയെ കൊണ്ടുവന്നതെന്നും സി.പി.എം ആരോപിക്കുന്നു.
കൊല്ലത്ത് ബി.ജെ.പിക്ക് വലിയ വേരുകളില്ല. അതിനാല് നരേനദ്്രമോദിയെ കൊണ്ടുവന്നത് ബി.ജെ.പിയുടെ പിന്തുണ കൂടി നേടി വീണ്ടും മത്സരിച്ച് ജയിക്കാനാണ് പ്രേമചന്ദ്രന് ഇടപെട്ട് മോദിയെ കൊണ്ടുവന്നതെന്ന് സി.പി.എം പറയുന്നു. പാര്ട്ടിയേയും സര്ക്കാരിനെയും തകര്ക്കാന് ഇത്തരം തറക്കളികള് കളിക്കുന്ന പ്രേമചന്ദ്രനെ എങ്ങനെയും പരാജയപ്പെടുത്തണമെന്ന് ജില്ലാ നേതൃത്വം ആഗ്രഹിക്കുന്നു. അതിന്റെ ഭാഗമായാണ് പ്രേമചന്ദ്രനെ സംഘിയായി ചിത്രീകരിച്ച് പ്രചരണം നടത്തിയത്. അതിനെതിരെ ഉമ്മന്ചാണ്ടി വരെ രംഗത്തെത്തിയിരുന്നു. ഗണേഷ് കുമാര് കളത്തിലിറങ്ങുന്നതോടെ ചിത്രം മാറുമെന്നാണ് സി.പി.എം കരുതുന്നത്. എന്ത് സംഭവിക്കുമെന്ന് കാത്തിരുന്ന് കാണാം.
https://www.facebook.com/Malayalivartha
