നാളെ നിര്ണായകം... മക്കളെ കാണണമെന്ന് അതിയായ ആഗ്രഹവുമായി കനകദുര്ഗ പരാതി നല്കി; മക്കളും മാതാവുമൊത്തു വാടകവീട്ടില് താമസിക്കുന്ന ഭര്ത്താവിനെതിരേയുള്ള പരാതിയില് കനകദുര്ഗ ജയിക്കുമെന്ന് നൂറ് ശതമാനം ഉറപ്പ്; വിവാഹ മോചനത്തിനൊരുങ്ങുന്ന കൃഷ്ണനുണ്ണിക്ക് മക്കളെ നഷ്ടമാകുമോ?
ശബരിമല ദര്ശനം നടത്തി വിവാദ നായികയായ കനകദുര്ഗയുടെ ഭര്ത്താവ് കൃഷ്ണനുണ്ണിയ്ക്കും വയസായ അമ്മായിയമ്മയ്ക്കും വീണ്ടും തീവ്ര ദുഖം സമ്മാനിച്ച് കനക ദുര്ഗ. മക്കളെ കാണണമെന്ന് ആവശ്യപ്പെട്ടു നല്കിയ പരാതി മലപ്പുറം ജില്ലാ ശിശുക്ഷേമ സമിതി നാളെ പരിഗണിക്കും. മക്കളും മാതാവുമൊത്തു വാടകവീട്ടില് താമസിക്കുന്ന ഭര്ത്താവിനെതിരേയാണ് കനകദുര്ഗ പരാതി നല്കിയത്. കനക ദുര്ഗയ്ക്ക് അനുകൂലമായി ശിശുക്ഷേമ സമിതി വിധിക്കുക തന്നെ ചെയ്യും. കാരണം അച്ഛനേക്കാള് അമ്മയ്ക്ക് തന്നെ പ്രാധാന്യം കിട്ടും മാത്രമല്ല. സര്ക്കാരിന്റെ പ്രഷറും കൂടിയാകുമ്പോള് പിന്നെ പറയാനുണ്ടോ?
കഴിഞ്ഞ ഡിസംബര് 21നാണ് കനകദുര്ഗ ഭര്ത്താവിന്റെയോ ഭര്ത്തൃവീട്ടുകാരുടെയോ ബന്ധുക്കളുടെയോ അറിവോ സമ്മതമോ കൂടാതെ വീടുവിട്ടത്. മഞ്ചേരി ഇരുമ്പുഴിയിലുള്ള സഹോദരിയുടെ വീട്ടിലെത്തിയ അവര് മക്കളെ അവിടെയാക്കി ശബരിമലയിലേക്കു പുറപ്പെട്ടു. മക്കളെ പിന്നീട് ഭര്ത്താവ് കൃഷ്ണനുണ്ണി കൂട്ടിക്കൊണ്ടുപോയി. ശബരിമല ദര്ശനം കഴിഞ്ഞെത്തിയ കനകദുര്ഗയെ വീട്ടില് കയറ്റാന് ഭര്ത്തൃവീട്ടുകാര് അനുവദിച്ചില്ല.
വയോധികയായ ഭര്ത്തൃമാതാവ് സുമതിയമ്മയുമായുണ്ടായ കൈയാങ്കളിയില് ഇരുവര്ക്കും പരുക്കേറ്റു. സംഭവത്തില് പോലീസ് കേസെടുക്കുകയും ചെയ്തു. തലയ്ക്കു പരുക്കേറ്റ കനകദുര്ഗ കോഴിക്കോട് മെഡിക്കല് കോളജ് ആശുപത്രിയില് ചികിത്സയിലായിരുന്നു. അതു കഴിഞ്ഞെത്തിയ കനകദുര്ഗ ഭര്ത്തൃവീട്ടില് പ്രവേശിക്കാന് അനുമതി ആവശ്യപ്പെട്ട് പുലാമന്തോള് ഗ്രാമന്യായാലയത്തെ സമീപിക്കുകയും അനുകൂല വിധി നേടുകയും ചെയ്തു. അതിനിടെ, ഭര്ത്താവും ഭര്ത്തൃമാതാവും മക്കളും അങ്ങാടിപ്പുറത്തുള്ള മറ്റൊരു വാടക വീട്ടിലേക്കു താമസംമാറി.
പോലീസ് സംരക്ഷണയില് തനിച്ചുതാമസിക്കുന്ന കനകദുര്ഗയ്ക്കു ജോലിക്കു പോകുമ്പോഴും പോലീസ് അകമ്പടിയുണ്ട്.
കുട്ടികളെ കാണണമെന്ന ആവശ്യവുമായി കനകദുര്ഗ പലതവണ ഫോണില് ബന്ധപ്പെടാന് ശ്രമിച്ചെങ്കിലും ഭര്ത്താവ് ഫോണെടുക്കാനോ സംസാരിക്കാനോ കൂട്ടാക്കിയില്ല. തുടര്ന്നു സംരക്ഷണം നല്കുന്ന ഒരു പോലീസുകാരന്റെ ഫോണില് വിളിച്ച് ആവശ്യമുന്നയിച്ചപ്പോള് കുട്ടികളെ കാണിക്കാനാവില്ലെന്നറിയിക്കുകയായിരുന്നു.
ആവശ്യവുമായി കോടതിയില് പോകാമെന്നും കോടതി വിധി മാത്രമേ അംഗീകരിക്കുവെന്നുമാണ്കൃഷ്ണനുണ്ണിയുടെ നിലപാട്. താമസസ്ഥലത്തേക്കു നേരിട്ടുപോയി കുട്ടികളെ കാണുന്നതു കൂടുതല് പ്രശ്നങ്ങള്ക്കു കാരണമായേക്കുമെന്നു കണ്ടാണ് ചൈല്ഡ് വെല്ഫെയര് കമ്മിറ്റിക്ക് പരാതി നല്കിയതെന്ന് കനകദുര്ഗ പറഞ്ഞു.
കനകദുര്ഗയുടെ പരാതി ഫയലില് സ്വീകരിച്ച ചൈല്ഡ് വെല്ഫെയര് കമ്മിറ്റി നാളെ കേസ് പരിഗണിക്കും. സി.ഡബ്ല്യു.സി. ചെയര്മാന് അഡ്വ. ഹാരിസ് പഞ്ചിളി, അംഗങ്ങളായ അഡ്വ. നജ്മല് ബാബു കൊരമ്പയില്, അഡ്വ. കവിത ശങ്കര് എന്നിവരുടെ സിറ്റിങ്ങില് കൃഷ്ണനുണ്ണിയോട് കുട്ടികളുമായി 16നു ഹാജരാകാന് അവശ്യപ്പെട്ടേക്കും.
അതേസമയം ഒരാവേശത്തിന്റെ പുറത്ത് ശബരിമല കയറാന് പോയ കനകദുര്ഗ്ഗയുടെ ജീവിതം ഇപ്പോള് വല്ലാത്ത അവസ്ഥയിലാണ്. മക്കളില് നിന്നും ഭര്ത്താവില് നിന്നും തീര്ത്തും ഒറ്റപ്പെട്ടു ജീവിക്കേണ്ട അവസ്ഥയിലാണ് അവര്. അയ്യപ്പനെ ദര്ശനം നടത്തിയ യുവതി കോടതി വിധിയുടെ അകമ്പടിയോടെ പെരിന്തല്മണ്ണയിലെ അങ്ങാടിപ്പുറത്തെ വീട്ടില് പൊലീസ് സംരക്ഷണയില് ഒറ്റക്കാണ് താമസം. വീട്ടുകാരുമായി തെറ്റിയതോടെ ഇനി യുവതിയുമായി ഒരുമിച്ചു ജീവിക്കാന് സാധിക്കില്ലെന്ന തീരുമാനത്തിലാണ് ഭര്ത്താവ് കൃഷ്ണനുണ്ണി. അതുകൊണ്ട് തന്നെ ശബരിമല കയറിയ കനകദുര്ഗയുമായുള്ള ബന്ധം വേര്പെടുത്താനാണ് കൃഷ്ണനുണ്ണി ഒരുങ്ങുന്നത്. അതിനിടെയാണ് കനക ദുര്ഗയുടെ പതിനെട്ടാമത്തെ അടവ്.
https://www.facebook.com/Malayalivartha
