ഫോര്‍ട്ടുകൊച്ചി കടപ്പുറത്ത് ലന്താന തണ്ടില്‍ (കൊങ്കിണി) നിര്‍മിച്ച 30-ഓളം ആനകളുടെ പ്രദര്‍ശനം ആരംഭിച്ചു. വനത്തിനും വന്യമൃഗങ്ങള്‍ക്കും ഭീഷണിയായി വളരുന്ന ലന്താന എന്ന പാഴ്‌ച്ചെടി ഉപയോഗിച്ച് ആനകളെ നിര്‍മിച്ചിരിക്കുന്നത് ആനകളുടെ ക്ഷേമത്തിനായി പ്രവര്‍ത്തിക്കുന്ന സംഘടനയായ ദ് റിയല്‍ എലിഫന്റ് കളക്ടീവും ദ എലിഫന്റ് ഫാമിലിയും ചേര്‍ന്നാണ്. കൊങ്കിണിക്കു പുറമെ അരിപ്പൂച്ചെടിയെന്നും ഇതറിയപ്പെടുന്നു.

പ്രകൃതിയില്‍ ആനകളും മനുഷ്യനും തമ്മിലുള്ള ബന്ധവും ലന്താന ചെടികളുടെ ദൂഷ്യവശങ്ങളും വിശദീകരിക്കുന്നതിനൊപ്പം ആദിവാസികള്‍ക്കൊരു വരുമാനവും പ്രദര്‍ശനത്തിലൂടെ ലക്ഷ്യമിടുന്നു. വിഷാംശമുള്ള ലന്താന ചെടികള്‍ ആഫ്രിക്കയില്‍നിന്നു ബ്രിട്ടീഷുകാരാണ് ഇന്ത്യയിലെത്തിച്ചതെന്നു കരുതുന്നതായി ഗൂഡല്ലൂര്‍ കേന്ദ്രമായുള്ള ഗവേഷണ സ്ഥാപനമായ ഷോള ട്രസ്റ്റിലെ ഗവേകരായ ഐറിനും താഷി തെക്കേക്കരയും പറഞ്ഞു.

വനങ്ങളിലും മറ്റും ഇതിന്റെ വ്യാപനം ആദിവാസികള്‍ക്കും തിരിച്ചടിയായ സാഹചര്യത്തിലാണു ലന്തചെടിവള്ളികള്‍ക്കൊണ്ട് ആനരൂപ നിര്‍മാണ പദ്ധതി തുടങ്ങിയത്. ചെടിയുടെ തണ്ട് വേവിച്ചെടുത്തു കൃത്രിമ നിറങ്ങള്‍ ചേര്‍ക്കാതെയാണു നിര്‍മാണം. മൈസൂര്‍ വനാന്തരങ്ങളിലും ഗൂഡല്ലൂരിലുമുള്ള പനിയ, ബേട്ടക്കുറുമ്പ, സോലിഗ സമുദായങ്ങളില്‍പ്പെട്ട ഏഴുപതിലേറെ ആദിവാസി കലാകാരന്‍മാരാണ് ആനകളെ നിര്‍മിക്കുന്നത്. നിലവില്‍ 101 ആനകളെ ഇത്തരത്തില്‍ നിര്‍മിച്ചിട്ടുണ്ട്.

കൊച്ചിയിലെ പ്രദര്‍ശനത്തിനുശേഷം ബംഗളൂരു, ഡല്‍ഹി എന്നിവിടങ്ങളില്‍ ആനകളുടെ പ്രദര്‍ശനം നടത്തും. 2020-ല്‍ ഇംഗ്ലണ്ടിലെ വിക്ടോറിയ, ആല്‍ബര്‍ട്ട് മ്യൂസിയം, ലണ്ടനിലെ റോയല്‍ പാര്‍ക്ക് എന്നിവിടങ്ങളിലും പ്രദര്‍ശിപ്പിക്കും.

2021-ല്‍ അമേരിക്കയില്‍ നടത്തുന്ന പ്രദര്‍ശനത്തിനു ശേഷം സാന്‍ഫ്രാന്‍സിസ്‌കോയില്‍ എത്തിക്കുന്ന ആനകളെ അവിടെവച്ചു ലേലം ചെയ്യും. ആനകളെ ലേലം ചെയ്ത് ലഭിക്കുന്ന തുക ഏഷ്യന്‍ എലിഫന്റ്‌സ് ഫണ്ടിനു കൈമാറും. ഫോര്‍ട്ടുകൊച്ചിയിലെ ആനകളുടെ പ്രദര്‍ശനം ഫെബ്രുവരി 28 വരെ തുടരും.